IPAKITA dagiti immun-una nga artikulo a kasla nagrigat ti agibtur gapu iti nadumaduma a nakalkaldaang a pasamak iti biag. Bayat nga ib-ibturam dagiti personal a problemam, mabalin a pampanunotem no adda met la kadi serserbi ti biag wenno adda met la ngata mangipatpateg kenka. Masiguradom a makitkita ti Dios ti pakarigatam. Napategka kenkuana.

Inyebkas ti nangisurat iti Salmo 86 ti panagtalekna iti Dios: “Umawagak kenka iti tiempo ti panagrigatko, ta sigurado a sungbatannakto.” (Salmo 86:7) Ngem mabalin a pampanunotem, ‘Kasano a sungbatannak ti Dios “iti tiempo ti panagrigatko”?’

Uray no saan a dagus a pukawen ti Dios dagiti problemam, ipasigurado kenka ti Saona, ti Biblia, a maikkannaka iti talna ti panunot a makatulong kenka nga agibtur: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman; ket ti talna ti Dios a mangartap iti amin a pannakaawat salaknibannanto ti puso ken isipyo.” (Filipos 4:6, 7) Pangngaasim ta kitaem no kasano nga ipasigurado dagiti sumaganad a bersikulo ti Biblia a talaga nga ipatpategnatayo ti Dios.

“Saan a baybay-an ti Dios ti uray maysa [a billit-tuleng]. . . . Napatpategkayo ngem iti adu a billit-tuleng.”​—Lucas 12:6, 7, footnote.

PANUNOTEM: Para iti adu, kasla saan a napateg dagiti babassit a billit a kas iti billit-tuleng, ngem napategda iti Dios. Awan ti uray maysa kadakuada ti saan a makita ti Dios; ipatpategna ti tunggal sibibiag a parsuana. Para iti Dios, adayo a napatpateg ti tattao ta isuda ti naisangsangayan a pinarsuana ditoy daga kas “kaladladawanna.” Kabaelanda a patanoren ken tuladen dagiti nagsayaat a kualidadna.—Genesis 1:26, 27.

“O Jehova, sinukimatnak, ket am-ammonak. . . . Mailasinmo dagiti pampanunotko . . . Usigennak ken ammuem ti madandanagan a pampanunotko.”​—Salmo 139:1, 2, 23.

PANUNOTEM: Am-ammonaka la unay ti Dios. Ammona ti adda iti kaunggan ti pusom ken dagiti pakadanagam. Nupay di maawatan ti dadduma ti narigat a kasasaadmo, ipatpategnaka ti Dios ket kayatnaka a tulongan. Gapu iti dayta, adda serserbi ti biagmo.

“O Jehova, denggem ti kararagko; dumanon koma kenka ti panagpakaasik iti tulongmo. . . . Iyasidegmo ta lapayagmo kaniak; darasem koma a sungbatan ti panagpatulongko. . . . Ipangagnanto ti kararag dagidiay awan mabalbalinna.”​—Salmo 102:1, 2, 17.

PANUNOTEM: Idi rugrugi pay laeng ti panagrigat ti tattao, arigna ur-urnongenen ni Jehova ti tunggal lua dagiti tattao. (Salmo 56:8) Karamanen kadagita dagiti luam. Malagip ti Dios ti amin a suot ken luluam gapu ta napategka kenkuana.

“Dika madanagan, ta siak ti Diosmo. Patibkerenkanto, wen, tulongankanto . . . Siak, ni Jehova a Diosmo . . . Daydiay mangibagbaga kenka, ‘Dika agbuteng. Tulongankanto.’”​—Isaias 41:10, 13.

PANUNOTEM: Sisasagana ti Dios a tumulong kenka. No matumbaka, bangonennaka.

“Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.”—Juan 3:16.

PANUNOTEM: Nakapatpategka iti Dios nga uray la situtulok nga intedna para kenka ti Anakna a ni Jesus kas maysa a sakripisio. Gapu iti daytoy a sakripisio, maaddaan iti direksion ti biagmo ken makapagbiagka a siraragsak iti agnanayon. a