Ekuma o Zinga Kwinina o Mfunu?
E MALONGI maviokele masongele mambu mayingi malenda kitula e zingu se kiampasi. Vava onuananga ye mpasi, olenda yantika kukiyuvula kana vo zingu mfunu kikilu kina ye kana vo vena yo muntu okuvuanga kieleka o mfunu. Kala ye ziku vo Nzambi ozeye ntokani zaku. Mfunu kikilu kekuvuanga.
O nsoneki a Nkunga 86 wasonga vo wabundanga e vuvu muna Nzambi. Wavova vo: “Muna lumbu kia mpasi zame ikutâtila; Kadi onge okumputwila.” (Nkunga 86:7) Kansi, olenda kukiyuvula: ‘Aweyi Nzambi kekumpanina e mvutu “muna lumbu kia mpasi zame”?’
Kana una vo Nzambi ke fokola mpasi zaku vana vau ko, e Bibila kivovanga vo Nzambi olenda kuvana luvuvamu lwa ntima mu kusadisa wazizidila e mpasi. Tutanganga vo: “Ke nutelama ntima muna konso diambu ko, kansi muna mambu mawonso muna sambu ye ludodokelo ye matondo, yambula ndomba zeno zazayiswa kwa Nzambi; o luvuvamu lwa Nzambi luna luviokele umbakuzi wawonso luyingila ntima mieno ye makani meno.” (Filipi 4:6, 7) Dodokolo, tala una sono ilende ikutukwikidisilanga vo Nzambi okutuvuanga kieleka o mfunu.
Nzambi Mfunu Kekuvuanga
“Ke vena [ntietie] imosi nkutu ko ivilakanwa kwa Nzambi. . . . Oyeno ntietie zayingi nusundidi.”—Luka 12:6, 7.
YINDULA EDI: E nuni zakeke-kete nze ntietie zilenda badikilwa kwa wantu vo ke zina mfunu ko, kansi Nzambi olunga-lunganga zo. Kana nkutu ntietie mosi ke ivilakanuanga ko kwa Nzambi, konso ntietie mfunu ina kwa Nzambi. O wantu basundidi o mfunu vana meso ma Nzambi ke mu ntietie ko. O wantu i vangwa ya Nzambi isundidi o mfunu ova ntoto. Mu ‘mpw’andi’ kabavangila, balenda tanginina e fu yandi.—Etuku 1:26, 27.
‘E Yave, nge wansata yo kunzaya. . . . Obakula ngindu zame. Untonta wazaya ngindu zame.’—Nkunga 139:1, 2, 23.
YINDULA EDI: O Nzambi otomene kuzaya. Ozeye ngindu ye ntokani zaku. Ezak’e ntangwa, o wantu ke bebakulanga ko e mpasi zaku, kansi Nzambi ozayanga zo ye ozolele kusadisa. Ediadi disonganga vo e zingu kiaku mfunu kikilu kina.
E Zingu Kiaku Mfunu Kikilu Kina
“E Yave, wa sambu kiame, Yambula kazu kiame kiàluakila. . . . Tamba matu oku ngina, e lumbu mboka umputula-vutula. . . . Owidi sambu ki’akondami.”—Nkunga 102:1, 2, 17.
YINDULA EDI: Tuka e mpasi zayantikila, Yave omonanga mansanga mawonso bevaikisanga o wantu mu kuma kia mpasi. (Nkunga 56:8) O Nzambi omonanga mpe e mansanga maku. Nzambi osungamenanga konso mpasi ye mansanga maku kadi mfunu wina vana meso mandi.
‘Kutokani ko, kadi omono i Nzambi aku; ikuvamisa; elo, ikusadisa . . . Mono i Yave wa Nzambi aku . . . Kumoni wonga ko; ikusadisa.’ —Yesaya 41:10, 13.
YINDULA EDI: Nzambi una ye tima dia kusadisa. Avo obwidi, olenda kutelamesa.
Wantu Bekala ye Zingu Kiambote Kuna Sentu
“Kadi muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.”—Yoane 3:16.
YINDULA EDI: Wau vo Nzambi otoma kuzolanga, wavana Mwan’andi Yesu muna wete diaku. E kimenga kia Yesu kikuvananga e vuvu kia zingila yakwele mvu ye kiese. a
Avo ntokani zayingi una zau, yovo omonanga vo kulenda diaka zizidila ko, longoka e Diambu dia Nzambi yo kumika o lukwikilu lwaku muna nsilu katusila o Nzambi. Ediadi dikutwasila kiese ye vuvu kia kwamanana zinga.
a Muna zaya mayingi mu kuma kia una olenda vuila nluta muna kimenga kia lukûlu, tala e video Luyindulu lwa Lufwa lwa Yesu muna nzil’eto www.pr418.com. Ziula vana vasonama TU AKI NANI > LUYINDULU.
Nanga Oyangalela Mpe Malongi Mama
TU AKI NANI
Ekuma Ofwete Longokela Bibila?
Bibila kisadisanga ulolo wa wantu mu nz’amvimba mu solola mvutu za yuvu yamfunu mu kuma kia zingu. Nga zolele kala mosi muna yau?
EYINGIDILU DIA NKANGU
Sambu—Adieyi Kilenda Vanga kwa Ngeye?
Nkia nluta olenda vua muna sambanga kwa Nzambi?
EYINGIDILU DIA NKANGU
O Zola Kwa Nzambi Nkia Nsambu Kulenda Kutwasila?
E Sono ikutusadisanga mu kumika lukwikilu lweto muna nsilu mia Nzambi mia kusentu.
EYINGIDILU DIA NKANGU
Lukau Lwampwena lwa Nzambi—Ekuma Lusundidi e Ntalu?
Nkia mambu mekitulanga lukau se lwa ntalu yovo lwa kondwa mfunu? Oyindula mambu mama dilenda kutusadisa muna wokesa luyangalalu lweto muna lukûlu.
