KATAK ko m̦oktal̦o̦k rekar kwal̦o̦k kõn elõñ kain apañ ko rel̦l̦ap me remaroñ kõm̦m̦an bwe en pen ad kijenmej. Ñe kwõj jelm̦ae apañ ko, jet iien kwõmaroñ jino l̦õmn̦ak el̦aññe elukkuun wõr tokjãn ñan mour ak el̦aññe ewõr en̦ ej kea kõn kwe. Keememej bwe el̦ap an Anij kea kõn kwe im apañ ko kwõj jelm̦aiki. El̦ap am̦ aorõk ippãn.

Eo me ear je bokin Sam 86 ej kwal̦o̦k an lõke Anij ilo an ba: “Ilo raan in aõ jorrããn inaaj kũr ñan Kwe, bwe kwõnaaj uwaak eõ.” (Sam 86:7, UBS) Meñe ãindein ak kwõmaroñ l̦õmn̦ak im ba, ‘Ewi wãween an nãj Anij uwaake eõ “ilo raan in aõ jorrããn”?’

Meñe Anij emaroñ jab kajju jol̦o̦k aolep apañ ko am̦, ak naan ko an ilo Baibõl̦ rej kallim̦uri eok bwe Anij emaroñ lewaj aenõm̦m̦an ñan eok bwe kwõn maroñ kijenmej. Baibõl̦ ej ba: “Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami.” (Pilippai 4:6, 7) Jouj im l̦õmn̦ak kõn wãween an eoon ko tok itulal̦ naaj kwal̦o̦k kõn an Anij lukkuun kea kõn kõj.

“Anij ejjab mel̦o̦kl̦o̦k juon iaaer [bao sparro ko]. . . . Kajjojo iaami el̦apl̦o̦k an aorõk jãn bwijin bao sparro!”​—Luk 12:6, 7, UBS.

L̦ÕMN̦AK KÕN MEN IN: Bao jiddik ko remaroñ jab jet men ko me armej rej watõki bwe raorõk, bõtab Anij el̦ap an kaorõki bao kein. Ejjel̦o̦k juon iaan bao kein renniñ ak sparro kein Anij ejjab loi ak jel̦a kaki, kajjojo iaaer el̦ap aer aorõk ippãn. El̦apl̦o̦k an aorõk armej ippãn Anij jãn bao sparro ko. Iaan aolep menin kõm̦anm̦an ko an Anij ilo lal̦ in, kõj armej ro jej menin kõm̦anm̦an ko me rej make wõt jejuwaer, kõnke Anij ear kõm̦anm̦an kõj ilo “wãween” wõt e. Bareinwõt, jemaroñ kaddekl̦o̦k im kwal̦o̦k kadkad ko rem̦m̦an kadkadin Anij.​—Jenesis 1:26, 27.

“O Irooj, kwaar etale eõ, im kwõjel̦ã wãweeõ.  . . Kwõjel̦ã l̦õmn̦ak ko aõ otemjej.  . . Kwõn mãlejjoñe eõ im kile l̦õmn̦ak ko aõ.”​—Sam 139:1, 2, 23, UBS.

L̦ÕMN̦AK KÕN MEN IN: El̦ap an Anij jel̦ã kõn kwe. Ejel̦ã kõn eñjake im l̦õmn̦ak ko am̦. Ro jet remaroñ jab mel̦el̦e kõn wãween ko reppen kwõj iiooni, meñe ãindein ak el̦ap an Anij kea kõn kwe im kõn̦aan jipañ eok. Eñin unin an lukkuun wõr tokjãn am̦ mour.

“Kwõn roñjake aõ jar O Jeova, im kwõn likũt aõ kũr bwe en iwõj ñan kwe. . . . Kwõn eo̦roñ eõ; ilo raan eo ke ij kũr, kwõn m̦õkaj in uwaak eõ. . . . [Enaaj] oktak ñan jar an ro ejjel̦o̦k [jabdewõt] ippãer.”​—Sam 102:1, 2, 17.

L̦ÕMN̦AK KÕN MEN IN: Ej ãinwõt ñe Jeova ear bwini m̦aantak kajjojo iaan dãnnin kõmjaal̦al̦ ko an aolep armej jãn jinoin an kar armej jino iioon eñtaan. (Sam 56:8) Ebar koba dãnnin kõmjaal̦al̦ ko am̦. Anij ej keememej aolep mãlejjoñ ko kwaar jelm̦aiki kab aolep dãnnin kõmjaal̦al̦ ko am̦ kõnke el̦ap am̦ aorõk ippãn.

“Kwõn jab lõl̦ño̦ñ, bwe ña am̦ Anij; Inaaj kõkajoor eok, aet, inaaj jipañ eok . . . Bwe ña Jeova, am̦ Anij, . . . [ij] ba ñan eok, ‘Kwõn jab mijak; Inaaj jipañ eok.’”​—Aiseia 41:10, 13.

L̦ÕMN̦AK KÕN MEN IN: Anij epojak in jipañ eok. Ñe kwõnaaj buñ enaaj kajutak eok.

“Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo”​—Jon 3:16, UBS.

L̦ÕMN̦AK KÕN MEN IN: Joñan an l̦ap am̦ aorõk ippãn Anij, ear m̦õn̦õn̦õ in letok eo Nejin, Jesus, bwe en katok kõn mour eo an kõn kwe. Menin katok in an ej kõpel̦l̦o̦k ial̦an am̦ maroñ mour ilo m̦õn̦õn̦õ im bõk juon mour eo el̦ap tokjãn ñan indeeo. *​—Lale kõmel̦el̦e eo itulal̦.