BEMANA cuma rü marü ãũrima quidaꞌawe rüeꞌna cutanüü̃ marü yadaꞌaweü̃tchi, rü ngẽmacaꞌ nüü̃ cucuaꞌ na ãũrima nagutchaü̃ i ngẽma. Rü poraãcü cungetchaü̃. Tüꞌcüü̃ nagutchaü̃tchi ngẽguma ãũrima i daꞌawegu? Erü bemana cumuü̃ rü cuoegaãẽ ngẽguma nagu curüĩnügu i nhaãgü: ‘Tchadĩeruãü̃ tá na nüü̃́ tchanaütanüü̃caꞌ i dutúru? Üü ne tchataeü̃caꞌ? Na ngẽma üü i tchoü̃ rümeẽẽü̃ tá rü tchoü̃ natchieẽẽ?’

Taꞌacü tá cuü̃ rüngü̃ẽẽ na yana namaã cuĩnüü̃caꞌ i curü daꞌawe? Cuyumüẽü̃ rü Tupanaarü Orewa cuugütaeü̃. Cutanüü̃ rü cumücügü rü cuü̃ narüngü̃ẽẽgü tá ta.

Robert ya 58 ya taunecüãcü rü nhaü̃maã naucuꞌẽtae: “Tupanagu yaõ erü ngẽma rü cuü̃ narüngü̃ẽẽ tá na nüü̃ cucuaꞌü̃ na taꞌacü tá namaã cuüü̃ i daꞌawe. Nayumüẽ rü Yeuwamaã nüü̃ iu i guü̃ma i ngẽma nagu curüĩnüü̃. Nacaꞌ ínaca i naãẽ i üüneü̃. Rü poraca rü nhuꞌmatchi ngü̃ẽẽcaꞌ ínaca na yana namaã cuĩnüü̃caꞌ i gutchaü̃gü, rü ngẽma meü̃gu curüĩnüü̃caꞌ na cugütama curüngü̃ẽẽü̃caꞌ rü nüü̃ i cutanüü̃.”

Robert rü wenaarü nidea rü nhanagürü: “Nameẽtchi ngẽguma cutanüü̃gu cuyaõgu rü nümagü cuü̃ narüngü̃ẽẽgügu na meü̃gu curüĩnüü̃ca. Nümagü rü tchaü̃ta nacagüẽ rü nhanagürügü: ‘Guü̃ memareü̃?’ Rü nhumatchi tchamücügü i muü̃ma i natchicacü̃aꞌ rü tchoü̃ nataãẽẽẽgü. Nümagü rü tchoü̃ naporaẽẽ rü ngẽma rü tchoü̃ narüngü̃ẽẽ na tchamaü̃ü̃.”

Laura rü nhaü̃maã taucuꞌẽtae ngẽguma naü̃tawa cuũgu i wüi duü̃ü̃ i daꞌaweü̃: “Name na taũtáma norü daꞌawetchigagu rica namaã quideaü̃. Erü ngẽma duü̃ü̃ rü nanawaꞌe nanaairügumaraü̃ü̃ i norü maü̃, ngẽmacaꞌ totchigagu namaã idea.”

Tupana, norü Ore, cumücügü rü cutanüü̃gü rü cuü̃ narügü̃ẽẽgü tá na cutaãẽama woo na quidaꞌaweü̃tchi.