INKHA ove ine omunthu umwe uhole una ouvela uhaveluka, otyo tyipondola okukusoyesa. Tyihekusoka vala okuti nthiki imwe monkhi, tupu mokala notyiho mokonda yokuna ouvela oo. Otyiho tyipondola okuliyawisa tyina uhavasi ovihemba, no ñgeni mohakulwa, nonombongo mbokufeta. Owoma upondola okulingisisa ovitateka vivilepo.

Oityi tyipondola okutukuatesako? Ovanyingi vavasa epameko mu vakuavo, ovakuavo oputyina velikuambela, iya vamwe o mokutanga ononthele  mbumwe mbo Mbimbiliya. Tupu vamwe vakuateswako no nombunga mbavo nomapanga muetyi vesukisa.

Robert, una omanima 58 wati: “Tyina una ouvela yumba onthumbi mu Huku,” otyo matyikukuatesako okukoleleya. Likuambela ku Huku, omupopila oñgeni ulitehelela. Muiita ononkhono mbae. Muiita opo ekupameke. Opo utyivile okupameka ombunga yove aitualako okukoleleya.

“Ombunga yange yankhuatesileko unene. Ankho ndyilikalelwa nomunthu wike ine vevali avapulu ‘oñgeni ndyikahi.’ Napamekelwe unene nomapanga ange. Avankhuatesako okukala vali nawa iya otyo tyankhuatesako okukoleleya.”

Inkha mokatalelapo omunthu wavela, tala etyi Linda apopia, wati: “Omunthu wokuavela kahande vala okutomphola konthele youvela wae, mahi tyesukisa okupopia ovipuka ovikuavo vimukalesa nawa. Popia konthele yovipuka haunene ankho mupopia-le.”

Nekuateso lya Huku, Nondaka yae, nombunga iya nomapanga, mavetukuatesako okukala nonthilo nomuenyo, namphila tuna ouvela uhaveluka.