NAA no no ḓipfa no tsikeledzea lune ni si tsha ṱoḓa u tshila? Arali zwo ralo, ni nga pfesesa nḓila ye Adriana a ḓipfa ngayo. O sedzana na u vhilaela vhukuma na u ḓipfa o sinyuwa nahone a si tsheena fhulufhelo. O vha e na vhulwadze ha u dzula o sinyuwa.

Dovhani ni ṱhogomele na Kaoru wa Dzhapani we a ṱhogomela vhabebi vhawe vha vhaaluwa vhane vha khou lwala. O ri: “Nga tshenetsho tshifhinga, ndo vha ndo tsikeledzwa vhukuma nga mushumo wa u ḓitshidza. Nga tshiṅwe tshifhinga, ndo vha ndi sa takaleli zwiḽiwa nahone khofhe dzi sa fari. Ndo thoma u humbula uri thaidzo dzanga dzi ḓo fhela arali ndo fa.”

Ojebode wa Nigeria o ri: “Ndo vha ndi tshi dzula ndo sinyuwa lwe zwa vha zwi tshi ita uri ndi lile, nga nṱhani ha zwenezwo, ndo vha ndi tshi ṱoḓa nḓila dza u ḓivhulaya.” Zwi takadzaho ndi uri Ojebode, Kaoru na Adriana a vho ngo ḓivhulaya. Fhedzi ṅwaha muṅwe na muṅwe vhathu vha zwigidi vha a ḓivhulaya.

Vhunzhi ha vhathu vhane vha ḓivhulaya ndi vhanna vhane vhunzhi havho vha shona u humbela thuso. Yesu o ri vhathu vha lwalaho vha ṱoḓa dokotela. (Luka 5:31) Nga zwenezwo, arali ni tshi tsikeledzea lune na humbula u ḓivhulaya, ni songo shona u humbela thuso. Vhathu vhanzhi vhane vha tsikeledzea vho wana uri u shumisa dzilafho zwi a thusa vhukuma. Ojebode, Kaoru na Adriana vho wana thuso kha madokotela nahone zwino vha ḓipfa vhe khwine.

Madokotela vha nga shumisa mishonga kana u amba na mulwadze u itela u mu thusa. Vhane vha lwala vha ṱoḓa u pfelwa vhuṱungu na u sa fhelelwa mbilu nga vha muṱa na dzikhonani. Khonani ya khwine ine na nga vha nayo ndi Yehova ane a ṋea thuso a tshi shumisa Ipfi ḽawe, Bivhili.

Tshiṅwe tshifhinga, vhathu vho tsikeledzeaho vha nga tea u wana thuso ya zwa ngalafho lwa tshifhinga tshilapfu na u ita tshanduko vhutshiloni havho. Fhedzi arali no tsikeledzea, ni nga lavhelela vhumatshelo havhuḓi u fana na Ojebode. O ri: “Ndo lavhelela u vhona u ḓadzea ha Yesaya 33:24 ine ya amba nga ha tshifhinga tshine ha si tsha ḓo vha na ane a ri ‘Ndi a lwala.’” U fana na Ojebode, khwaṱhiswani nga fhulufhedziso ḽa Mudzimu ḽa “ḽifhasi ḽiswa,” hune ha sa ḓo vha na “vhuṱungu.” (Nzumbululo 21:1, 4) Ḽeneḽo fhulufhedziso ḽi katela u fheliswa ha u tsikeledzea. Vhuṱungu vhune na vha naho vhu ḓo fheliswa tshoṱhe. Vhuṱungu vhune na khou vhu pfa ‘a vhu tsha ḓo ḓihwa, na mbiluni yaṋu a vhu tsha ḓo vha hone.’—Yesaya 65:17.