LIDAN burí arütíkulu le lubaragiñebei le, ariha wamaali anihein lan burí luriban sügǘ le adügüti lun wasandirun siñá lan woun lidan wabagari. Másiñati hásügürüña lan guentó lídangiñe saragu lénrengunga ani samina humá moun lumuti lan hasigirun abagarida o ua lan ebereseruti hau. Gama lumoun, gayaraati hachoururuni gari lan lun Bungiu larihinün asufurira. Wéiriti lebereserun hau.

Arufudati meha gürigia le abürüdübalin Sálumu kapítulu 86 afiñe lan luagu Bungiu dan labürühanbei: “Wátina buagu lidan nidiheri, ladüga óunaba bumutina” (Sálumu 86:7). Íbini ítara, háfuga álügüdagua humá hungua: “Ida luba lóunabunina Bungiu ‘lidan nidiheri’?”.

Lau sun háfuga lan maranserun lubéi lan Bungiu sun waturóbulin lau lóufudagun, füramaseti líchuguba lan darangilaü woun gayara láamuga wagagibudagun luma waturóbulin. Chóurugüda lumuti Bungiu woun tidan Lererun: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan” (Filipuna 4:6, 7). Akutiha huméi bérusu burí tídangiñeti Lererun Bungiu le, íderagua láamugaün arihei berese lan Bungiu hau.

“Mabulieidunti Bungiu ni aban hádangiñe [dunuru]. [...] Gebegitün sügǘ hau saragu dunuru” (Lúkasi 12:6, 7).

SAMINA HUMÉI LE: Íbini aban liraüraü chichanfé gebegiti lun Bungiu. Ani gebegitimatiña gürigia lun Bungiu sügǘ hau dunuru. Wagía súdinitimabaña lun lídangiñe sun le adüga láalibei ubouagu, lugundun lenege guánarügü ladügawa ani gayaraati wáyeihani luma warufuduni lubuidun burí ligaburi (Agumesehani 1:26, 27).

“Nabureme, ariha báadiwa buidu ani subudi bumutina. [...] Gefentibu luagu le nasaminarubei [...]. Hóuchaguabana, subudibéi nisaminan” (Sálumu 139:1, 2, 23).

SAMINA HUMÉI LE: Subudi lumutün Bungiu. Subudi lumuti ida liña lan hasandiragun hungua luma tidiheri hanigi. Íbini ua lan gunfuranda hamani  amu sun le hasufurirubei, bereseti Bungiu hau ani busenti líderagunün. Ruti lira aban buiti resun hun lun hasigirun abagarida.

“Nabureme, aganbabéi nafurieidun [...]; aganbabána! Óunababana furese dan le nagúarun bun”. Leteniruba Heowá “lun lafurieidun le igirúaalibei” (Sálumu 102:1, 2, 17).

SAMINA HUMÉI LE: Ítara liña kamá hamuga abahüda lumuti Bungiu kada aban lídangiñe águiraü le wiyuhalibei hágurugugiñe sun gürigia lúmagiñe hadügǘniwa (Sálumu 56:8). Íbini giñe háguira, abahüda lumuti. Haritagua lumuti Bungiu sun turobuli le úmabei hagagibudagua luma sun águiraü le ayahuaha humaalibei ladüga weiri lan lebegi lun.

“Manufudedabá au Bubungiutebei. Rútina erei bun, íderagua numutibu. [...] Au le Bubungiute, [...] ariñagaadina bun: ‘Manufudebá, íderagua numutibu’” (Isaíasi 41:10, 13).

SAMINA HUMÉI LE: Busenti Bungiu líderagunün. Anhaün éiguada, líderagubadün iñuragua.

“Wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16).

SAMINA HUMÉI LE: Wéiriti hínsiñe lun Bungiu darí lun líchuguni libagari Hesusu, le Liráü, huagu. Ruti sákürifisiu le chansi hun lun gasuuni lan hibagari luma lun gunda humá lun súnwandan. *