NI KAONGORA ake imwain aei ao e oti iai bwa e kona n taraa ni kangaanga maiura aei mani baika kauruakinano aika kakaokoro. N am tai ni kekeiaki n rawawatam ao ko bae n iaiangoia bwa e manena te maiu aei ke tao iai ae tabeakiniko ke akea. Karaua nanom bwa e bon tabeakina rawawatam te Atua. Ko rangi ni kakawaki irouna.

E kaota onimakinan te Atua te tia korea Taian Areru 86, ni kangai: “I weteiko ni bongin rawawatau, bwa ko na boni kaekaai.” (Taian Areru 86:7) Ma ko bae n iango ni kangai: ‘E na kangaa te Atua ni kaekaai “ni bongin rawawatau”?’

E ngae ngke e na aki katoki am kangaanga te Atua ngkai naba, ma e karaua nanom ana Taeka ae te Baibara, bwa E na anganiko te raunnano, bwa ko aonga ni kekeiaki n am kangaanga, ngke e kangai: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi, ao te rau are mairoun te Atua ae riaon aia iango aomata, e na kawakin nanomi ma ami iango.” (I-Biribi 4:​6, 7) Taiaoka noria bwa a kangaa kibun te Baibara aikai ni karaui nanora bwa e bon tabeakinira te Atua.

“Ma e na bon aki tarariaoaki temanna i buakoia [tibaaro aikai] iroun te Atua. . . . kam kakawaki riki nakoia tibaaro aika mwaiti.”​—Ruka 12:​6, 7, te kabwarabwara mai nano.

IANGOA AEI: A bon tabeakinaki iroun te Atua mannikiba aika taraa n aki kakawaki aikai irouia aomata. Akea te tibaaro temanna ae uarereke ae e tarariaoaki iroun te Atua, bwa bon ana karikibwai aika rangi ni kakawaki. A rangi ni kakawaki riki aomata iroun te Atua nakoia tibaaro. Aomata bon ana karikibwai aika rianako te Atua n te aonnaba. A karikaki n ‘ai arona’ ao a kona ni karikirakei ao ni kaotiotii aroaron te Atua aika raraoi.​—Karikani Bwaai 1:​26, 27.

“Ko a tia n nenerai ngkoe ae Iehova, ao ko ataai. . . . Ko atai au iango . . . Tuoai ao atai tabeaiangan au iango.”​—Taian Areru 139:​1, 2, 23.

IANGOA AEI: E kinako raoi te Atua. E atai am namakin aika raba ma tabeaiangam. Ngkana tao a aki ota tabemwaang n am kangaanga ma raraomam, ma e tabeakiniko te Atua ao e kani buokiko. Anne bukina ngkai e manena maiura aei.

“Ongo n au tataro, ngkoe ae Iehova, ke e roko iroum tangiu ni kani buokaki. . . . Katanimaia taningam nakoiu, ao bareiko ni kaekaai ngkana I wewete. . . . E na mutiakin aia tataro akana maiu ni kainnano.”​—Taian Areru 102:​1, 2, 17.

IANGOA AEI: Kaanga ai aron ae e tataua mwin rannimataia aomata Iehova, man te tai are a moan rawawata iai. (Taian Areru 56:8) Ao n ikotaki naba ma rannimatam. E uringi kataakim nako te Atua ma rannimatam, ibukina bwa ko rangi ni kakawaki irouna.

“Tai raraoma bwa bon Atuam ngai. N na kakorakorako, eng, N na buokiko. . . . Ngai ae Iehova ae Atuam, are . . . kangai nakoim, ‘Tai maaku. N na buokiko.’”​—Itaia 41:​10, 13.

IANGOA AEI: E tauraoi te Atua ni buokiko. Ngkana ko bwaka e na manga kateirakeko.

“E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane e onimakinna, ma e na reke irouna te maiu are aki toki.”​—Ioane 3:16.

IANGOA AEI: Ko rangi n tangiraki iroun te Atua bwa e kukurei n anga Natina ae Iesu, bwa te karea ibukim. Aei te karea ae anganiko te kantaninga ae raoiroi ae te maiu ae kakukurei ma ni manena n aki toki. *