¿YAAN wa kʼiin tsʼoʼok a tuklik maas maʼalob ka kíimkech? Wa beyoʼ ka naʼatik bix u yuʼubikuba Adriana. Letiʼeʼ pʼáat maʼ tu kaxtik baʼax u beete, jach lúub u yóol yéetel tu yuʼubaj minaʼan u biilal u kuxtal. Ka máan kʼiineʼ maaschaj u depresión.

Koʼox ilik xan baʼax úuchtiʼ Kaoru, juntúul máax kajaʼan Japón yéetel tu kanáantaj u taataʼob tsʼoʼok u chʼíijloʼob yéetel jach kʼojaʼanoʼob, letiʼeʼ ku yaʼalik: «Teʼ kʼiinoʼob jeʼeloʼ hasta pʼáat maʼ taak in jaanliʼ mix in weenliʼ. Yoʼolal le baʼaxoʼob ku sen úuchultenoʼ hasta kʼuchen in tukult maas maʼalob ka kíimken».

Ojebode, juntúul máak kajaʼan Nigeriaeʼ, ku yaʼalik: «Mantatsʼ lubaʼan in wóol, tsʼoʼoleʼ jach séeb in wokʼol yoʼolal jeʼel baʼaxakeʼ. Hasta kʼuchen in tukult maas maʼalob ka in luʼs in kuxtal». Le óoxtúul máakoʼob tsʼoʼok k-aʼalikaʼ maʼ tu kíimsubaʼob jeʼex u tuklikoʼob kaʼachoʼ, chéen baʼaleʼ cada añoeʼ kex óoliʼ ochocientos mil máakoʼob ku kíimskubaʼob.

Tsʼoʼok u yilaʼaleʼ maases letiʼe xiiboʼob ku kíimskubaʼoboʼ, tumen suʼlakoʼob u kʼáatoʼob áantaj. Jesúseʼ tu yaʼaleʼ le máaxoʼob kʼojaʼanoʼoboʼ kʼaʼabéet u yáantaʼaloʼob tumen doctor (Lucas 5:31). Le oʼolaleʼ maʼ a suʼlaktal a kʼáat ka áantaʼakech. Yaʼab máaxoʼob yaan depresión tiʼobeʼ tsʼoʼok u chan maʼalobtaloʼob úuchik u beetkoʼob le baʼax ku yaʼalik le doctoroʼoboʼ. Ojebode, Kaoru yéetel Adrianaeʼ tu kaxtoʼob u yáantaj le doctoroʼoboʼ. Bejlaʼeʼ maas maʼalob bix u yuʼubikubaʼob.

Yaan doctoroʼobeʼ jeʼel u tsʼáaikoʼobtech tsʼaakeʼ wa jeʼel u yaʼalikoʼobtech ka a tsikbaltiʼob bix a wuʼuyikaba utiaʼal ka u yiloʼob bix jeʼel u yáantkechoʼobeʼ. Le máaxoʼob yaan depresión tiʼoboʼ kʼaʼabéet u yáantaʼaloʼob yéetel u naʼataʼal bix u yuʼubikubaʼob tumen u láakʼtsiloʼob bey xan u amigoʼob. Minaʼan uláakʼ amigo jeʼex Jéeobaeʼ, letiʼeʼ jach u kʼáat u yáantoʼon le oʼolal u tsʼaamajtoʼon le Bibliaoʼ.

Le máaxoʼob yaan depresión tiʼoboʼ ku bisik tiempo u pʼáatloʼob maʼalobil, tsʼoʼoleʼ yaan jujunpʼéel baʼaxoʼob kʼaʼabéet u beetkoʼob utiaʼal u chan tuʼubultiʼob baʼax uchaʼantiʼob. Maʼ xaaneʼ techeʼ táan a muʼyaj yoʼolal le kʼojaʼanilaʼ, baʼaleʼ yaan baʼaxoʼob maʼalobtak táan u náatsʼal u kʼiinil. Ojebodeeʼ ku yaʼalik: «Jach in kʼáat in wil u béeytal Isaías 33:24, tuʼux ku yaʼalikeʼ ‹mix máak ken u yaʼal: Kʼojaʼanen›». Maʼ xaaneʼ jeʼel u líiʼsik a wóol le baʼax ku yaʼalik u beetik Dios teʼ «túumben luʼum» tuʼux maʼ tun kaʼa antal baʼaxoʼob beetik u «muʼyaj» máak (Apocalipsis 21:1, 4). Tuláakal le baʼaxoʼob beetik a muʼyajoʼ yaan u xuʼulsaʼal yéetel mix bikʼin u kaʼa antaloʼob. Kéen úuchuk lelaʼ hasta maʼ ken a kʼaʼajsoʼob tu kaʼatéen (Isaías 65:17).