Kine Kinenenwa’mba Būmi Budi na Mvubu
BISHINTE bibadikile i bilombole makambakano palapala abwanya kulengeja būmi bumweke bu bukomo. Kitatyi kyolwa na makambakano obe, ubwanya padi kwiipangula shi būmi budi na mvubu, nansha shi kudi muntu ukutele mutyima. Kulupila’mba Leza ukutele mutyima mu tusuwa tobe. Wi mulēme ku meso andi.
Mulembi wa Ñimbo ya Mitōto 86 wālombwele kikulupiji kyandi mudi Leza amba: “Nakwite mu difuku dya tusuwa twami, mwanda ukanondololanga.” (Ñimbo ya Mitōto 86:7) Ino ubwanya padi kwiipangula’mba, ‘Le Leza ukanondolola namani “mu difuku dya tusuwa twami”?’
Nansha Leza byakakokejapo kupwa makambakano obe kiponka na ponka, Bible Kinenwa kyandi kikukulupija’mba ubwanya kukupa ndoe ya mutyima mwanda wa kukukwasha ūminine pokinena’mba: “Kemwakizumbijai mityima pa kintu nansha kimo, inoko mu byonso, yukijai Leza byomulomba mu milombelo ne kuzenza pamo ne kufwija’ko; kadi ndoe ya Leza itabukile ñeni yonso ikalama mityima yenu ne milangwe yenu.” (Fidipai 4:6, 7, kunshi kwa dyani) Tutalei muswelo ukokeja kwitukwasha bisonekwa bilonda’ko tukulupile amba Leza witutele mutyima na kanye.
Leza Ukutele Mutyima
“I kutupu [musolwe] nansha umo obasūdile kudi Leza. . . . Mudi na bulēme kutabuka misolwe mingi.”—Luka 12:6, 7, kunshi kwa dyani.
LANGULUKA’PO BIDI: Toni tumwekanga bu tutyetye bininge, ato’ko tudi na mvubu ku meso a Leza. Leza umwene’nka ne musolwe mutyetye; ayo yonso i bipangwa byūmi bilēme. Ku meso a Leza, bantu badi na mvubu bininge kutabuka misolwe. Bantu byobadi bu bipangwa bya Leza bya mvubu mikatampe pano pa ntanda, i bapangwe mu “kyelekejo” kyandi kadi badi na bukomo bwa kutamija ne kumwekeja ngikadila yandi mikatampe.—Ngalwilo 1:26, 27.
“A Yehova, ubamandaula, kadi ubandyuka. . . . [Ujingulwile] milangwe yami . . . Mandaule, yuka milangwe yami inkambakanya.” —Ñimbo ya Mitōto 139:1, 2, 23.
LANGULUKA’PO BIDI: Leza ukuyukile biyampe. Uyukile milangwe ya munda mobe ne makambakano obe. Nansha bantu bakwabo byokebabwanyapo kwivwanija makambakano obe, aye Leza ukutele mutyima kadi usakanga kukukwasha. Kino kilengejanga būmi bwikale na mvubu.
Būmi Bobe Budi na Kamweno
“A Yehova, ivwana milombelo yami; kulomba konomba bukwashi kufike kodi. . . . Tá kutwi kobe kondi; nondolole bukidibukidi pongita. Ukata mutyima ku milombelo ya balanda.”—Ñimbo ya Mitōto 102:1, 2, 17.
LANGULUKA’PO BIDI: Bidi pamo bwa Yehova umonanga impolo yonso isūmija bantu bonso tamba banza kususuka. (Ñimbo ya Mitōto 56:8) Mwine mubadilwa ne impolo yobe. Leza kedilwepo makambakano ne impolo yobe yonso mwanda wi mulēme ku meso andi.
“Kokazumbija mutyima, mwanda ami ne Leza obe. Nkakukomeja, bine, nkakukwasha . . . ami, Yehova Leza obe, . . . Mwine ukunena’mba, ‘Kokakwatwa moyo. Nkakukwasha.’”—Isaya 41:10, 13.
LANGULUKA’PO BIDI: Leza usakanga kukukwasha. Shi ubapone, aye ukakwimika.
Kudi Lukulupilo lwa Būmi Buyampe bwa Kumeso
“Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.”—Yoano 3:16.
LANGULUKA’PO BIDI: Leza ukusenswe bininge, o mwanda wāpēne’nka ne wandi Mwana Yesu bu kitapwa pa mwanda obe. Kino kitapwa i kikupe muswelo wa kwikala nyeke na būmi bwa nsangaji ne bwa kitungo. *
Nansha byobwanya kuvutakanibwa ñeni ne būmi bobe byobubwanya kumweka bu bukomo, wifunde Kinenwa kya Leza na katentekeji ne kutamija lwitabijo mu lukulupilo lulaile Leza. Kino kikakupa nsangaji ne kukukulupija’mba būmi budi na mvubu.
^ Shi usaka kuyukila’ko bivule pa mwa kumwena mu kitapwa kya Yesu, tala video inena’mba Vuluka Lufu lwa Yesu pa www.pr418.com. Twela mu MYANDA ITUTALA > KIVULUKILO.
Tala'po Bidi ne Bino:
MYANDA ITUTALA
Mwanda Waka Twifunde Bible?
Bible ulondololanga bipangujo bya mvubu mu būmi biipangulanga midiyo ne midiyo ya bantu ntanda yonso. Le nobe usaka alondolole byobe?
KITEBA KYA MULAMI
Milombelo—Kyoibwanya Kukulongela
Lelo i bika byokatengela shi ulombelanga kitatyi ne kitatyi mu bobe būmi?
KITEBA KYA MULAMI
Muswelo Obwanya Kumwena mu Kwituta Kwitutele Leza Mutyima
Bisonekwa bitukwashanga tukomeje lwitabijo mu milao ya Leza ya kutendelwa ya ku meso.
KITEBA KYA MULAMI
Kyabuntu Kikatakata kya Leza—Mwanda Waka I Kilēme Mpata?
I bintu’ka bilengejanga kyabuntu kimo kikale na mvubu kupita kikwabo? Kulangulukila pa bino bintu kubwanya kwitukwasha tutamije mutyima wa kufwija’ko pa kinkūlwa.
