TLAJ ta o se tlen mochampoyouaj kipia se kokolistli tlen amo kipia pajtli, uelis tlauel mitstekipachoua. Amo san kokolistli kichiua se akajya ma tlaijiyoui, nojkia tlaijiyouia pampa amo kuali kiyolmati. Uelis se akajya peuas tlauel majmauis o motekipachos pampa miakpa monekis yas kampa tepajtianij, amo kipia tomij tlen ika mopajtis uan nojkia pampa uelis kitlanauia nopa pajtli tlen kimakaj. Kema se akajya kipia se kokolistli tlen amo kipia pajtli, uelis kichiuas tlauel ma motekipacho.

¿Tlake uelis mitspaleuis? Miakej maseualmej tlauel kinpaleuijtok momaijtosej uan kipouasej ipan Biblia tlamachtili tlen kinyolchikaua. Nojkia tlauel kinyolchikaua kema ininchampoyouaj uan ininuampoyouaj kinextiaj tlauel kinikneliaj uan kinpaleuiaj.

Robert, se tlakatl tlen kipia 58 xiuitl, kiijtoua: “Tlaj tijneki amo tlauel timotekipachos maske tijpia se kokolistli, ximotemachi ipan toTeotsij uan ya tlauel mitspaleuis. Ximomaijto uan xikiljui Jehová kenijkatsa tijyolmati. Xikiljui ma mitsmaka itonal uan ma mitspaleui tikijiyouis nopa kuesoli pampa amo tijneki mochampoyouaj tlauel ma mokuesokaj”.

Robert nojkia kiijtoua: “Tlauel mitspaleuis tlaj mochampoyouaj itstokej monechka uan mitsyolchikauaj. Mojmostla se tlen nochampoyouaj nechnojnotsa uan nechtlajtlania kenijkatsa niitstok. Nouampoyouaj nojkia nechyolchikauaj. Nopa nechpaleuia kuali ma nijyolmati uan ma nikijiyoui nokokolis”.

Tlaj se tlen mouampoyouaj mokokoua uan tijneki tijpaxaloti, tlauel mitspaleuis tlen Linda kiijtoua: “Se akajya katli mokokoua kineki itstos kej sekinok maseualmej, yeka uelis kemantika amo kinekis kamanaltis tlen ikokolis. Yeka kema tikamanaltis iuaya, amo xikilnamikili ikokolis”.

Tlaj tijkauas toTeotsij ma mitsmaka chikaualistli, tlaj tijpouas Biblia, tlaj tijkauas mochampoyouaj uan mouampoyouaj ma mitspaleuikaj, mitspaleuis tikitas amo san tlapik tiitstok maske tijpia se kokolistli.