Kĩrĩa Gĩtũmaga Ũtũũro Ũkorũo Ũrĩ wa Bata
ICUNJĨ icio ingĩ kabuku-inĩ gaka nĩ cionanĩtie ũrĩa moritũ matiganĩte mangĩtũma ũtũũro woneke ũrĩ mũritũ mũno kũhiũrania naguo. Rĩrĩa ũrahiũrania na mathĩna maku no wĩyũrie kana ũtũũro nĩ wa bata na kana nĩ kũrĩ mũndũ ũkũrũmbũyagia. Gĩa na ma atĩ Ngai nĩ akũrũmbũyagia rĩrĩa ũratangĩka. Ũrĩ wa bata mũno harĩ we.
Mwandĩki wa Thaburi 86 nĩ oonanirie atĩ nĩ eehokete Ngai rĩrĩa ooigire ũũ: “Wee nĩwe ngũkaĩra mũthenya ũrĩa ndĩ na mĩtangĩko, tondũ nĩ ũkũnjigua.” (Thaburi 86:7) O na kũrĩ ũguo no wĩyũrie atĩrĩ, ‘Ngai angĩnjigua atĩa mũthenya ũrĩa “ndĩ na mĩtangĩko”?’
O na gũtuĩka Ngai no age gũkwehereria mathĩna maku o rĩmwe, Kiugo gĩake Bibilia nĩ kĩonanĩtie atĩ no akũhe thayũ wa meciria ũhote gũkirĩrĩria, kiugaga ũũ: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho; naguo thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu na meciria manyu.” (Afilipi 4:6, 7, kohoro ka magũrũ-inĩ) Ta rora wone ũrĩa mĩhari ĩno ya Bibilia ĩtũteithagia gũkorũo na ma atĩ Ngai nĩ atũrũmbũyagia.
Ngai nĩ Akũrũmbũyagia
“Gũtirĩ o na kamwe ga tuo Ngai agaga gũtindanĩra nako. . . . Inyuĩ mũrĩ a bata gũkĩra tũnyoni tũingĩ.”—Luka 12:6, 7, kohoro ka magũrũ-inĩ.
TA WĨCIRIE: Tũnyoni no tuoneke tũtarĩ twa bata harĩ andũ aingĩ, no Ngai nĩ atũrũmbũyagia. Ngai nĩ onaga o na kanyoni karĩa kanini mũno na tuothe onaga twĩ ciũmbe cia bata harĩ we. Andũ nĩ a bata harĩ Ngai gũkĩra tũnyoni. Andũ nĩo ũũmbi wa Ngai ũrĩa wĩkĩrĩirũo mũno, mombĩtwo na “mũhianĩre” wake na nĩ marĩ ũhoti wa gũkũria na kuonania ngumo ciake ndũgĩru.—Kĩambĩrĩria 1:26, 27.
“Atĩrĩrĩ Jehova, wee nĩ ũũthuthurĩtie, na nĩ ũnjũĩ. . . . Ũmenyaga meciria makwa . . . Nduĩria, ũmenye mĩtangĩko ya meciria makwa.”—Thaburi 139:1, 2, 23.
TA WĨCIRIE: Ngai nĩ akũũĩ wega mũno. Nĩ amenyaga ũrĩa ũraigua ngoro thĩinĩ biũ, o na mĩtangĩko yaku. O na arĩa angĩ maga gũtaũkĩrũo nĩ mathĩna na mĩtangĩko yaku, Ngai nĩ akũrũmbũyagia na nĩ akoragwo ehaarĩirie gũgũteithia. Ũndũ ũcio nĩ ũtũmaga wone ũtũũro ũrĩ wa bata.
Ũtũũro Waku Nĩ wa Bata
“Atĩrĩrĩ Jehova, igua ihoya rĩakwa; reke kĩrĩro gĩakwa gĩa kũhoya ũteithio gĩgũkinyĩre. . . . Ndegera gũtũ gwaku; njĩtĩka na ihenya rĩrĩa ndagũkaĩra. . . . Nĩ agaathikĩrĩria mahoya ma arĩa athĩni.”—Thaburi 102:1, 2, 17.
TA WĨCIRIE: Nĩ ta Jehova akoragwo akĩririkana maithori o mothe andũ manaita kuuma hĩndĩ ĩrĩa maambĩrĩirie kũnyamarĩka. (Thaburi 56:8) Ũguo nĩ kuuga nĩ aririkanaga nginya maithori maku. Ngai nĩ aririkanaga mathĩna o na maithori maku mothe tondũ ũrĩ wa bata mũno harĩ we.
“Ndũgatangĩke, nĩ gũkorũo niĩ nĩ niĩ Ngai waku. Nĩ ngũgwĩkĩra hinya, ĩni, nĩ ngũgũteithia . . . niĩ Jehova Ngai waku . . . ngakwĩra atĩrĩ, ‘Ndũgetigĩre. Nĩ ngũgũteithia.’”—Isaia 41:10, 13.
TA WĨCIRIE: Ngai nĩ ehaarĩirie gũgũteithia, ũngĩgwa nĩ egũkuoya.
Harĩ na Kĩĩrĩgĩrĩro kĩa Ihinda Rĩega Rĩrĩa Rĩroka
“Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.”—Johana 3:16.
TA WĨCIRIE: Ũrĩ wa bata mũno harĩ Ngai nginya nĩ aarutire eyendeire Mũrũwe Jesu arĩ igongona nĩ ũndũ waku. Igongona rĩu nĩ rĩtũmaga ũgĩe na kĩĩrĩgĩrĩro gĩa gũgatũũra ũtũũro ũrĩ na muoroto na gĩkeno tene na tene. *
O na angĩkorũo nĩ ũratangĩka na ũkona ũtũũro waku ta ũkinyĩte mũthia, wĩrute na kĩyo Kiugo kĩa Ngai na ũgĩe na wĩtĩkio harĩ kĩĩrĩgĩrĩro kĩrĩa Ngai eranĩire. Kĩĩrĩgĩrĩro kĩu nĩ kĩrĩtũmaga ũgĩe na gĩkeno na gĩgagũteithia kuona atĩ ũtũũro nĩ wa bata.
^ Nĩguo wĩrute ũhoro makĩria ũrĩa ũngĩgunĩka nĩ igongona rĩa Jesu, wĩrorere video ĩtagwo, Ririkana Gĩkuũ kĩa Jesu thĩinĩ wa www.pr418.com/ki. Rora rungu rwa ŨHORO WITŨ > KĨRIRIKANO.
Icunjĩ Ingĩ Hihi Ũngĩenda Gũthoma
ŨHORO WITŨ
Wagĩrĩirũo Kwĩruta Bibilia Nĩkĩ?—Video Yothe
Bibilia nĩ ĩcokagĩria andũ milioni nyingĩ mũno thĩinĩ wa thĩ ciũrĩa iria nditũ mũno ũtũũro-inĩ. Wee no wende gũcokerio ciũria icio?
MŨRANGĨRI
Mahoya
Tũngĩĩrĩgĩrĩra maũndũ marĩkũ ũtũũro-inĩ witũ tũngĩhoyaga hĩndĩ ciothe?
MŨRANGĨRI
Ũrĩa Kũrũmbũiyo nĩ Ngai Kũngĩkũguna
Maandĩko nĩ matũteithagia kũgĩa na wĩtĩkio harĩ ciĩranĩro iria Ngai atwĩrĩire cia mahinda mega mokĩte.
MŨRANGĨRI
Kĩheo kĩa Ngai Kĩrĩa Kĩnene—Nĩ kĩa Goro Mũno Nĩkĩ?
Nĩ maũndũ marĩkũ matũmaga kĩheo gĩkorũo kĩrĩ kĩa bata kũrĩ iria ingĩ? Gwĩcũrania maũndũ macio no gũtũteithie kuonania ngatho citũ makĩria nĩ ũndũ wa igongona rĩa Jesu.
