Bua tshinyi kuikala ne muoyo kudi ne mushinga?
MU BIENA-BUALU bishale tudi bamone mudi malu makole mashilashilangane adi akuata bantu mua kubafikisha ku dimona ne: nsombelu mmukole mua kupita nende. Wewe utantamena ntatu, udi mua kudiebeja bikala muoyo ne mushinga anyi bikalaku muntu udi uditatshisha bua bualu buebe. Ikala mushindike ne: Nzambi udi uditatshisha bua lutatu luebe. Udi ukuangata ne mushinga.
Mufundi wa Misambu 86 wakaleja muvuaye mueyemene Nzambi wamba ne: “Ndi nkubila mu dituku dia dikenga dianyi, bualu wewe neungandamune.” (Misambu 86:7) Kadi udi mua kudiebeja ne: ‘Mmunyi muangandamuna Nzambi “mu dituku dia dikenga dianyi”?’
Nansha mudi Nzambi kayi mua kujikija ntatu yebe musangu umue, Bible Dîyi diende didi dikujadikila ne: udi mua kukupesha ditalala dia mu muoyo bua ukankamane, bualu yeye muine udi wamba ne: “Kanusamishi mutu bua tshintu nansha tshimue, kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne bieledi bienu bia meji.” (Filipoyi 4:6, 7, dimanyisha) Mona mudi mvese ya mu Bible idi ilonda eyi itujadikila mudi Nzambi ututabalela ne bulenga.
Nzambi udi ukutabalela
‘Nansha mushamusha umue kawena ulenguludibua kudi Nzambi. Nudi ne mushinga kupita mishamisha ya bungi.’—Luka 12:6, 7, dimanyisha.
ELA MEJI BUA BUALU EBU: Nzambi utu utabalela nansha nyunyi mikese itu imueneka kayiyi ne mushinga. Nzambi utu umona too ne kamushamusha kakese ne ukangata bu tshifukibua tshia mushinga. Bantu badi ne mushinga wa bungi menemene ku mêsu kua Nzambi kupita mishamisha. Bantu ke bifukibua bia mushinga bia Nzambi bia pa buloba, bualu mbafukibue mu “tshimfuanyi” tshiende ne badi ne mushindu wa kupeta ngikadilu yende milenga ne kuyileja.—Genese 1:26, 27.
“Yehowa wanyi, wewe udi mukonkonone munda muanyi, ne udi mummanye. . . . Udi ujingulula meji andi nawu . . . Nkenketa, ne umanye meji adi antatshisha.”—Misambu 139:1, 2, 23.
ELA MEJI BUA BUALU EBU: Nzambi mmukumanye bimpe. Mmumanye muudi udiumvua mu muoyo webe ne mmumanye majinga ebe. Padi bantu bakuabu kabayi mua kumanya ntatu ne tunyinganyinga tuebe, Nzambi yeye udi ukutabalela ne mmusue kukuambuluisha. Ke tshidi tshileja ne: kuikala ne muoyo kudi ne mushinga..
Muoyo webe udi ne mushinga
“Yehowa, telejaku disambila dianyi; muadi wanyi wa dilomba diambuluisha ufike kuudi. . . . Inyika ditshi diebe kundi; ngandamunaku ne lukasa pandi mbikila. . . . Kakulengulula disambila [dia mukengi].”—Misambu 102:1, 2, 17.
ELA MEJI BUA BUALU EBU: Mbienze anu bu ne: kutuadijila anu ku mbangilu kua dikenga dia bantu, Yehowa mmumanye binsonji bionso bidi bantu bapuekesha. (Misambu 56:8) Nansha binsonji biebe kabidi. Nzambi mmuvuluke ntatu yebe yonso ne binsonji biudi upuekesha bualu udi ukuangata ne mushinga.
“Kupampakanyi to, bualu ndi Nzambi webe. Nenkukoleshe, eyowa, nenkuambuluishe . . . Meme, Yehowa Nzambi webe, ndi . . . Yeye udi ukuambila ne: ‘Kutshinyi to. Nenkuambuluishe.’”—Yeshaya 41:10, 13.
ELA MEJI BUA BUALU EBU: Nzambi udi pabuipi bua kukuambuluisha. Wewe mudishinde panshi, neakujule.
Kudi ditekemena bua matuku mimpe atshilualua
“Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.”—Yone 3:16.
ELA MEJI BUA BUALU EBU: Bu muudi ne mushinga wa bungi ku mêsu kua Nzambi, biakamusaka bua kufila Muanende Yezu bu tshia kupikulangana natshi bua bualu buebe. Tshia kupikulangana natshi etshi tshidi tshikupetesha ditekemena dia kuikala ne nsombelu muimpe ne wa disanka bua kashidi. *
Nansha muudi mua kuikala utata ne umona ne: nsombelu mmukole bua kupita nende, ikala ulonga Dîyi dia Nzambi ne ntema yonso ne kolesha ditabuja diebe mu malu mimpe adi Nzambi mulaye. Nebikupeteshe disanka ne nebikujadikile ne: kuikala ne muoyo kudi ne mushinga.
^ tshik. 19 Bua kumanya malu a bungi bua mudi mulambu wa Yezu mua kukuambuluisha, tangila filme wa Vuluka lufu lua Yezu mu site wa jw.org. Buela mu MIKANDA > VIDEO > BISANGILU BIETU NE MUDIMU WETU WA KUYISHA.
Mona bikuabu:
MALU ETU
Bua tshinyi mbimpe kulonga Bible?
Bible utu wandamuna nkonko minene itu bantu miliyo ya bungi pa buloba bujima badiela. Udi musue pebe kupeta mandamuna a yebe nkonko anyi?
TSHIBUMBA TSHIA NSENTEDI
Disambila—Tshididi mua kukuenzela
Disambila diodi ne muaba munene mu nsombelu webe, ntshinyi tshiwapeta?
TSHIBUMBA TSHIA NSENTEDI
Mudi ditutabalela dia Nzambi mua kukuambuluisha
Bible udi utuambuluisha bua kuikala ne ditabuja mu malu mimpe adi Nzambi mulaye bua matuku atshilualua.
TSHIBUMBA TSHIA NSENTEDI
Dipa ditambe bunene dia Nzambi—Bua tshinyi didi ne mushinga wa bungi?
Mmalu kayi adi avuija dipa kampanda ne mushinga wa bungi kupita makuabu? Kutabalela malu aa kudi mua kukuambuluisha bua kukolesha dianyisha dietu bua tshia kupikula natshi bantu.
