VATE NZIKA, Ve Vata wa Kũendeea Kwĩkala Thayũ
ILUNGU ila syavĩta nĩsyonanĩtye ũndũ maũndũ maito ala matũkwataa matonya kũtuma twĩw’a vate vata wa kũendeea kwĩkala thayũ. O ũendeee kũmĩanĩsya na mathĩna maku, mavinda angĩ no wone vate vata wa kwĩkala thayũ kana ũkona ta vate mũndũ ũkũthĩnĩkĩaa. Ĩndĩ ĩthĩwa na mũĩkĩĩo vyũ kana Ngai nũkũthĩnĩkĩaa. Wĩ wa vata mũno methonĩ make.
Mũandĩki wa Savuli 86 nĩwoonanisye vyũ kana nĩwamũĩkĩĩe Ngai. Aisye atĩĩ: “Mũthenya wa thĩna wakwa ngakwĩkaĩla; nũndũ ũkanzũngĩa.” (Savuli 86:7) No wĩkũlye-ĩ, ‘We Ngai akanzũngĩa ata “mũthenya wa thĩna wakwa”?’
O na kau ti lasima Ngai akaũvetea mathĩna maku vau kwa vau, Ndeto yake, Mbivilia, nĩkũĩkĩĩthĩtye kana no aũnenge mũuo wa ngoo nĩ kana wũmĩĩsye mathĩna. Mbivilia yaĩtye atĩĩ: “Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanw’e kwa Ngai kwĩsĩla mboya, o vamwe na kwĩsũvana na kũtũnga mũvea; na mũuo wa Ngai ũla ũvĩtũkĩte ũmanyi w’onthe ũkasũvĩaa ngoo syenyu na ilĩko syenyu.” (Avilivi 4:6, 7) Kwaekai twone ũndũ mĩsoa ĩno yĩatĩĩe ĩtũĩkĩĩthĩtye kana Ngai nũtũthĩnĩkĩaa.
Ngai Nũkũthĩnĩkĩaa
“Vaiĩ [kasũni] Ngai wũlawa nĩko. . . . Mwĩ ma vata mũno kwĩ tũsũni twingĩ.”—Luka 12:6, 7.
KWASŨANĨA ŨNDŨ ŨŨ: Tũsũni tũnini nĩtũtonya kwoneka tũte twa vata nĩ andũ aingĩ, ĩndĩ Ngai nĩwonaa twĩ twa vata. Vaiĩ kamwe ka tũsũni tũu tũnini Ngai wĩthĩawa atakesĩ, tw’onthe nĩ twa vata vyũ methonĩ make. Ĩndĩ andũ nĩmo ma vata mũno methonĩ ma Ngai kwĩ tũsũni tũu. Nĩmo ma vata vyũ katĩ wa syĩndũ ila Ngai woombie ĩũlũ wa nthĩ. Ngai amombie na “mũvw’ano” wake na kwoou me na ũtonyi wa kwonany’a ndaĩa syake.—Mwambĩlĩlyo 1:26, 27.
“Ame Yeova, nĩwĩnguũĩte, na ũkamanya nyie. . . . Nũmanyaa ũsũanĩo wakwa . . . Ndata, na manya mosũanĩo makwa.”—Savuli 139:1, 2, 23.
KWASŨANĨA ŨNDŨ ŨŨ: Ngai nũkwĩsĩ nesa. Nĩwĩsĩ maũndũ ala matamanyĩka nĩ andũ angĩ, namo nĩ ũndũ ũkwĩw’a na mosũanĩo maku. O na kau andũ angĩ nĩmatonya kũlea kũmanya mathĩna maku na mawĩmakĩo maku, Ngai nũkũthĩnĩkĩaa na nĩwendaa kũũtethya. Kwoou, ve kĩtumi kĩseo kya kũendeea kwĩthĩwa thayũ.
Wĩ wa Vata Mũno Methonĩ ma Ngai
“Ĩw’a mboya yakwa, ame Yeova, na kĩĩo kyakwa nĩkĩvike vala ũĩ. . . . Tea kũtũ kwaku; mũthenya ũla nĩkaya wĩnzũngĩa mĩtũkĩ. . . . Nĩwĩtĩkĩlaa mboya ya ngya.”—Savuli 102:1, 2, 17.
KWASŨANĨA ŨNDŨ ŨŨ: Kuma yĩla mũndũ wambĩĩie kũthĩna, no twasye kana Yeova no ta wĩthĩĩtwe ayĩandĩka methoi onthe ala andũ maĩaa. (Savuli 56:8) Methoi amwe Yeova ũandĩkaa nĩ ala maku mwene. Ngai nũlilikanaa mathĩna maku na methoi maku onthe nũndũ wĩ wa vata mũno methonĩ make.
“Ndũkakĩe, nũndũ nĩ vamwe naku; ndũkateve, nũndũ nyie nĩ Ngai waku; ngakwĩkĩa vinya; ĩĩ, ngakũtethya; . . . Nyie, Yeova Ngai waku, . . . [nĩkwĩa,] Ndũkakĩe; ngakũtethya.” —Isaia 41:10, 13.
KWASŨANĨA ŨNDŨ ŨŨ: Ngai nĩwĩyũmbanĩtye kũũtetheesya na wavalũka, akakũkĩlya.
Ve Wĩkwatyo Mũseo wa Ĩvinda Yũkĩte
“Ngai nĩwendete nthĩ mũno, nĩwanenganie Mwana wake e ũmwe, nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.”—Yoana 3:16.
KWASŨANĨA ŨNDŨ ŨŨ: Ngai nũkwendete mũno na nĩkyo kĩtumi wanenganie Mwana wake, Yesũ, ethĩwe nthembo kwondũ waku. Nthembo ĩsu nĩkũnengae wĩkwatyo wa kwĩsa kwĩkala wĩ mũtanu na wĩ mwĩanĩe tene na tene. *
O na kau nũtonya kwĩthĩwa na mathĩna na ũkethĩwa ũyona vate vata wa kwĩkala thayũ, ĩmanyĩsye kwa ũliku Ndeto ya Ngai, na ũyĩthĩwa na mũĩkĩĩo mũlũmu nthĩnĩ wa wĩkwatyo ũla Ngai ũtũnengete. Kwĩka ũu kũkatuma wĩthĩwa wĩ mũtanu na ũyĩthĩwa ũte na nzika kana ve kĩtumi kĩseo kya kũendeea kwĩkala thayũ.
^ Nĩ kana wĩmanyĩsye maũndũ maingĩ ĩũlũ wa ũndũ ũtonya kũtetheka nĩ nthembo ya wovosyo ya Yesũ, ĩloele vitio yĩ na kyongo, Kũlilikana Kĩkw’ũ kya Yesũ, ĩla yĩ nthĩnĩ wa www.pr418.com/kam. Sisya ungu wa ĨŨLŨ WITŨ > KŨLILIKANA.
No Wendeewʼe Nĩ Ii
ĨŨLŨ WITŨ
Nĩkĩ Waĩle Kwĩmanyĩsya Mbivilia?
Mbivilia nĩtumĩte andũ milioni mbingĩ ĩũlũ wa nthĩ makwata mosũngĩo ma makũlyo ala ma vata vyũ thayũnĩ. We nũkwenda kwĩthĩwa ũmwe wa andũ asu?
MŨSYAĨĨSYA
Kũmanya Kana Ngai Nũtũsũvĩaa Kũtonya Kũtũtethya Ata?
Maandĩko nĩmatũtetheeasya kwĩthĩwa na mũĩkĩĩo mũlũmu nthĩnĩ wa mawatho ma Ngai ma ĩvinda yũkĩte.
MŨSYAĨĨSYA
Nĩkĩ Ũla Mũthĩnzĩo Mũnene wa Ngai Nĩ wa Vata Mũno?
Nĩ maũndũ meva matumaa mũthĩnzĩo woneka wĩ wa vata kwĩ mĩthĩnzĩo ĩla ĩngĩ? Kũsũanĩa maũndũ asu no kũtũtetheesye tũkonaa wovosyo wĩ wa vata mũno.
