Ovyo Kuyoya Chapwila Chachilemu
VIHANDE VINAFUMUHO, vinasolola ukalu uze nautulingisa tumone kuyoya kupwa chachipi. Nge muli muukalu, munahase kuputuka kuhuhwasana numba nge kuyoya chapwa chamwaza kaha nawa chachilemu chipwe nge kuli mutu ali nakumizakama nyi chiku. Oloze tachikizenu ngwenu Kalunga amizakama. Mwapwa muvavalemu kuli ikiye.
Muka-kwimba Samu 86 asolwele nge afwelelele Kalunga hakwamba ngwenyi: “Nangukusanyika halikumbi lyaluyando, mwomwo naungukumbulula.” (Samu 86:7) Munahase kulihulisa ngwenu: ‘Uno Kalunga nahase kukangukumbulula ngachilihi “halikumbi lyaluyando”?’
Numba tuhu Kalunga keshi kukumisa ukalu wenu hahaze veneko, oloze Mbimbiliya yatufwelelesa ngwayo Kalunga mwatuhana kuunda chamumuchima chize nachitukafwa tumike muukalu. Mbimbiliya ngwayo: “Kanda namulizakamina hachuma numba chimweko, oloze muvyuma vyosena, hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu kuhichila muli Kulishitu Yesu.” (Wavaka-Fwilipi 4:6, 7) Talenu vyuma vinakavangizaho yatufwelelesa Mbimbiliya vize vyasolola nge Kalunga atuzakama.
Kalunga Amizakama
“[Kajilili] naumwe wauchi navasuvilila kuli Kalunga. . . . Enu mwapwa muvavalemu kuhambakana tujilili vavavulu.”—Luka 12:6, 7, kwinyikila chamwishi.
ACHISHINGANYEKENU HACHUMECHI: Kalunga kamona tujilili kupwa vavalemu chikumako. Chipwe ngocho, naumwe wauchi navasuvilila kuli Kalunga, eji kuvazakamanga vosena. Shikaho, vatu vapwa vavalemu chikuma kuhambakana tujilili. Vapwa vavalemu chikuma kuhambakana vyuma vyosena vyakutenga hano hamavu, mwomwo avatengele “muchifwanyisa chenyi.” Ngocho, vakwechi uhashi wakusolola vilinga vyamwaza atwama navyo Kalunga.—Kuputuka 1:26, 27.
“Ove Yehova, unanguhehwojola, kaha unangutachikiza. . . . Weji kumonanga vishinganyeka vyami . . . Ngukekese mangana utachikize vyuma ngunalizakamina.”—Samu 139:1, 2, 23.
ACHISHINGANYEKENU HACHUMECHI: Kalunga amitachikiza kanawa mutu himutu. Atachikiza vishinganyeka vyenu nakulizakamina chenu. Numba tuhu vatu kavatachikiza ukalu weji kumihombesangako, oloze Kalunga eji kumizakamanga nakufwila kumikafwa. Kutachikiza chuma kana nachimilingisa mumone kuyoya kupwa chamwaza kaha nawa chachilemu.
Kuyoya Chenu Chapwa Chamwaza
“Ove Yehova, ivwa kulomba chami. Kawelele kami kahete kuli ove. . . . Tengeleka matwitwi ove kuli ami. Ngukumbulule washiwashi omu nangukusanyika. . . . Mwevwilila kukulomba chavaze vakalikiza.”—Samu 102:1, 2, 17.
ACHISHINGANYEKENU HACHUMECHI: Kufuma vene halwola vatu vaputukile kuyanda, Yehova namononga masoji avo osena. (Samu 56:8) Kuhakilako vene namasoji enu. Kalunga eji kwanukanga kuyanda chosena munahichimo namasoji enu mwomwo mwapwa muvavalemu chikuma kuli ikiye.
“Kanda naulizakaminako, mwomwo nguKalunga kove. Nangukujikijisa, nangukukafwa . . . Ami Yehova Kalunga kove . . . Yami nguli nakukulweza ngwami, ‘kanda nawivwa womako, nangukukafwa.’”—Isaya 41:10, 13.
ACHISHINGANYEKENU HACHUMECHI: Kalunga mwamikafwa. Nge namulimbuka kaha mwamihindula.
Kuyoya Nachikawaha Kulutwe
“Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.”—Yowano 3:16.
ACHISHINGANYEKENU HACHUMECHI: Kalunga amimona kupwa muvavalemu chikuma. Echi chikiko chamulingishile asuule Mwanenyi Yesu kupwa wana nakwiza nakumifwila. Wana kanou wamihana lutalililo lwakukapwa vakuwahilila nakukatwama haya myaka yosena. *
Numba tuhu chiyoyelo nachimikaluhwila nakumilingisa muhombe chikuma, oloze kulinangula Mazu aKalunga nakuzamisa lufwelelo lwenu mujishiko jaKalunga nachimikafwa. Kulinga ngocho nachimilingisa mupwenga vakuwahilila nakutachikiza ngwenu kuyoya chapwa chamwaza kaha nawa chachilemu.
^ par. 19 Nge munakusaka kulinangula vyavivulu kutalisa kundando yakusokola yaYesu nomu yinahase kuminganyalisa, kaha talenu vindiyo yakwamba ngwavo Kwanuka Kufwa chaYesu ha www.pr418.com/lue. Talenu havanavuluka ngwavo MIKANDA> JIVINDIYO > KUKUNGULUKA NAMULIMO WETU.
Pamo Nauzanga Nawa
VYAYETU
Mwomwo Ika Twatela Kulinangwila Mbimbiliya?
Mbimbiliya yinakukumbulula vihula vyavilemu vyavatu vavavulu mukaye. Kutala nayenu namusaka mbimbiliya yikumbulule vihula vyenu tahi?
KAPOSHI KAKUTALILA
Kulomba Nachimikafwa Ngachilihi?
Vyuma muka namunganyala nge namulombanga lwola lwosena?
KAPOSHI KAKUTALILA
Tweji Kunganyalanga Hakutuzakama Kuli Kalunga
Mazu aKalunga eji kutukafwa tupwenga nalufwelelo lwakukola nakufwelela Yehova havyuma atushika.
KAPOSHI KAKUTALILA
Mwomwo Ika Wana Atuhana Kalunga Wapwila Waulemu?
Vyuma muka vyeji kulingisanga wana umwe mwakuhana mutu upwenga waulemu kuhambakana ukwavo? Kushinganyeka havyuma tunavuluka chinahase kutukafwa tusakwilile Kalunga hakutuhana ndando yakusokola.
