XANA u tshame u tikeriwa lerova u navela ku fa? Loko swi ri tano, u yi twisisa kahle ndlela leyi Adriana a titweke ha yona. A karhatiwa hi ku tshama a vilela ni ku tsana ni ku tlhela a titwa a heleriwe hi matimba. Adriana a ri ni ntshikilelo wa mianakanyo.

Xiya xikombiso xa wanuna un’wana wa le Japani la vuriwaka Kaoru, loyi a khathalela vatswari va yena lava vabyaka naswona se a va dyuharile. U ri: “Hi nkarhi wolowo, entirhweni a ndzi tshama ndzi yime hi nenge wun’we naswona sweswo a swi ndzi tshikilela. Mikarhi yin’wana a ndzi twa ndzi nga lavi swakudya naswona vurhongo a byi nga phahi. A ndzi anakanya leswaku a swi ta antswa loko a ndzo namba ndzi tifela.”

Wanuna un’wana wa le Nigeria la vuriwaka Ojebode, u ri: “A ndzi tshama ndzi tsanile, lerova mihloti a yo khuluka kunene kutani a ndzi lava tindlela to tidlaya.” Lexi tsakisaka, Ojebode, Kaoru na Adriana a va tidlayanga. Kambe lembe ni lembe vanhu va madzana ya magidi va tidlaya.

Vo tala lava tidlayaka i vavanuna hikuva va khomiwa hi tingana loko va fanele va kombela ku pfuniwa. Yesu u vule leswaku lava va vabyaka va lava dokodela. (Luka 5:31) Loko u titwa u tshikilelekile, u nga chavi ku kombela ku pfuniwa. Vo tala lava nga ni ntshikilelo wa mianakanyo, vutshunguri byi va pfunile leswaku va kota ku tiyisela. Ojebode, Kaoru na Adriana va pfuniwe hi vutshunguri leswaku va kota ku tiyisela.

Madokodela ma nga ha tirhisa mirhi leswaku ma tshungula vanhu lava nga ni ntshikilelo wa mianakanyo kumbe ma vulavurisana na vona. Lava nga ni ntshikilelo va lava ku seketeriwa ni ku khathaleriwa hi vanghana ni mindyangu ya vona. Munghana lonene ku tlula hinkwavo i Yehovha Xikwembu, loyi a hi khathalelaka hi ku tirhisa Rito rakwe ku nga Bibele.

Hakanyingi vanhu lava nga ni ntshikilelo wa mianakanyo va lava vutshunguri lebyi nga ha tekaka nkarhi wo leha naswona swi nga ha lava leswaku va cinca ndlela leyi a va hanya ha yona. Loko u karhatiwa hi ntshikilelo wa mianakanyo, ku fana na Ojebode, na wena u nga tshama u rindzele vumundzuku lebyinene. U ri: “Ndzi rindzele ku vona loko ku hetiseka tsalwa ra Esaya 33:24, leri profeteke leswaku a ku nge he vi na munhu emisaveni la nga ta ku ‘ndza vabya.’” Ku fana na Ojebode, switshembiso swa Xikwembu mayelana ni “misava leyintshwa,” laha ‘switlhavi’ swi nga ta ka swi nga ha vi kona, swi nga ku chavelela. (Nhlavutelo 21:1, 4) Switshembiso sweswo swi katsa ku herisiwa ka ntshikilelo wa mianakanyo ni wa mintlhaveko. Switlhavi leswi u nga na swona a swi nge he vi kona. Switlhavi leswi u nga na swona “a swi nge tsundzukiwi, hambi embilwini [ya wena] a swi nge ti.”—Esaya 65:17.