IZOẸME nọ e vrẹ na i dhesẹ epanọ oghẹrẹ ebẹbẹ sa-sa e sai ro ru akpọ bẹ omai. Nọ who bi thihakọ ẹbẹbẹ ra na, whọ sai roro nọ ohwo ọvo ọ be daezọ ra ha, hayo inọ o mai woma re who whu. Jọ u mu owhẹ ẹro nọ Ọghẹnẹ ọ be daezọ ra. Whọ rrọ ghaghae kẹe.

Ohwo nọ o kere Olezi 86 na o dhesẹ nọ o fievahọ Ọghẹnẹ nọ ọ ta nọ: “Me re bo se owhẹ evaọ oke idhọvẹ mẹ, keme who ti yo kẹ omẹ.” (Olezi 86:7) Rekọ whọ sai roro nọ, ‘Ẹvẹ Ọghẹnẹ o ti ro yo kẹ omẹ “evaọ oke idhọvẹ mẹ”?’

Dede nọ Ọghẹnẹ ọ te nwani ku ebẹbẹ mai họ idudhe he, Ebaibol na ọ kẹ omai imuẹro nọ Ọghẹnẹ ọ rẹ sai ru udu kie omai vi re ma sai thihakọ ẹbẹbẹ na. Ebaibol na ọ ta nọ: “Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai gbe eware nọ wha bi roro.” (Ahwo Filipai 4:6, 7, ẹme-oruvẹ) Joma ta kpahe epanọ eria ikere nọ e rrọ obotọ na e rọ kẹ omai imuẹro inọ Ọghẹnẹ ọ be ginẹ daezọ mai.

“Ọghẹnẹ o re gbolaro kẹ [omuedi] ọvuọvo [ho]. . . Wha ghare vi imuedi buobu.”—Luk 12:6, 7, ẹme-oruvẹ.

RORO KPAHE ONANA: Ọghẹnẹ ọ be daezọ evra esese gheghe nọ ahwo a re rri vo. Ọghẹnẹ o bi muẹrohọ omuedi ọsese kpobi; omuedi kpobi yọ omama nọ o rrọ ghaghae kẹe. Ahwo-akpọ a rrọ ghaghae kẹ Ọghẹnẹ vi imuedi kpekufiẹ. Ahwo-akpọ a mai wuzou evaọ emama Ọghẹnẹ nọ e rrọ otọakpọ. Ọghẹnẹ ọ ma ahwo-akpọ evaọ “uwoho” riẹ, yọ a rẹ sai wo je dhesẹ ọkpọ obọdẹ iruemu nọ ọyomariẹ o wo.​—Emuhọ 1:26, 27.

“O Jihova, whọ kiẹ omẹ riwi ziezi no, yọ whọ riẹ omẹ. . . . [Who] vuhu iroro mẹ mu  . . . Kiẹ omẹ riwi ziezi re whọ riẹ iroro nọ e be kẹ omẹ uye.”​—Olezi 139:1, 2, 23.

RORO KPAHE ONANA: Ọghẹnẹ ọ riẹ owhẹ ziezi. Ọ riẹ iroro nọ e rrọ owhẹ eva gbe eware nọ e be kẹ owhẹ uye. Dede nọ amọfa a sai wo otoriẹ idhọvẹ gbe awaọruọ ra ha, Ọghẹnẹ ọ be daezọ ra yọ ọ gwọlọ fiobọhọ kẹ owhẹ. Fikiere, jọ akpọ ọ bẹ owhẹ no ho.

“O Jihova, yo olẹ mẹ; jọ ubo mẹ kẹ obufihọ u te owhẹ oma. . . . Fi ezọ ra hotọ kẹ omẹ; yo kẹ omẹ ovẹrẹ nọ me te bo se owhẹ. . . . Ọ te kezọ kẹ olẹ enọ ọbẹwẹ ọ rrọ oma.”​—Olezi 102:1, 2, 17.

RORO KPAHE ONANA: O wọhọ nọ anwẹnọ ahwo-akpọ a be rọ ruẹ uye no emuhọ ze, Jihova o bi muẹrohọ je kere irui-oviẹ kpobi nọ ahwo-akpọ a viẹ no fiki uye-oruẹ fihotọ. (Olezi 56:8) Onana u kugbe irui-oviẹ ra re. Jihova ọ kareghẹhọ ebẹbẹ gbe irui-oviẹ ra kpobi keme whọ rrọ ghaghae kẹe.

“Whọ ruawa ha, keme mẹ họ Ọghẹnẹ ra. Me ti ru owhẹ ga, ẹhẹ, me ti fiobọhọ kẹ owhẹ . . . Mẹ Jihova Ọghẹnẹ ra, [mẹ] be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’”​—Aizaya 41:10, 13.

RORO KPAHE ONANA: Ọghẹnẹ ọ gwọlọ fiobọhọ kẹ owhẹ. Who te kie, ọ te kpare owhẹ kpama.

“Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”​—Jọn 3:16.

RORO KPAHE ONANA: Whọ rrọ ghaghae kẹ Ọghẹnẹ gaga, te epanọ o ro siobọno Ọmọ riẹ re o whu fiki ra. Uwhu Ọmọ riẹ na u rovie uvẹ fihọ kẹ owhẹ nọ whọ sae rọ rria otọakpọ na bẹdẹ bẹdẹ avọ evawere. *