HNENE la itre tane mekun ka ase hë hna amamane la itre jol hne së hna cile kow, nge ka jol troa xomihnin. Ame la epuni a qëmeke kowe la itre jol ka tune lai, tro epuni a isa thel ka hape, ‘Ka nyipiewekë kö la mel?’, maine pena ‘Hetre atr kö ka hane hnimi ni?’ The luelue kö laka, tro Akötresie a xatua epun ngöne la itre jol ka traqa koi epun. Ka tru epuni koi Nyidrë!

Hnene la atre cinyihane la Salamo 86 hna qaja la mejiune i angeic koi Akötresie. Öni angeic: “Ngöne la drai ne aköte ni, tro ni a hë koi cilie ; ke tro cilieti a [sa] koi ni.” (Salamo 86:7) Maine jë tro epuni a hnying, ka hape, ‘Nemene la aqane tro Akötresieti a sa koi ni “ngöne la drai ne aköte ni”?’

Nyipici laka, tha tro kö Akötresie a canga apaatrene la itre jol, ngo Tusi Hmitrötr a amamane ka hape, tro Nyidrëti a hamë së la tingeting matre tro sa atreine xomihni. Öni Tusi Hmitrötr: “The hnehengazo kö, ngo ngöne la nöjei ewekë asë, jëne la itre thith, me xëwe, me thithi ne ole, qaja jë la itre sipo i nyipunie koi Akötresie. . . . tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.” (Filipi 4:6, 7) Hanawang la itre xötr ne Tusi Hmitrötr ka xatua së, me amamane ka hape, Akötresieti a meku së.

“Tha thëthëhmine kö Akötresieti la ala casi thei nyudren [itre sisi] . . . nyipiewekë catre kö nyipunie hune la itre sisi ka nyimutre.” —Luka 12:6, 7.

PANE MEKUNE JË: Tha hnene kö la itre xaa atr hna semesinene la itre waco ka co, tune la itre sisi. Ngo ka tru itre ej koi Akötresie. Öhne asë hi Akötresie la itre waco ka coco catr, nge ka nyipiewekë asë itre ej koi Nyidrë. Ngo, ame koi Akötresie, ka sisitria catre kö la atr hune la itre sisi. Nyine haine la aqane xupe Nyidrëti la atr. Ka sisitria catre kö la atr hune la nöjei hna xup asë. Hnei Nyidrëti hna xupe la atr “hnaiji” Nyidrë, matre ijiji angatr troa xom, me melëne la itre thiina ka lolo i Nyidrë.—Genese 1:26, 27.

“IEHOVA fe, hnei cilieti hna thelethele ni me ate hmekunyi ni . . . cilieti a trotrohnine la mekuneng’ . . . tupathi ni ju, nge atejë la ite mekuneng.”—Salamo 139:1, 2, 23.

PANE MEKUNE JË: Atrepengö së hnyawa hi hnei Akötresie. Pëkö mekune ka sihngödri koi Nyidrë. Maine tha trotrohni së kö hnei itre xan, ngo Akötresieti a meku së, nge Nyidrëti a ajan troa xatua së. Celë hi matre, hetre eloine troa xomihnine la akötr.

‘IEHOVA fe, drenge ju la thithing, nge loi e tro pi koi cilie la treijeng . . . epi drei ni ju ngöne la drai ne akötre ni ; ngöne la drai ne hë ni, saqe jë, sa jë koi ni . . . Hnei nyidrëti hna xei kowe la thithi ne la ka hleuhleu.’—Salamo 102:1, 2, 17.

PANE MEKUNE JË: Qaane lo kola nyiqaane akötr la atr, tha sihngödri kö koi Iehova la itre trenge timidra ne la itre atr. (Salamo 56:8) Kolo mina fe a qaja la itre trenge timidra së. Tha thëthëhmine kö Akötresie la itre jol hne së hna cil kow, memine la itre trenge timidra së. Ka nyipiewekë catre së koi Nyidrë!

“The hlohlo kö, ke ini la Akötesi ’ö ; tro ni a aegöcatenyi ’ö ; he, tro ni a xatua eö . . . ini Iehova Akötesi ’ö . . . ate qaja koi ’ö, ka hape, The qou kö, tro ni a xatua eö.” —Isaia 41:10, 13.

PANE MEKUNE JË: Aja i Akötresie troa xatua së. Maine tro sa kei, tro Nyidrëti lai a amejë së.

“Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.”—Ioane 3:16.

PANE MEKUNE JË: Pine laka, ka nyipiewekë epun koi Akötresie, hnei Nyidrëti hna up la nekö i Nyidrë, ene Iesu matre troa mec thatraqai epun. Jëne la mele hna huujën hnei Iesu, ijiji epuni hi troa hane mele madrin, me mele ka loi epine palua. *