Á MU ikháán o mbáa bi̱ xtayáá nitháán rí gíʼdoo mbá nandii rí nánguá rígá thanuu, natayáá xú kaʼnii mingíjyúuʼ nindxu̱u̱. Gajkhun, rí maraʼdáá mbá nandii nindxu̱u̱ gakhi wéñuʼ, raʼkháa i̱ndó naraxtaa gíná ga̱jma̱a̱ numuu nandii ndrígaaʼ ma̱ngaa namíñaaʼ numuu rí mbaʼyóoʼ mi̱dxu̱ʼ má xúʼko̱ náa guʼwá thana, tsítayáá xóo gátani mu mataxkamaa o maratsi thana rí nda̱yáaʼ. Xúgíʼ rígi̱ naʼni maxmiéjuanʼ itháan.

Ndiéjunʼ gambayaaʼ náa mbá gaʼkhu xóo rígi̱ rá. Mbaʼin xa̱bu̱ nimbáñun rí mutakáñii Dios ga̱jma̱a̱ rí muraxnuu Biblia, ma̱ngaa nimbáñun wéñuʼ tsiakii rí nindrigú náa bi̱ kuñún.

Robert, bi̱ gíʼdoo 58 tsiguuʼ naʼthí: “Mu matani gajmaaʼ mbá nandii, ga̱ku̱ma̱a̱ xtayáá Dios, ikhaa mambáyáaʼ. Aratákáñii Jeobá, aratháán xúgíʼ rí naku̱ma̱a̱ʼ. Atanda̱ʼa̱a̱ rí maxnáaʼ tsiakii mu maʼngaaʼ matani gajmaaʼ nandii ma̱ngaa rí maxnún tsiakii bi̱ kuwa náa guʼwáaʼ”.

Robert naʼthí xóó: “Gíʼdoo wéñuʼ numuu rí bi̱ kúwi̱i̱n náa guʼwáaʼ mumbayáaʼ. Xúgíʼ mbiʼi bi̱ ka̱ñu̱u̱n nutaroʼoʼ ga̱jma̱a̱ teléfono mu mbuyáá xú káʼnii xtáá. Ma̱ngaa bi̱ nambáxuʼ gajmíʼ nuxnuʼ tsiakii. Rúʼko̱ nambáyuʼ mu maʼngo̱ʼ mani ga̱jmu̱ʼ nandii”.

Xtaʼdaa mbáa bi̱ nambáxa̱ʼ gajmaaʼ bi̱ naʼniuu nandii ga̱jma̱a̱ nandaaʼ mi̱dxu̱ʼ gáta̱ya̱a̱ ráʼ. Linda naʼthí rígi̱: “Bi̱ naʼniuu nandii tsíyoo rí maxmiéjuunʼ ga̱jma̱a̱ numuu nandii rí gíʼdoo. Ikha jngó májánʼ gáʼni rí xáratha̱a̱n ga̱jma̱a̱ numuu rúʼko̱, aratháán mbá rí xáʼni maxtáa gíná ga̱jma̱a̱ rí maxnúu tsiakii”.

Tsiakii rí naxná Dios, ikha rí na̱ʼkha̱ náa Biblia dí maʼni̱i̱ a̱jkia̱a̱nʼ ga̱jma̱a̱ rí xóo mumbayáaʼ bi̱ xtañún ma̱ta̱ya̱a̱ rí gíʼdoo numuu maraxtaa maski asndu natamíníiʼ ga̱jma̱a̱ mbá nandii rí nda̱a̱ thanuu.