MI OY junuk avutsʼ avalal o mi voʼot ti stsakojot tsatsal chamel ti muʼyuk xa xpoxile, xavaʼibe smelolal ti kʼu to xkʼuxul taje. Maʼuk noʼox ti kʼux tajeke, yuʼun chkʼunibik-o ta skoj ti chat yoʼontonike. Mas to chiʼik-o xchiʼuk tsvul-o tajek yoʼontonik ti skʼan xbatilanik ta doktore, ti mu xtoj yuʼun li xpoxilike o ti vokol ta taele xchiʼuk ti xuʼ x-ipajik-o li poxiletike. Li tsatsal vul oʼonton ti xuʼ xij-ipaj-oe mas to tslubtsanutik.

¿Kʼusi xuʼ skoltaot mi jech kʼot ta atojolale? Epal krixchanoetike te staoj stsatsal yoʼontonik li ta orasione xchiʼuk li ta tekstoetik ta Vivlia ti tspat tajek oʼontonale. Li buchʼutik xuʼ spat koʼontontik xtoke  jaʼ li kutsʼ kalaltik xchiʼuk li kamigotaktik ti skʼanojutik tajek xchiʼuk ti tskʼan tskoltautike.

Xi chtojobtasvan Robert ti 58 sjabilale: «Sventa xkuch batel avuʼun li achamele, pato avoʼonton ta stojolal li Diose, vaʼun tskoltaot. Kʼopono li Jeovae, albo ti kʼu yelan chavaʼi abae xchiʼuk kʼanbo xchʼul espiritu. Kʼanbo ti akʼo skoltaot sventa junuk noʼox avoʼonton xilik li avutsʼ avalale».

Xi to chal li Roberte: «Tskoltaot tajek kʼalal tspatik avoʼonton li avutsʼ avalale xchiʼuk ti teuk xchiʼinojoxuke. Oy junantik kutsʼ kalal ti skotol kʼakʼal tskʼoponikun talel sventa tsjakʼik mi lek oyune. Jech xtok, tspatbeikun tal koʼonton li kamigotak ta yantik lume. Taje jaʼ skoltaojun sventa junuk noʼox koʼonton xchiʼuk ti mu xilubtsaje».

¿Mi oy junuk avamigo ti ip chaʼie xchiʼuk ti oy ta avoʼonton chbat akʼele? Kʼelo avil li kʼusi chal Lindae: «Li buchʼu ip chaʼie tskʼan ti lekuk noʼox li xkuxlejale xchiʼuk mu van skʼan ti jaʼ sloʼilta skotol ora li xchamele. Jaʼ yuʼun, oyuk kʼusi yan xaloʼiltaik».

Ta skoj ti tskoltaot li Diose, ti tspat avoʼonton li Vivliae, ti skʼanojoxuk li avutsʼ avalal xchiʼuk li avamigotake, chavakʼ venta ti oy tajek sbalil li akuxlejal akʼo mi tsots ipote.