TEME jaʼat o te machʼa kʼax kʼux ta awoʼtan tabil ta tulan chamel te ya xjuʼ ya xmilawane, ya xkʼot ta awoʼtan te ya yakʼ bayal mel-oʼtane. Te bin wokole ma jaʼuknax te chamele, jaʼ wokol te bitʼil ya yakʼ mel-oʼtane. Yame xtoy te mel-oʼtan sok xiwel te kʼalal ya xbootik ta doktor, kʼalal ya jletik te jpoxiltik o teme ya jtabeytik stojole soknix te ay ya yutsʼinotik te poxetik te ya kichʼtik akʼbeyele. Yame yutsʼinotik ta bayal te kʼalal ya jmel koʼtantik yuʼun te chamel stsakojotike.

¿Bin ya xjuʼ ya skoltayotik? Bayal machʼatik staojik koltayel ta swenta te skʼoponel Dios sok te skʼoponel tekstoetik ta Biblia te ya yakʼ mukʼul oʼtanile. Jaʼnix jich staojik koltayel ta swenta te skʼuxul yoʼtanik te yakʼojik ta ilel te sfamiliatakik sok te yamigotakike.

Te Robert te 58 yaʼbilale jich ya yal: «Swenta ya asintintay-aba sok te chamele, jaʼ ya skʼan te yakuk smukʼulin awoʼtan te Diose, jaʼme ya skoltayat. Kʼopona te Jehová sok albeya te bin yaʼiyel ya awaʼiy abae. Kʼambeya koltayel swenta ayuk yip awoʼtan ta stsʼikel te awokole, pasa ta swenta te afamiliae».

Jich ya yalxan te Robert: «Kʼax mukʼ skʼoplal te yakuk skoltayat te afamilia sok te yakuk yakʼbat smukʼul awoʼtane. Ta jujun kʼajkʼal aynanix jtuluk jfamilia-a te ya skʼoponon ta telefono yuʼun ya sjojkʼoy te bin kilele. Jaʼnix jich ya yakʼbon smukʼul koʼtan te kamigotak te namal ayike. Jaʼ-abi jaʼ ya skoltayon yuʼun lek ya kaʼiy jba sok te ayuk yip koʼtan ta sitintayel te chamele».

¿Aybal jtul awamigo te ay ta chamel te ya akʼan ya xbajtʼ awulaʼtaye? Ilawil te bin ya yal te Lindae: «Te machʼa ay ta chamele ay ma skʼan ya yalbeyix skʼoplal te swokole, jaʼ ya skʼan te lekuk ayixe. Jaʼ yuʼun jaʼ lek te jaʼuk ya kalbeytik skʼoplal te bin ya jpastik ta jujun kʼajkʼale».

Ta swenta te yip awoʼtan ya yakʼbat te Diose, te smukʼul oʼtanil ya yakʼ te Biblia soknix te skʼuxul yoʼtan te afamilia sok te awamigotake, jaʼme ya xjuʼ ya skoltayat ta yilel te kʼax lek te kuxinel manchukme tsakbilat ta tulan chamel.