DEN ARTIKEL a fesi taki fu wantu sani di e meke a libi taanga gi sama. Te i pakisei den booko-ede fi i, kande yu e akisi iseefi efu a de fanowdu fi i libi ete. Kande yu e akisi iseefi tu efu sama de di e booko den ede anga i. I sa biibi taki Gadu e booko en ede anga i. A lobi i.

Den sani di a sama di sikiifi Psalm 86 taki e soi taki a be e fitoow Gadu. A sikiifi taki: „Te mi de a nowtu a yu mi e kai, bika mi sabi taki yu o piki mi” (Psalm 86:7). Kande yu e pakisei taki: ’Fa Gadu o piki mi „te mi de a nowtu”?’

Kande Gadu ná o puu den polobelema fu u wanten, ma Beibel taki Gadu e yeepi u fu fii moo bun te nowtu e miti u. A taki: „Wi á mu booko wi ede anga nawan sani, ma taigi Gadu ala sani te wi e begi. Gi en daa, begi en fayafaya. Da a freide fu Gadu di libisama á poi fusutan o kibii wi ati anga u fusutan” (Filipisama 4:6, 7). Gaantangi luku fa den tekisi di kai a ondoo ya e soi fa Gadu e toosutu u.

„Gadu nai feegete nawan [pikin foo]. . . . I pelensipali moo tyaipi pikin foo.”​—Lukasi 12:6, 7.

PAKISEI A SANI YA: Somen sama nai booko den ede anga pikin foo, ma toku Gadu e booko en ede anga den. Ai poti pakisei na ala den pikin foo, bika neen meke den. Ma libisama pelensipali gi Gadu moo tyaipi pikin foo. Fu ala den sani di Gadu meke a goontapu, a libisama na a moo pelensipali wan. A meke u „enke fa enseefi de”. U man abi denseefi manii fu Gadu.​—Genesesi 1:26, 27.

„Yehofa yu ondoosuku mi. I sabi mi. . . . I sabi san mi e pakisei . . . Ondoosuku mi finifini fi i sa sabi san e gi mi booko-ede.”​—Psalm 139:1, 2, 23.

PAKISEI A SANI YA: Gadu sabi i bun. A sabi san de dipi aini yu ati. A sabi san e meke yu e booko yu ede. Kande sama nai fusutan yu, ma Gadu e booko en ede anga i. A wani yeepi i. A fu a sani ya ede yu á mu wani dede.

„Yehofa, gaantangi, aliki fa mi e begi i. Aliki mi te mi e suku yeepi a yu baa. . . . Gaantangi aliki mi. Ná daaidaai fu piki mi te mi kai i. . . . A ná o meke sani anga den te den begi en.”​—Psalm 102:1, 2, 17.

PAKISEI A SANI YA: Yehofa e si ala den wataa-ain fu wan sama di e kee fu di sani e moo en (Psalm 56:8). Ai si a wataa-ain fi i tu. Gadu lobi i neen meke noiti ai feegete san e miti i.

„Ná feele, bika mi de anga i. Ná booko yu ede, bika a mi a yu Gadu. Mi o meke yu abi deki-ati, mi o yeepi i. . . . Mi Yehofa, i Gadu, . . . taigi i taki: ’Ná feele. Mi o yeepi i.’”​—Yesaya 41:10, 13.

PAKISEI A SANI YA: Gadu de kabakaba fu yeepi i. A o yeepi i fu pasa a taanga ten di i de aini.

„Gadu be lobi goontapu te, neen meke a sende a wan kodo Manpikin fi en kon, fu meke den sama di e biibi en á dede, ma den mu fende a libi fu teego.”​—Yohanisi 3:16.

PAKISEI A SANI YA: Gadu lobi i te neen a sende en Manpikin Yesesi fu kon dede gi i. A dede fu Yesesi e gi wi a okasi fu libi fu teego, wan libi pe wi o de koloku. *