IPASINGAN na nappasa ira nga artikulo nu kunnasi nga mamazziga i nadduruma ira nga marake nga mesissimmu. Ta pagattattammu ta personal ira nga problemam, awayyana nga manono mu nu egga kari i serbi na pattolay onu egga kari i mangiddu nikaw. Makasiguradu ka nga ammu na Dios i pazziga-riga mu. Nabala-balor ka nisa.

Kinagi na nattura ta Salmo 86 i pattalona ta Dios: “Ta tiempo na ziga ay sikaw i agalak-ku, ta i pakimallo ku ira ay tabbagam-mu.” (Salmo 86:7) Ngem baka manono mu, ‘Kunnasinà tabbagan na Dios “ta tiempo na ziga”?’

Maski nu ari insigida solban na Dios i problemam ira, ipasiguradu na Uvovugna, i Biblia, nga iddan naka tu memammo nga nono tapenu makapagattam ka: “Arian nu nga kavurungan i anni laman nga gannug. Ngem ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.” (Filipos 4:6, 7) Ikonsidera nu kunnasi ipasiguradu na tumunug ira nga teksto ta Biblia nga ikavurungan ittam na Dios.

“Ni tadday [ta mammanu i] pagurayan na Dios. . . . Mangina kamu anne ta napakaru nga mammanu.”​—Lucas 12:6, 7.

NONOPAMMU: Gittana awan tu kwenta na mammanu ta karuan nga totolay, ngem importante ira ta Dios. Masingi-singan na Dios i kada tadday nga mammanu; importante i ngamin nga pinaratuna. Mas nabala-balor ta Dios i totolay anne ta mammanu ira. I totolay i pinaka-extraordinariu nga pinaratu na Dios ta davvun. Naparo ira ta “imahe” na Dios anna awayyada mapeggan anna ipasingan i makasta ira nga kualidadna.​—Genesis 1:26, 27.

“Inusito mà ta mapia, O AFU, ay ammum i kononaggak-ku! . . . Ammum ngamin i egga ta nono ku . . . Puruebam-mà tapenu kannammuam-mu nu kunnasi i appana-panono ku!”​—Salmo 139:1, 2, 23.

NONOPAMMU: Ammammu naka na Dios. Ammuna i mataga-tageno anna pakavurungammu ira. Maski nu ari matindian na tanakuan i mariga nga situasiommu, ikavurungan naka na Dios anna kayà naka uffunan. Megafu taw, egga i serbi na pattolem.

“Kari tu tangngagam-mu i pakimallo ku, O AFU, anna ginnam-mu i pakkiddò tu uffum-mu! . . . Ginnam-mà, ay nu et-taka agalan, kari tu pabittam-mu i tubbag niakan! . . . Tangngagan na noka i totolay nga napagurayan.”​—Salmo 102:1, 2, 17.

NONOPAMMU: Masingi-singan ni Jehova i kada pattangi na totolay megafu ta pazziga-rigada. (Salmo 56:8) Nelagum ngana i pattangi mu. Manono na Dios i ngamin nga problemam anna pattangi mu megafu ta nabalor ka nisa.

“Ari ka nga mavurung, ta sakan i Dios mu. Patuyaggattaka, wan, uffunattaka . . . Sakan, si Jehova nga Dios mu, . . . i tadday nga makkakkagi nikaw, ‘Ari ka maganassing. Uffunattaka.’”​—Isaias 41:10, 13.

NONOPAMMU: Sigga-paran i Dios nga manguffun nikaw. Nu matomba ka, pataddaggan naka.

“Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”​—Juan 3:16.

NONOPAMMU: Iddeddukan naka na Dios yatun tu nisakrifisiona i Anana nga si Jesus para nikaw. Megafu taw nga sakrifisio, egga iddanamam nga mattolay tu mannanayun nga magayayya anna egga gakkagna. *