At tiquʼn tuʼn kukx tanqʼina
KYOJ xnaqʼtzbʼil ma che kyaj, ma tzʼel qnikʼ kyiʼj junjun tiʼchaq in tzaj bʼajxix qkʼuʼj kyuʼn ex kwest tuʼn kyikʼx quʼn. Bʼalo ax ikx teya tzma in nikʼa toj jun nya bʼaʼn ex in kubʼ t-ximana qa mintiʼ jun tiquʼn tuʼn tanqʼina ex qa mi jun in ximen tiʼja. Noqtzun tuʼnj, qeʼk tkʼuʼja tiʼj qa in tnaʼn Dios aju kʼixkʼoj in nikʼa toj. Nimxix toklena toj twitz Dios.
Tqʼama aj tzʼibʼil tiʼj Salmo 86 qa qʼuqli tkʼuʼj tiʼj Dios tej tqʼama jlu: «Ok in tzaj yajbʼil weye in xi nqanine onbʼil teya, porke in chin tzaj ttzaqʼweʼna» (Salmo 86:7). Bʼalo jaku kubʼ t-xjelina jlu: «¿Tzeʼn in qo tzaj ttzaqʼweʼn Dios aj qikʼ toj yajbʼil?».
Maske nya jun rat in xi tbʼinchaʼn Dios kyiʼj kykyaqil nya bʼaʼn in che tzaj qiʼj, noqtzun tuʼnj, in tzaj ttziyen qa kʼonil qiʼj tuʼn qex twitz. In tzaj ttziyen jlu qe toj Tyol: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te. Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze» (Filipenses 4:6, 7). Xnaqʼtzankuya qe taqikʼ Tyol Dios qo yolil kyiʼj ex kʼelel tnikʼa tiʼj jniʼ kʼujlaʼna tuʼn Dios.
At tkʼuʼj Dios tiʼja
Mi jun tal chyuʼj «nnikʼ tnaʼl tuʼn Dios. [...] Mas maʼ kyxilene kywitz nimku tal chyuʼj» (Lucas 12:6, 7).
XIMANA TIʼJ JLU: Axpe ikx jun tal chyuʼj moqa pichʼ, nim toklen toj twitz Dios. Tuʼntzunju, mas nim qoklen toj twitz Dios kywitz qe chyuʼj. Aʼye xjal mas nim kyoklen kywitz txqantl tbʼinchbʼen, tuʼnju o qo kubʼ tbʼinchaʼn ik tzeʼnx te tilbʼilal ex jaku che ten tbʼanel qmod ik tzeʼn te (Génesis 1:26, 27).
«Nman Dios, aya xpichʼul weye ex ojtzqiʼntl qine tuʼna; [...] bʼaʼntl nximbʼetze tuʼna. [...] Chin t-xpichʼun bʼaja ex ojtzqima wanmiye; e tikʼ twitza wiʼje ex ojtzqima tuj nnabʼle» (Salmo 139:1, 2, 23).
XIMANA TIʼJ JLU: Ojtzqiʼna tuʼn Dios. Ojtzqiʼn qe t-xima tuʼn ex aju in bʼaj tkʼuʼja tiʼj. Maske mintiʼ in nelxix kynikʼ txqantl tiʼjju kʼixkʼoj in tzaj tiʼja, atzunte Dios at tkʼuʼj tiʼja ex taj tuʼn tonin tiʼja. Tuʼntzunju, at nim tiquʼn tuʼn kukx tanqʼina.
At ttxolil tanqʼibʼila
«Nman Dios bʼintza nnaʼj Diose, in chin qanine onbʼil teya, chin tbʼintza. [...] Bʼix chin tzaj ttzaqʼweʼn naja ok ntxokone tiʼja. Ktzajel tbʼiʼn [Jehová] kynaʼj Dios qeju otoq che kyaj kolin nej» (Salmo 102:1, 2, 17).
XIMANA TIʼJ JLU: Ik tten jlu ik tzeʼn o kubʼ ttzʼibʼin Dios tajlal taʼl kywitz xjal o che oqʼ atxix tej ttzaj tzyet kyanqʼibʼil (Salmo 56:8). Kyxol jlu, ax ikx ateʼqe teya taʼl twitz. In nel tnikʼ Dios tiʼj tkyaqil nya bʼaʼn o tzaj tiʼja ex kykyaqil taʼl twitza o tzʼel, tuʼnju nim toklena toj twitz.
«Miʼn che xobʼe porke lu qine atine kyukʼile, miʼn bʼaj kykʼuʼje, aqine Kydiose. Kxel nqʼoʼne kyipumale ex chin onile kyiʼje, [...] aqine Dios aju Kymane, tzyuʼn qeye wuʼne ex o nmaye kyeye kyjaʼ: Miʼn che xobʼe, chin onile kyiʼje» (Isaías 41:10, 13).
XIMANA TIʼJ JLU: Taj Dios tuʼn tonin tiʼja. Qa ma kubʼ tzʼaqa, kjawil waʼbʼana tuʼn.
In qo ayon tiʼj jun tbʼanel ambʼil
«Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:16).
XIMANA TIʼJ JLU: Kʼujlaʼnxixa tuʼn Dios tuʼnju kubʼ t-ximen tuʼn ttzaj tqʼoʼn Tkʼwaʼl tuʼn tkyim tiʼja. Tuʼn chojbʼil lu in tzaj qʼoʼn ambʼil teya tuʼn tten tbʼanel tanqʼibʼila ex tuʼn ttzalaja te jumajx. *
Maske in tzaj bʼaj tkʼuʼja ex qa in kubʼ t-ximana qa kwest tanqʼibʼila, paʼmila ambʼil tuʼn t-xnaqʼtzana tiʼj Xjan Uʼj ex chʼiysama qʼuqbʼil tkʼuʼja kyiʼj ttziybʼil Dios. A jlu kʼonil tiʼja tuʼn ttzalaja ex tuʼn tel tnikʼa tiʼj qa at nim tiquʼn tuʼn tanqʼina
^ Qa tajbʼila chʼintl tqanil tiʼjju tbʼanel in tzaj tuʼn chojbʼil bʼant tuʼn Jesús, qʼonka twitza tiʼj video Nabʼitz Tkyimlen Jesucristo, aju at toj www.pr418.com/mam. Jaku tzʼokxa toj TQANIL KYIʼJ TESTIGOS DE JEHOVÁ > NABʼITZ TKYIMLEN JESUCRISTO.
Bʼalo ax ikx tgana jlu
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.
AJU XQʼUQIL
Aju naʼj Dios. ¿Alkye tten in nonin qiʼj?
¿Tiʼ jaku kubʼ tnaʼna qa ma naʼne Dios tkyaqil qʼij toj tanqʼibʼila?
AJU XQʼUQIL
¿Tzeʼn jaku tzaj tbʼanel teya tuʼn tkʼujlabʼil Dios?
In chʼiy qʼuqbʼil qkʼuʼj kyiʼj ttziybʼil Jehová tuʼn Xjan Uʼj.
AJU XQʼUQIL
Aju matij oyaj o tzaj tqʼoʼn Dios. ¿Tiquʼn nim toklen?
¿Alkyeqe tiquʼn in nok jun oyaj te nim toklen? Qa ma qo ximen kyiʼj jaku tzʼonin qiʼj tuʼn t-xi qqʼoʼn nim chjonte tiʼj chojbʼil.
