TA JA weʼn ma june bʼa wa pamilya ayiʼoj jun chamel bʼa mixa ay yajnal, wanxa xa naʼa janekʼto chamkʼujol wa xyaʼa. Pe mini kechanuk ja swokolil wa xyaʼa ja chameli, cha wani xyaʼa chamkʼujol. Ja xiwel sok ja chamkʼujoli wani xbʼobʼ ipaxuk yuja tikʼanxta wa sjeka payjel ja loktori, ja wokol stajel ja aniki ma ja stsʼakoli sok ja smaloʼil wa xyaʼa. Wani xyaʼa yaj olomil yajni jel xa pensaraʼan bʼa jun chamel.

¿Jasa oj bʼobʼ skoltaya ja bʼa ekʼeleʼik jaw? Jitsan kristyano jel akʼubʼal kulan skʼujole yajel orasyon sok skʼumajel tekstoʼik bʼa Biblia bʼa wa stsatsankʼujolani.  Pilan jasunuk jani ja syajal skʼujole sok ja skoltanele jawa pamilya soka wa wamigoʼiki.

Ja Robert, bʼa ayiʼoj 58 jabʼil, wa xyaʼa ja rason it: «Bʼa oj kuchukawuj jawa chameli, jipa akʼujol bʼa Dyos, jaxa yeʼn ojni skoltaya. Ayi orasyon ja Jyoba sok alayabʼ jastal aya mero xa wabʼi. Kʼanayi ja yipi bʼa tsats oja jeʼa bʼaj soka wa pamilya sok bʼa mi jel oj chamuka kʼujol jawa chameli».

Cha wa xyala: «Jelni tʼilan oj ya kulan akʼujol jawa pamilya. Kʼakʼu kʼakʼu, june bʼa yeʼnle wa skʼumanone bʼa sjobʼjel jastal ayon. Cha wani xyaweki kulan jkʼujol ja kamigoʼik bʼa tuk lugariki. Ja jaw wani stsatsankʼujolanon sok wa skoltayon bʼa mi oj el jgana».

¿Ay maʼ juna wamigo bʼa maloʼay sok waxa kʼana oja wulatay? Kʼela ja jas wa xyala ja Linda: «Ja chamumi wa skʼana oj yiʼ jun sakʼanil jastalni kʼajyel sok bʼobʼta mini skʼana jaxta oj staʼ tiʼal ja xchameli. Ja yuj, ala ja jas kʼajyel waxa taʼa tiʼali».

Ja ipal wa xyaʼa ja Dyosi, ja jastal wa xyaʼa kulan jkʼujoltik ja Biblia sok ja syajtanele jawa pamilyaʼik soka wa wamigoʼik ojni bʼobʼ skoltaya bʼa oja wil ayni sbʼej ajyel sakʼan ama aya wiʼoj jun tsatsal chamel.