SIMA dja nu odja ti gósi na kel revista li, prublémas ki ta kontise na nos vida pode ser difísil di aguenta. Óras ki ta kontise un prubléma ku bo, bu ta fika ta pergunta si bale péna kontinua ta vive ô si algun algen ta preokupa ku bo. Má bu pode ten sertéza ma Deus ta preokupa ku bu sufrimentu. Bu ten txeu valor pa el.

Skritor di Salmo 86 mostra ma el ta kunfiaba na Deus kantu el fla: ‘N ta txoma-u na dia di nha frónta, pamodi bu ta responde-m.’ (Salmo 86:7) Má talvês bu ta pergunta: “Modi ki Deus ta responde-m ‘na dia di nha frónta’?”

Nbóra Deus pode ka rezolve nos prubléma lógu, se Palavra, Bíblia ta da-nu sertéza ma nu pode xinti pas déntu di nos i el ta djuda-nu lida ku nos prublémas. Bíblia ta fla: ‘Ka nhos fika preokupadu dimás ku ninhun kuza, má na tudu kuza, nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê; i pas di Deus, ki ningen ka ta konsigi ntende, ta guarda nhos korason i nhos pensamentu’. (Filipenses 4:6, 7) Favor, odja alguns versíklu di Bíblia ki ta da-nu sertéza ma Deus ta ama-nu i ma el ta kuida di nos.

‘Deus ka ta skese di ninhun [pardal]. Nhos bale más di ki txeu pardal.’ — Lucas 12:6, 7.

PENSA NA KEL-LI: Pa maioria di algen, kes pardal pikinoti é ka inportanti, má Deus ta preokupa ku es. Deus ta repara ti na kes pardal más pikinoti. Tudu es ten valor pa el. Pa Deus, algen ten mutu más valor di ki pardal. Di kes kuza ki Deus faze na Téra, algen é más inportanti pamodi es fazedu sima se ‘imaji’ i ku kapasidadi di ten i di mostra kualidadis bunitu ki el ten. — Génesis 1:26, 27.

‘Ó Jeová, dja bu analiza-m i bu konxe-m. Bu ta sabe nhas pensamentu. Izamina-m i konxe nhas preokupason.’ — Salmo 139:1, 2, 23.

PENSA NA KEL-LI: Deus konxe-u dretu. El sabe kuzê ki bu ta xinti i kal ki é bus preokupason más fundu. Sikrê otus algen pode ka ntende bus prubléma i preokupason, Deus ta preokupa ku bo i el krê djuda-u. Pamodi kel-li, bale péna kontinua ta vive.

‘Ó Jeová, obi nha orason; i pa nha pididu di ajuda txiga na bo. Nbaxa bu obidu i obi-m; óras ki N txoma-u responde-m faxi. El ta presta atenson na orason di kes ki sta pasa nisisidadi’. — Salmo 102:1, 2, 17.

PENSA NA KEL-LI: É sima ki désdi ki algen kumesa ta sufri, Jeová ta repara na kada lágua ki ta kai. (Salmo 56:8) El ta repara na bus lágua tanbê. Deus ta lenbra di tudu bus provason i lágua pamodi bu ten txeu valor pa el.

‘Ka bu fika preokupadu dimás, pamodi mi é bu Deus. N ta da-u forsa, sin, N ta djuda-u. Ami, Jeová, bu Deus, ami é kel ki ta fla-u: “Ka bu ten medu. N ta ba djuda-u.”’ — Isaías 41:10, 13.

PENSA NA KEL-LI: Deus sta prontu pa djuda-u. Si bu kai, el ta labanta-u.

‘Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ — João 3:16.

PENSA NA KEL-LI: Deus krê-u txeu di tal manera ki di livri vontadi el da se Fidju, Jizus pa móre pa bo. Kel sakrifisiu li ta da-u speransa di ten un vida filís i sábi pa tudu ténpu. *