មូលហេតុដែលអាចធ្វើឲ្យអ្នកចង់បន្តរស់នៅ
អត្ថបទមុនៗបង្ហាញថារឿងខ្លោចផ្សាផ្សេងៗអាចធ្វើឲ្យជីវិតមើលទៅពិបាកស៊ូទ្រាំពេក។ កាលដែលអ្នកកំពុងស៊ូទ្រាំនឹងបញ្ហាផ្ទាល់ខ្លួន អ្នកប្រហែលជាឆ្ងល់ថា តើរស់នៅមានន័យអ្វី ឬក៏តើមានអ្នកណាយកចិត្តទុកដាក់ចំពោះអ្នកឬទេ? សូមជឿជាក់ថាព្រះពិតជាយកចិត្តទុកដាក់នឹងទុក្ខវេទនារបស់អ្នក។ អ្នកមានតម្លៃណាស់ចំពោះលោក។
អ្នកសរសេរសៀវភៅចម្រៀងសរសើរព្រះ បទទី៨៦បានបង្ហាញអំពីទំនុកចិត្តរបស់គាត់ចំពោះព្រះ ដោយនិយាយថា៖ «ខ្ញុំហៅរកលោកក្នុងវេលាដែលខ្ញុំមានទុក្ខលំបាក ព្រោះលោកនឹងតបឆ្លើយមកខ្ញុំ»។ (ចម្រៀងសរសើរព្រះ ៨៦:៧) ក៏ប៉ុន្តែ អ្នកប្រហែលជាឆ្ងល់ថា ‹តើព្រះនឹងឆ្លើយតបខ្ញុំ«ក្នុងវេលាដែលខ្ញុំមានទុក្ខលំបាក»យ៉ាងដូចម្ដេច?›។
ទោះជាព្រះប្រហែលមិនដោះស្រាយបញ្ហារបស់អ្នកភ្លាមៗក្ដី គម្ពីរពង្រឹងទំនុកចិត្តអ្នកថាលោកអាចផ្ដល់ឲ្យអ្នកនូវសេចក្ដីសុខសាន្តក្នុងចិត្តដើម្បីជួយអ្នកឲ្យស៊ូទ្រាំបាន ដោយចែងថា៖ «កុំខ្វល់ចិត្តអំពីអ្វីឡើយ តែចូរជម្រាបព្រះអំពីសំណូមពររបស់អ្នករាល់គ្នាក្នុងគ្រប់ការទាំងអស់ ដោយអធិដ្ឋាន អង្វរសុំ និងថ្លែងអំណរគុណ។ យ៉ាងនេះ សេចក្ដីសុខសាន្តរបស់ព្រះដែលហួសពីការនឹកស្មាន នឹងការពារចិត្តនិងសមត្ថភាពរិះគិតរបស់អ្នករាល់គ្នា»។ (ភីលីព ៤:៦, ៧) សូមពិចារណាអំពីរបៀបដែលខគម្ពីរបន្តបន្ទាប់នេះផ្ដល់ទំនុកចិត្តដល់យើងថាព្រះគឺពិតជាយកចិត្តទុកដាក់ចំពោះយើងមែន។
ព្រះពិតជាយកចិត្តទុកដាក់ចំពោះអ្នក
«ព្រះមិនភ្លេច . . . ទោះជាចាបមួយក៏ដោយ។ . . . អ្នករាល់គ្នាមានតម្លៃជាងចាបពូកជាច្រើនទៅទៀត»។—លូកា ១២:៦, ៧
សូមពិចារណា៖ ចាបតូចៗដូចជាចាបពូកមើលទៅប្រហែលជាគ្មានតម្លៃចំពោះមនុស្សភាគច្រើននោះទេ តែព្រះយកចិត្តទុកដាក់នឹងពួកវា។ ព្រះកត់សម្គាល់ចាបពូកតូចៗទាំងអស់ ពួកវាមានតម្លៃណាស់។ មនុស្សមានតម្លៃចំពោះព្រះខ្លាំងជាងចាបពូកជាច្រើនទៅទៀត។ ក្នុងចំណោមអ្វីៗដែលព្រះបានបង្កើតលើផែនដីនេះ មនុស្សគឺអស្ចារ្យជាងគេ។ ពួកគេបានត្រូវបង្កើតមកឲ្យ«មានភាពដូច»លោក ហើយពួកគេអាចបណ្ដុះនិងបង្ហាញគុណសម្បត្តិអស្ចារ្យផ្សេងៗដែលលោកមាន។—ដើមកំណើត ១:២៦, ២៧
«ឱព្រះយេហូវ៉ាអើយ លោកបានស្វែងយល់អំពីខ្ញុំយ៉ាងល្អិតល្អន់ ហើយលោកស្គាល់ខ្ញុំច្បាស់ណាស់។ . . . លោកដឹងគំនិតរបស់ខ្ញុំ . . . សូមពិនិត្យមើលខ្ញុំ ដើម្បីដឹងថាខ្ញុំខ្វល់ខ្វាយអំពីរឿងអ្វីខ្លះ»។—ចម្រៀងសរសើរព្រះ ១៣៩:១, ២, ២៣
សូមពិចារណា៖ ព្រះស្គាល់អ្នកច្បាស់ណាស់។ លោកជ្រាបអំពីអារម្មណ៍និងការថប់ព្រួយដែលកប់ជ្រៅក្នុងចិត្តរបស់អ្នក។ ទោះជាអ្នកឯទៀតប្រហែលជាមិនយល់អំពីទុក្ខព្រួយរបស់អ្នកក្ដី ព្រះយកចិត្តទុកដាក់ចំពោះអ្នកនិងចង់ជួយអ្នក។ ដោយដឹងដូច្នេះ អ្នកមានហេតុបន្តរស់នៅ។
ជីវិតរបស់អ្នកមានន័យ
«ឱព្រះយេហូវ៉ាអើយ សូមស្ដាប់សេចក្ដីអធិដ្ឋានរបស់ខ្ញុំ សូមឲ្យសំឡេងស្រែកសុំជំនួយរបស់ខ្ញុំបានឮទៅដល់លោក។ . . . សូមមេត្តាផ្ទៀងត្រចៀកស្ដាប់ខ្ញុំ។ ពេលខ្ញុំហៅរកលោក សូមប្រញាប់ឆ្លើយតបមកខ្ញុំផង។ លោកនឹងយកចិត្តទុកដាក់ស្ដាប់សេចក្ដីអធិដ្ឋានរបស់មនុស្សទ័លក្រ»។—ចម្រៀងសរសើរព្រះ ១០២:១, ២, ១៧
សូមពិចារណា៖ តាំងពីដើមដំបូងដែលមនុស្សជាតិរងទុក្ខ ព្រះយេហូវ៉ាកត់សម្គាល់រាល់ទឹកភ្នែកដែលបានស្រក់ដោយសាររងទុក្ខ។ (ចម្រៀងសរសើរព្រះ ៥៦:៨) នេះក៏រួមបញ្ចូលទឹកភ្នែករបស់អ្នកផងដែរ។ ព្រះចាំរាល់ទុក្ខលំបាករបស់អ្នក ព្រមទាំងទឹកភ្នែករបស់អ្នក ដោយសារអ្នកមានតម្លៃចំពោះលោក។
«កុំបារម្ភឡើយ ព្រោះខ្ញុំជាព្រះរបស់អ្នក។ ខ្ញុំនឹងពង្រឹងកម្លាំងអ្នក ខ្ញុំនឹងជួយអ្នក . . . ខ្ញុំជាយេហូវ៉ាជាព្រះរបស់អ្នក . . . ខ្ញុំនឹងនិយាយមកអ្នកថា៖ ‹កុំខ្លាចឡើយ ខ្ញុំនឹងជួយអ្នក›»។—អេសាយ ៤១:១០, ១៣
សូមពិចារណា៖ ព្រះប្រុងប្រៀបដើម្បីជួយអ្នក។ បើអ្នកដួល លោកលើកអ្នកឡើង។
មានសេចក្ដីសង្ឃឹមសម្រាប់អនាគតដ៏បវរ
«ពីព្រោះព្រះស្រឡាញ់ពិភពលោកខ្លាំងដល់ម្ល៉េះ បានជាលោកឲ្យបុត្រតែមួយរបស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះ អាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។—យ៉ូហាន ៣:១៦
សូមពិចារណា៖ ព្រះស្រឡាញ់អ្នកខ្លាំងដល់ម្ល៉េះបានជាលោកបានឲ្យលោកយេស៊ូដែលជាបុត្ររបស់លោកបូជាជីវិតដើម្បីជាប្រយោជន៍ដល់អ្នក។ ការបូជាជីវិតនេះផ្ដល់ឱកាសឲ្យអ្នកមានសេចក្ដីសង្ឃឹមរស់ជារៀងរហូតដោយរីករាយនិងមានន័យខ្លឹមសារ។ *
ទោះជាអ្នកប្រហែលជាមានទុក្ខសោក ហើយមើលទៅពិបាកស៊ូទ្រាំក្ដី សូមសិក្សាបណ្ដាំរបស់ព្រះយ៉ាងយកចិត្តទុកដាក់និងពង្រឹងជំនឿទៅលើសេចក្ដីសង្ឃឹមដែលព្រះសន្យា។ ការធ្វើដូច្នេះនឹងធ្វើឲ្យអ្នកសប្បាយរីករាយនិងមានមូលហេតុបន្តរស់នៅ។
^ ដើម្បីរៀនថែមទៀតអំពីរបៀបដែលអ្នកអាចទទួលប្រយោជន៍ពីគ្រឿងបូជាលោះរបស់លោកយេស៊ូ សូមទស្សនាវីដេអូចូរនឹកចាំមរណភាពលោកយេស៊ូនៅwww.pr418.com ។ សូមចុច«អំពីយើង» រួចចុច«ពិធីរំលឹក»។
លោកអ្នកក៏ប្រហែលជាចូលចិត្តដែរ
អំពីយើង
ហេតុអ្វីគួររៀនគម្ពីរ?
គម្ពីរផ្ដល់ចម្លើយចំពោះចម្ងល់អំពីជីវិតដល់មនុស្សរាប់លានអ្នកនៅទូទាំងពិភពលោក។ តើលោកអ្នកចង់បានចម្លើយដែរឬទេ?
ទស្សនាវដ្ដី
តើការយកចិត្តទុកដាក់របស់ព្រះអាចជួយអ្នកយ៉ាងដូចម្ដេច?
បទគម្ពីរពង្រឹងជំនឿយើងទៅលើសេចក្ដីសន្យាដ៏អស្ចារ្យរបស់ព្រះសម្រាប់ថ្ងៃអនាគត។
ទស្សនាវដ្ដី
អំណោយ
តើ
