Ekikaleka Engebe Yawu Iyabya Iyikinawithe Omughaso
EMYATSI y’ahanyuma yikakanganaya ngoku ebindu muthina-muthina ebikitha obulighe bunene byanganaleka engebe iyakalha kutsibu. Wukaheka ebiritho byawu, iwanganabulha engebe ngayikinawithe mughaso kutse nga hane owosi-wosi oyukutsomene. Wukiminye ngoku Nyamuhanga atsomene amalighe wawu. Wuli w’obughuli embere siwe.
Omuhandiki owe Esyonyimbo 86 mwakangania eriyikethera liwe omu Nyamuhanga omwa binywe bino: “Ngakulhakira okwa mughulhu w’obulighe bwaghe, kusangwa wukasubiraya erisaba lyaghe.” (Esyonyimbo 86:7) Aliwe ibbwa, iwangana yibulya, ‘Nyamuhanga akendinyisubirya athi “okwa mughulhu w’obulighe bwaghe”?’
Nomwakine indi Nyamuhanga syanga ghunzaho ebitsibu byawu aho n’aho, Ekinywe kiwe, e Biblia, kikakukakasaya ngoku anganakuha erithekana omwa muthima erikuwathikya eribighumira: “Simuhanga-hangaye emithima yenyu, nikwa omwa buli mwatsi mubwire Nyamuhanga obwagha bwenyu, imukamusaba n’erimuhathikana imunemuha ewasingya. N’obuholho bwa Nyamuhanga, obulhabire amenge wosi , bwasyatheya emithima yenyu n’amaghanirya wenyu.” (Abanya Filipi 4:6, 7) Kisi lhangira ngoku emilhondo ye Biblia eyiri ahikwa hano ngoku yikathukakasaya kw’athutsomene kutsibu.
Nyamuhanga Akutsomene
“Nyamuhanga syalibirirawa n’akaghuma ka kuhyo [ehinyonyi] . . . Muli b’obughuli bunene kwilhaba ehinyonyi hingyi.”—Luka 12:6, 7.
KILENGEKANAYEKO: Ehinyonyi ehike-hike kutsibu ni hy’obughuli embere sya Nyamuhanga. Nyamuhanga akalhangira obuli kanyonyi; obuli kaghuma ni kihangikwa ky’obughuli. Oku Nyamuhanga abandu ni b’obughuli bunene kwilhaba ehinyonyi. Abandu, babalengireyo kutsibu omwa bihangikwa byosi ebya Nyamuhanga ebiri okwa kihugho, bahangikirwe omwa “kisosekanio” kiwe kandi banganathoka erikulha-kulhania n’erikangania emibere yiwe mibuyanga.—Enzuko 1:26, 27.
“Iwe Mwami Mukulhu, wabirinyirengako, kandi wunanyasi. . . . Wukaminya amalengekania waghe wosi . . . Wunyirengeko, wuminye amalengekania waghe.”—Esyonyimbo 139:1, 2, 23.
KILENGEKANAYEKO: Nyamuhanga anakwasi ndeke. Anasi eriyowa n’erihanga-hangya lyawu. Abandi nomubangabya isibangayitheghererya ebitsibu byawu, Nyamuhanga akutsomene kandi anzire erikuwathikya. Ekyo kikaleka engebe yawu iyabya ini y’omughaso.
Engebe Yawu ni y’Omughaso
“Iwe Mwami Mukulhu wowe erisaba lyaghe, wowe erilhaka lyaghe busana n’eriwathikibwa! . . . Wunyihulikirire, wunyisubiraye lhuba omughulhu ngalhaka. Asyowa abandu biwe ababirisighanibwa, kandi asyahulikirira erisaba lyabo.”—Esyonyimbo 102:1, 2, 17.
KILENGEKANAYEKO: Erilhua okwa buthuku abandu batsuka eriaghalhwa, Yehova ali ng’oyukabya inianemuhandika emisonia yosi y’abandu. (Esyonyimbo 56:8) Imwamune n’emisonia yawu. Nyamuhanga akibuka ebitsibu byawu ebyosi n’emisonia yawu kundi wuli w’obughuli embere siwe.
“Siwubahe, kusangwa . . . indi Nyamuhanga wawu. Ngendi kuha maaka, kwenene, ngendi kuwathikya . . . Ingye indi Mwami Mukulhu, Nyamuhanga wenyu . . . Oyukakubwira athi, ‘Siwubahe, ngendi kuwathikya.’”—Isaya 41:10, 13.
KILENGEKANAYEKO: Nyamuhanga anayitheghekire erikuwathikya. Wamayithinira, iniakendi kuhangania.
Hane Amaha aw’Obuthuku Obukasa Obuwene
“Nyamuhanga mwanza ekihugho kyathya, kyaleka iniaha Mughalha wiwe, ekyusa kiwe, neryo oyukamwikiriraya syahere nikwa abye n’engebe y’erikotha.”—Yoane 3:16.
KILENGEKANAYEKO: Nyamuhanga akwanzire kutsibu eribya imwahayo na Mughalha wiwe, Yesu, eribya kihongwa busana nawu. Ekihongwa eki kikakuha amaha w’erisyabya omwa engebe eyakera na kera eyiri mw’etseme kandi eyiwithe ekighendererwa. a
Nomwakine indi wangabya iwuwithe erihangya-hangya kandi iwayowa engebe iyabirikalha kutsibu, yeghesaye ndeke Ekinywe kya Nyamuhanga kandi himba erikirirya lyawu omwa bya Yehova abirilhagha. Kikendi leka iwatsema kandi iwayikethera ngoku engebe yawu ni y’omughaso.
a Eriminya bingyi ngoku wanga ghasirwa omwa kihongwa kya Yesu, lebaya evidiyo Ibuka Olhuholho Lhwa Yesu okwa www.pr418.com/koo. Lebaya omwa EBITHUHAMBIREKO > ERYIBUKA.
You May Also Like
EBITHUHAMBIREKO
Busana Naki Kitholere Erigha e Biblia?—Evidiyo Enyiri
E Biblia yikaha abandu bangyi erithimba omwa kihugho kyosi b’eby’erisubirya okwa bibulyo bikulhu omwa ngebe. Wunanzire eribya mughuma w’okw’ibo?
AKALEBERYO
Ngoku Eritsomana Lya Nyamuhanga Lyanga Kughasira
Amasako akathuwathikaya erihimba erikirirya lyethu omwa milhaghe ya Nyamuhanga ey’obuthuku obuwene obwa thulindirire.
AKALEBERYO
Ekihembo kya Nyamuhanga Ekilengire Kutsibu
Ni bindu byahi ebikaleka ekihembo ikyabya ikilengire ekindi? Erilengekania ndeke okwa bindu ng’ebyo kyangana thuwathikya eryongera erisima lyethu busana n’embanulho.
