OTUPA tu twa kapita twa raisa ovitjitwa ovivi mbya tjitwa mehupo rovandu mbi tjita kutja ehupo ririre ezeu. Otja tji mo tjindi omauzeu woye, ove mape ya o utu okuripura kutja hapo ohepero okuhupa, poo kutja nandarire pe nomundu ngu rikendera kove. Nungwari tjiwa kutja Mukuru tjiri u rikendera komauzeu woye. Ove oove otjihuze ku Ye.

Omutjange wEpsalme 86, wa raisa ongamburiro mu Mukuru indu tja tja: “Meyuva rombamisiro yandje me ku kOve, orondu Ove mo ndji zuvire.” (Epsalme 86:7) Ove mape ya oripura kutja, ‘Hapo Mukuru me ndji zuvire vi “meyuva rombamisiro yandje”?’

Nandarire kutja Mukuru kamaisapo omauzeu woye tjimanga, Embo re, Ombeibela, ri raisa kutja eye ma yenene okukupa ohange kutja u tjinde omauzeu woye. Oro ri tja: “Amu rikendere otjiṋa, nungwari mozongumbiro zeṋu azehe ningireye ku Ndjambi imbi mbi mwa hepa, aruhe amamu tja okuhepa ku Ye. Nohange ya Ndjambi ndja kapita ozondunge azehe zovandu mai ṱakamisa omitima vyeṋu nouripura weṋu.” (Ovafilipi 4:6, 7) Arikana tara komazeva ngu maye kongorere mba, ngu maye raisa kutja tjiri Mukuru u rikendera kweṱe.

“Kape na nangarire imwe yazo ndji zembwa i Ndjambi. . . . Oweṋe ovananḓengu tjinene pozondjandja ozengi!”​—Lukas 12:6, 7.

RIPURIRA KU IMBI: Ouzera ouṱiṱi tjimuna ozondjandja ka ze varwa otjoviṋa ovinanḓengu kovandu ovengi, posi yokutja Mukuru u rikendera ku zo. Mukuru u muna ouzera ouṱiṱi mbo, akehe kourike wa ko okananḓengu ku Ye. Ovandu ovananḓengu ku Mukuru tjinene kombanda yozondjandja. Owo, orupa rwapeke moviutwa vya Mukuru vyokombanda yehi, owo va ungurwa “kosaneno” ya Mukuru nu ve yenena okuraisa ovikaṋena oviwa vya Mukuru.​—Genesis 1:26, 27.

“Muhona, Ove we ndji konḓonona nu we ndji tjiwa . . . u tjiwa ourizemburuka wandje . . . Ndji konḓonona, Ndjambi, nu u tjiwe omeripura wandje!”​—Epsalme 139:1, 2, 23.

RIPURIRA KU IMBI: Mukuru u ku tjiwa nawa. Eye u tjiwa ongaro mu u ri nozongendo zoye. Nandarire kutja varwe kave nokuzuva nawa omauzeu woye nozongendo zoye, Mukuru u nakonatja na ove nu u vanga okukuvatera. Mena ranao ounahepero kove okukayenda komurungu okuhupa.

“Puratena kongumbiro yandje, Muhona, nu u zuvire ondjuriro yandje. . . . Puratena ku ami, nu u hakahane okundjizuvira tji me ku kOve. . . . Eye ma zuvire otjiwaṋa tje tji tja imbirahiwa.”​—Epsalme 102:1, 2, 17.

RIPURIRA KU IMBI: Jehova u muna omahoze ovandu ngu ve rira mena romauzeu ngu ve muna. (Epsalme 56:8) Ihi matji kamburire mo omahoze woye. Mukuru u zemburuka omauzeu woye ayehe nomahoze woye, orundu ove oove otjihuze ku Ye.

“O tira, Ami mbi ri puna ove! OwAmi Ndjambi woye, o urumisiwa i otjiṋa! Me ku zeuparisa, nu me ku vatere . . . OwAmi Muhona, Ndjambi woye; me ku zeuparisa ne tja: ‘O tira, Ami me ku vatere.’”​—Jesaja 41:10, 13.

RIPURIRA KU IMBI: Mukukuru u ri mbo okukuvatera. Indu tji wa u me ku sekamisa.

“Orondu Ndjambi wa suverere ouye tjinene nai nga tja yandja Omuna we omukwatwaerike, kokutja auhe ngu ma kambura mu Ye a ha pandjara, nungwari a kare nomuinyo waaruhe.”​—Johanes 3:16.

RIPURIRA KU IMBI: Ove oove omusuverwa ku Mukuru tjinene nga tja yandja Omuna we, Jesus, kutja ma rire ombunguhiro mena roye. Ombunguhiro ndji i ku pa omaundjiro wokukahupa ehupo eṋingandu nga aruhe. a