Te yu e fii fu kii iseefi fu di sani e moo i

PEE

Adriana fu Balazilikondee taki: „Den fii ya á be e gwe. Neen meke mi be e si enke a be o moo bun fu mi kii miseefi.”

A MITI i wan leisi kaba taki i booko-saka te neen yu á be e fii fu libi moo? Kande yu e fusutan fa Adriana be e fii. A be e kusumi te a á be e sabi san fu du. Adriana be abi wan siki di e meke ai fii booko-saka ala yuu.

Luku a toli tu fu wan man a Yapan den e kai Kaoru. A be e solugu en mma anga en dda di swaki fu di den kon gaandi. A taki: „A ten de mi wooko be e gi mi booko-ede. Son leisi mi á be e fii fu nyan. Mi á be e siibi bun tu. Mi be bigin denki taki a dede namo mi sa dede da mi boo.”

Wan man fu Nigeliya den e kai Ojebode taki: „Mi be e kusumi te da mi e kee, neen meke mi be e suku wan fasi fu kii miseefi.” Koloku Ojebode, Kaoru, anga Adriana á kii denseefi. Ma ala yali a omen ondoo sama e kii denseefi.

PE I SA FENDE YEEPI?

Gaanse fu den sama di e kii denseefi a mannengee. A omen fu den du a sani ya fu di sen be e kisi den fu suku yeepi. Yesesi taki wan sama di siki abi dataa fanowdu (Lukasi 5:31). Neen meke efi i lai booko-ede neen yu e pakisei fu kii iseefi, sen á mu kisi i fu suku yeepi. A omen sama di e kusumi fende dataa deesi di yeepi den fu fii bun baka. A dataa yeepi Ojebode, Kaoru, anga Adriana. Nownow den e fii moo bun.

Kande dataa o gi i deesi. Kande den o taki anga i tu fu yeepi i fu kengi a fasi fa yu e denki anga a fasi fa yu e du sani. Te wan sama e fii booko-saka, a abi famii anga mati fanowdu di e meke moiti fu fusutan fa ai fii, di abi boo anga en, di e holibaka gi en. A moo bun mati di wan sama sa abi a Yehofa Gadu. Ai koboloiki a Beibel fu yeepi u.

WAN TEN O DE PE SIKI NÁ O DE MOO

Son sama di e kusumi naamo abi fu e go a dataa wan hii pisiten. Taawan abi fu kengi a fasi fa den be e libi tu soso fu fii lekiti pikinso. Efi yu abi a polobelema ya, leti enke Ojebode i sa abi a howpu taki sani o go bun aini a ten di e kon. Ojebode taki: „Mi e pakisei a ten di a sani di sikiifi a Yesaya 33:24 o kon tuu. Ape sikiifi taki wan ten o kon pe nawan sama a goontapu o taki: ’Mi siki.’” Leti enke Ojebode, i sa fende toosutu te yu e pakisei san Gadu paamisi. A paamisi taki a o meke wan „nyun goontapu”. „Pen” ná o de moo (Openbaring 21:1, 4). A sani ya wani taki libisama ná o fii pen moo. Den ná o pakisei sani di e meke den e fii tyali tu. Den sani di be e meke yu e fii tyali ná o de moo. „Den sani de ná o kon a [yu] pakisei moo.”—Yesaya 65:17.

Wantu Beibeltekisi di sa yeepi i

Gadu sabi fa yu e fii.

„Mi Yehofa, i Gadu, holi yu ai leti-ana. A mi e taigi i taki: ’Ná feele. Mi o yeepi i.’”—Yesaya 41:13.

Yehofa e fusutan u bun moo iniiwan taa sama. A wani yeepi u tu.

Pakisei san Gadu Wowtu taki.

„[Eliya] begi Gadu fu a kii en. A taigi en taki: ’ . . . Gaantangi Yehofa, meke mi dede.’”—1 Kownu 19:4.

Ojebode taki: „Te mi e sidon pakisei san mi leisi aini Gadu Wowtu, ai toosutu mi. Mi kon fusutan taki wan leisi polofeiti Eliya be e fii leti enke fa mi e fii.”

Leli wan sani fu den sama di kai aini Beibel.

„Mi [Yesesi] begi gi i [Peitilisi] fi i biibi á swaki.”—Lukasi 22:32.

Baka di Peitilisi sitee dii leisi taki a á sabi Yesesi, a sani hati Peitilisi te a bali kee. Kaoru taki: „Te mi luku san Peitilisi du, anga fa Yesesi gi en paadon, da a sani de e yeepi mi fu si taki Yehofa anga Yesesi be e booko den ede anga a fasi fa a be e fii. A toli ya e toosutu mi.”

’Noiti moo sama o membee sani di e meke den fii booko-saka. Den sani de ná o kon a den pakisei moo.’—Yesaya 65:17

A WAKITITOLEN