Chachiwahi Kutwalekahu Kuhanda
YIBABA YINAFUMIHU yinakumwekesha makabi ashiyashana anateli kuletesha chihandilu kumwekana neyi chinakoli. Chimukuumikaña kukala kumunakumona, mukujinokaña neyi chihandilu chenu chalema hela neyi Nzambi wayakamenaña. Ilukenu nenu Nzambi watiyaña kutama neyi munakukabakana. Mwalema chikupu kumesu indi.
Nsoneki yaMasamu 86 wamukuhweleleli Nzambi chikupu chahosheliyi nindi: “Hefuku dinakamona ihuñu nakakutambika, muloña eyi waketiya.” (Masamu 86:7) Hela chochu, mukudihula nenu, ‘Nzambi wakañitiya ñahi “hefuku dinakamona ihuñu”?’
Hela chakwila mpinji yejima Nzambi hanateli kushikena dakufumishahu makabi imunakumonaku Izu dindi Bayibolu, datulejaña nawu wakayinka kuwunda kwamuyitoñojoka kukayikwasha kuumika: “Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.” (Fwilipi 4:6, 7) Mwani toñojokenu hanawa mavasi amuBayibolu chiyanateli kutukwasha kwiluka nawu Nzambi watwakamenaña.
Mwalala Nzambi Wayakamenaña
“Kwosi nzwimba niwumu avulamenañawu kudi Nzambiku. . . Enu mwalema kubadika anzwimba amavulu.”—Luka 12:6, 7, tumazu twaheshina.
TOÑOJOKENU HACHUMICHI: Nzwimba jamwekanaña neyi jalema wanyi kudi antu ilaña Nzambi wajilemesha. Nzambi havulamenaña nzwimba hela wumuku; yileñaleña yejima yekala yalema. Antu alema nankashi kudi Nzambi kubadika anzwimba. Antu ayileña ‘neyi chekalayi’ Nzambi, hayileñaleña yejima wena ayileña chakuhayamisha chakwila anateli kwikala nayilwilu yekala naNzambi nikuyimwekesha.—Kutachika 1:26, 27.
“Eyi Yehova, wunantali chachiwahi wunañiluki. . . . Washinshikaña munatoñojokaña. . . Ntali chachiwahi, eyi Nzambi, wiluki muchima wami; ñeseki, wiluki yitoñojoka yami.”—Masamu 139:1, 2, 23.
TOÑOJOKENU HACHUMICHI: Nzambi wayiluka hamuntu-hamuntu. Weluka kuzeyazeya kwetu niyuma yitwafwilaña. Antu amakwawu akwiluka wanyi kukala kumukweti, ilaña Nzambi welukaña nawa nakufwila kuyikwasha. Chumichi chinakumwekesha nawu mwalala wumi wenu walema.
Chihandilu Chenu Chalema
“Tiya chinukulomba eyi Yehova kubilela kwami kushiki kudeyi . . . . . . Nteñelekeli itu deyi; hefuku dinukutambika akañitiyi swayi . . . Natali mesu kwakulombawu ampwampu.”—Masamu 102:1, 2, 17.
TOÑOJOKENU HACHUMICHI: Chinamwekani neyi kufuma tuhu ifu datachikiliwu antu kukabakana, Yehova wahembaña madilu ejima ahololañawu. (Masamu 56:8) Nimadilu enu wayihembaña. Nzambi wanukaña makabi ejima nimadilu enu muloña mwalema kudi yena.
“Bayi wutiyaña womaku, ami yami Nzambi yeyi, nakakwinkaña ñovu; chalala nakakukwashañaku . . . Muloña ami Yehova Nzambi yeyi . . . nakakwilaña nami, ‘Bayi wutiya womaku, nukukukwashañaku.’”—Isaya 41:10, 13.
TOÑOJOKENU HACHUMICHI: Nzambi wadiloñesha kuyikwasha. Chimwakadimbuka, wakayinyamuna.
Kudi Kuchiñeja Kwakushakama Chiwahi Kumbidi
“Muloña Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.”—Yowanu 3:16.
TOÑOJOKENU HACHUMICHI: Nzambi wayikeñeli nankashi chakwila wayinkeli Mwanindi, Yesu neyi mulambu. Iwu mulambu wayinka kukoleka kwakwikala namuzañalu nakushakama haya nyaaka kumbidi. *
Hela chakwila chinakuyikalila nankashi kuumika, munateli kuumika neyi mudizaña Izu daNzambi nikukolesha chikuhwelelu chenu muyikaninu yaNzambi. Mukutiya kuwaha nawa mukumonaña nenu wumi walema.
^ Hakwila nawu mwiluki jajivulu kutalisha hamulambu waYesu, talenu vidiyo yaAnukenu Kufwa kwaYesu ha www.pr418.com/lun. Yenu hanasonekiwu nawu ABOUT US > MEMORIAL.
You May Also Like
CHITWEKALA
Muloñadi Wutwatela Kudizila Bayibolu Yejima?
Bayibolu yakula malwihu alema ehulañawu antu amavulu mwahita kaayi kejima. Mukukeña kwiluka ñakwilu?
KAPOSHI KAKUTALILA
Kulomba—Chikunateli Kuyikwasha
Neyi mulombaña mpinji yejima muchihandilu chenu, yumanyi yikafumamu?
KAPOSHI KAKUTALILA
Kwiluka Nenu Nzambi Wayakamenaña Kunateli Kuyikwasha
Nsona yatukwashaña kuchiñeja muyuma yatukanayi Nzambi
KAPOSHI KAKUTALILA
Chawaana chaNzambi Chabadika
Yumanyi yaleñelaña chawaana chimu kwikala chalema kubadika chikwawu? Kutoñojoka hayuma yamuchidiwu kukutukwasha kusakilila chikupu hefutu danyiloña.
