NA LE wena o kile wa ikwa o se sa nyaka go phela? Ge e ba go le bjalo, o tla kwešiša gore Adriana o be a ikwa bjang. O be a swerwe ke bolwetši bja go dula a tshwenyegile moyeng, gomme seo se dira gore a nyame le go felelwa ke tshepo. Adriana o ile a botšwa gore o na le kgateletšego e feteletšego ya monagano.

Ekwa gape ka monna yo mongwe wa kua Japane e lego Kaoru, yoo a bego a hlokometše batswadi ba gagwe bao ba tšofetšego e bile ba babja. O re: “Ka nako yeo, go be go le boima mošomong. Ge nako e dutše e eya, ke ile ka se sa duma dijo e bile ka thatafalelwa le ke go robala. Ke ile ka thoma go nagana gore ge nka ikhwela, ke tla ikhutša mathata a ka moka.”

Monna yo mongwe wa kua Nigeria e lego Ojebode, o re: “Ke be ke dula ke nyamile kudu moo ke bego ke no lla. Ka baka leo, ke ile ka leka go ipolaya.” Sa go thabiša ke gore Ojebode, Kaoru le Adriana ga se ba ka ba ipolaya. Eupša sa go nyamiša ke gore ngwaga o mongwe le o mongwe batho ba bantši ba a ipolaya.

Batho ba bantši bao ba ipolayago ke banna. Ba bantši ba bao ba ipolailego ba dirile seo ka gobane ba ganne go kgopela thušo. Eupša Jesu o itše batho bao ba babjago ba nyaka ngaka. (Luka 5:31) Ge e ba o ikwa o se sa nyaka go phela, hle o se ke wa dikadika go kgopela thušo. Batho ba bantši bao ba nago le kgateletšego ya monagano ba ile ba ya sepetlele gomme ba thušega. Ojebode, Kaoru, le Adriana le bona ba hweditše thušo ya tša kalafo gomme ga bjale ba ikwa ba thabela bophelo.

Dingaka di ka alafa batho bao ba nago le kgateletšego ya monagano ka go no boledišana le bona goba ka go ba fa dihlare, goba tša diriša mekgwa ye ka bobedi. Batho bao ba ka thušwa gape ke ba lapa le bagwera bao ba nago le lerato, bao ba ba kwešišago le bao ba sa ba felelego pelo. Mogwera yo a phalago bagwera ka moka ke Jehofa Modimo, yoo a dirišago Lentšu la gagwe e lego Beibele go re nea thušo e di phalago tšohle.

Gantši kalafo ya batho bao ba nago le kgateletšego ya monagano e ka tšea nako e telele, e bile go ka nyakega gore ba fetoše tsela yeo ba phelago ka yona. Eupša ge e ba o na le bolwetši bjo, o ka ba le tshepo ya go swana le ya Ojebode. Ka ge Modimo a re tshepišitše bophelo bjo bo thabišago nakong e tlago, Ojebode o re: “Ke fela pelo ya go tlo bona seo se ngwadilwego go Jesaya 33:24 se direga. Lengwalo leo le re nakong e tlago mo lefaseng go ka se sa ba le motho yo a rego, ‘Ke a babja.’” Go swana le Ojebode, le wena dula o nagana ka nako ya ge Modimo a tla be a fedišitše “bohloko” mo lefaseng. (Kutollo 21:1, 4) Ka nako yeo, batho ba ka se sa kwa bohloko monaganong le maikwelong. Bohloko le ge le bofe bjo o bo kwago, bo ka se sa ba gona. Beibele e re o ka ‘se sa gopola dilo tšeo di go kwešago bohloko, e bile di ka se sa rotoga pelong ya gago.’—Jesaya 65:17.