COV uas peb nyeem hauv phau ntawv no qhia tias thaum peb ntsib kev nyuaj siab loj, yuav ua rau peb xav tias tsis tsim nyog ua neej nyob lawm. Thaum koj muaj kev nyuaj siab tej zaum koj kuj xav ib yam li lawv thiab, lossis xav tias tsis muaj leejtwg hlub tshua koj. Tiamsis nco ntsoov tias Vajtswv mob siab koj thiab paub koj tej kev nyuaj siab. Koj txojsia muaj nqe heev rau nws.

Tus sau Ntawv Nkauj 86 tso siab heev rau Vajtswv. Nws hais tias: “Hnub kuv raug txom nyem ceeblaj kuv thov hu koj vim koj yeej yuav teb kuv.” (Ntawv Nkauj 86:7) Tiamsis tej zaum koj yuav xav tias, ‘“Hnub kuv raug txom nyem ceeblaj” Vajtswv yuav teb kuv li cas?’

Tej zaum Vajtswv yuav tsis tshem koj tej kev nyuaj siab mus tamsid. Tiamsis phau Vajlugkub qhia tias nws yuav pub koj muaj lub siab tus, lossis pub koj muaj lub siab kaj koj thiaj thev taus. Vajtswv Txojlus hais tias: “Tsis txhob txhawj rau ib yam dabtsi, tiamsis cia li taij thiab thov thiab ua Vajtswv tsaug qhia txhua yam uas koj cheem tsum rau nws paub. Mas Vajtswv txojkev siab tus uas ntau dhau li neeg nkag siab tau yuav tsom kwm nej lub siab thiab nej tej kev xav.” (Filipi 4:6, 7) Cia peb saib cov nqe Vajlugkub nram no uas qhia tias Vajtswv yeej mob siab peb tiag.

“Tsis muaj ib tug noog uas Vajtswv yuav tsis nco qab li. . . . Nej tsim txiaj dua ntau tus noog tsev.”​—Luka 12:6, 7.

NCO NTSOOV LI NO: Tej nyuag noog tsev uas tibneeg saib tsis muaj nqes li los Vajtswv saib ntsoov. Tsis muaj ib tug uas nws yuav tsis nco thiab tsis khuvxim li. Tiamsis Vajtswv saib tibneeg muaj nqe tshaj. Tag nrho tej uas Vajtswv tau tsim hauv qab ntuj no, tsis muaj ib yam dabtsi zoo li tibneeg. Vajtswv tsim tibneeg raws li nws tus “yam ntxwv,” tibneeg thiaj xyaum tau Vajtswv tej yeeb yam zoo.​—Chiv Keeb 1:26, 27.

“Au Yehauvas, koj twb tshuaj saib kuv, thiab paub kuv zoo. . . . Koj yeej paub tej uas kuv xav. . . . Thov sim kuv thiab paub tej uas kuv xav.”​—Ntawv Nkauj 139:1, 2, 23.

NCO NTSOOV LI NO: Tej uas koj xav twjywm hauv nruab siab los Vajtswv paub tibsi. Txawm lwm tus tsis paub koj tej kev nyuaj siab los, Vajtswv mob siab koj thiab xav pab koj. Yog li ntawd, yeej tsim nyog koj ua neej nyob.

‘Au Yehauvas, thov mloog kuv tej lus thov, thov cia kuv lub suab quaj tuaj txog koj. . . . Thov tig ntsej mloog kuv, thov teb kuv sai sai rau hnub uas kuv quaj thov koj. . . . Nws yuav saib hlob cov pluag uas tsis muaj ib yam dabtsi tej lus thov.’​—Ntawv Nkauj 102:1, 2, 17.

NCO NTSOOV LI NO: Txij thaum tibneeg pib raug kev txom nyem los, cuag li Yehauvas khaws tibneeg txhua ncos kua muag cia. (Ntawv Nkauj 56:8) Nws kuj khaws koj tej kua muag cia thiab. Vajtswv yeej nco ntsoov peb tej kev nyuaj siab vim nws saib peb rau nqe heev.

‘Tsis txhob poob siab vim kuv yog koj tus Vajtswv. Kuv yuav pub zog rau koj, . . . kuv uas yog koj tus Vajtswv Yehauvas . . . yog tus uas hais rau koj tias, Tsis txhob ntshai, kuv yuav pab koj.’​—Yaxaya 41:10, 13.

NCO NTSOOV LI NO: Vajtswv yeej saib ntsoov thiab xav pab koj. Yog koj ntog lawd, nws yuav tsa koj sawv.

“Vajtswv hlub ntiajteb kawg li nws thiaj pub nws tib leej Tub los kom txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg.”​—Yauhas 3:16.

NCO NTSOOV LI NO: Koj muaj nqes tshaj plaws rau Vajtswv, nws thiaj zoo siab hlo tso nws Leej Tub Yexus los tuag txhiv koj txojsia. Twb yog muaj tus nqe txhiv no, koj thiaj muaj kev vam tias yuav tau lub neej kaj siab lug mus ib txhis. a