¿NO TIONMOMACHILIANI kemej Adriana uan hasta amo tikonnekiok tionyoltos? Yejua nochipa motekipachouaya, moteltayokoltiaya uan nion teyi kiyolseuiaya. Satepan, kiluijkej ke kipiaya se kokolis tein kichiua maj nochipa tayokoxto.

Kaoru, se takat kayot Japón, no ijkon momachilij. Yejua kinyekpiak itatuan akin mokokouayaj uan xiuejkejya katkaj. Yejua kijtoua: “Ijkuak, amo nitaxikouayaok porin semi nitekitia. Satepan, amo nimayanayaok uan amo niueliaok nikochi. Niknekia nimikis porin amo niknekiaok nitajyouis”.

Uan no, Ojebode, se takat kayot Nigeria, kijtoua: “Nochipa nitayokoyaya uan nichokaya. Hasta niknemilij nimomiktis”. Ojebode, Kaoru uan Adriana amo momiktijkej, sayoj ke sejse xiuit tel miakej kemaj momiktiaj.

Takamej yejuan akin okachi momiktiaj porin miakej pinauaj tajtaniskej maj kinpaleuikan. Sayoj ke, Jesucristo kijtoj ke akin kipiaj kokolis moneki maj se tapajtijkej kinpaleui (Lucas 5:31). Yejua ika, komo tejuatsin ijkon tionmomachilia, amo xionpinaua tiontajtanis maj mitsonpaleuikan. Tapajtianij kinpaleuianij miakej maj okachi kuali momachilikan, kemej Ojebode, Kaoru uan Adriana.

Seki tapajtianij kinpaleuiaj akin tel tayokoyaj keman kinmakaj pajti oso keman kinkakij uan kinyolchikauaj. Uan no, ininchankauan uan akin iniuan mouikaj moneki kinpaleuiskej, kinajsikamatiskej uan amo yolijsiuiskej iniuan. Jiova, yejua akin okachi kuali uelis iuan timouikaskej uan techpaleuia ika iTajtol, Biblia.

Kemansa, akin tel tayokoyaj moneki uejkaua kinpajtiskej uan kipataskej kemej monejnemiltiaj. Sayoj ke, komo tejuatsin no semi tiontayokoya, mitsonyolseuis komo tikonneltoka ke satepan kualtsin tinemiskej. Ojebode ijkon kichiua. Yejua kijtoua: “Nikneki nikitas keman mochiuas tein kijtoua Isaías 33:24, kampa kijtoua ke ejkos tonal keman amo akin kijtos: ‘Nimokokoua’”. Tejuatsin no mitsonyolseuis tikonmatis ke Dios motenkauak maj nikan mochiua “se yankuik taltikpak” kampa “amo aken yoltajyouis ok” (Apocalipsis [Revelación] 21:1, 4). Amo keman tiontayokoyasok nion tikonelnamikisok (Isaías 65:17).