VIMPANDE vili mu Vutala vuno via muesa vati visoti via ku liseza-seza vi hasa ku tu lingisa ku tonda ku litsiha. Nga muli na ku hita mu cisoti ca kama mu hasa ku lihula, nga ku yoya ca kala seho ni nga kuli umo ua mi haka seho. Vunoni kalenu na vusunga ngecize Njambi ua haka seho ku lamba yenu. Muomu mua kala na seho kuli ikeye.

Mukua ku soneka Visamo 86 ua muesele lutsilielo kuli Njambi ngueni: “Ku litangua lia kayando kange, nji ka ku tambeka; Muomu ove u ka nji kuania.” (Visamo 86:7) Vunoni halumo mu hasa ku lihula ngueni vati Njambi a ka nji kumbulula ha “litangua lia kayando kange”?’

Vutuhu Njambi ka ka manusula visoti vienu mu litangua lia ngongo, vunoni Lizi lieni, Mbimbiliya, lia mi hana vusunga ngecize a ka mi hana ciyulo ca mutima na ku mi kuasa ku kolesa. Ngualio: “Na vimo viahi mu umina mitima; vunoni mu viose mu ku vundila na ku lambelela hamo na ku santsela, tumbulenu vizango vienu kuli Njambi. Kaha ciyulo ca Njambi cize ca hiana mana ose, ci ka niunga mitima yenu na visinganieka vienu muli Kilistu Yesu.” (Filipu 4:6, 7) Sukulukambu talenu vati evi vinimbu via mu Mbimbiliya vi mi kuasa ku kulahela ngecize Njambi ua mi haka seho.

“Na umo [kazila] uahi uavo va na mu suvu ku meso a Njambi . . . seho yenu i na hiana tuzila va vengi.”—Luka 12:6, 7.

ACI HILULENUHO: Vaze tuzila ve ku soloka ngue vangoco va kala na seho kuli Njambi. Cipue kaluzila kamo lika Njambi ke ku ka suva; vose va kala na seho kuli Ikeye. Vunoni kuli Njambi, seho ya vantu ya hiana cikuma-kuma tuzila. Muomu vantu vakevo cuma ca seho ya kama ca tangele Njambi ha mavu, kaha ua va tangele mu cifua ceni. Eci ca lomboloka ngecize va hasa ku lilongesa vifua vieni via cili na ku vi tambuluisa.—Njenisisi 1:26, 27.

“A Yehova, u na nji hilula, na ku nji tantekeya. . . . U tantekeya cisinganieka cange. . . . Nji hilule, . . . na ku tantekeya visinganieka viange.”​—Visamo 139:1, 2, 23.

ACI HILULENUHO: Njambi a mi tantekeya vuino. A tantekeya viose vi mue ku ivua ku mutima na ku lisosomua cenu. Vutuhu vamo ka va hasa ku ivuisisa visoti vienu, Njambi ua mi haka seho kaha a tonda ku mi kuasa! Mua vusunga evi vie ku vueza ku seho ya ku yoya.

“Ivua civundilo cange, A Yehova, Na mutambi uange u hete kuli ove. . . . Nji zendekele lituitui liove. . . . nji kuanie na kavuasi. Na halakana civundilo ca vaze ka vesi na vimo.”—Visamo 102:1, 2, 17.

ACI HILULENUHO: Ci na pu vene ngue tunde ha va putukila ku yanda vantu, Yehova ue ku tulika masozi ose a nkala muntu. Hamo lika na masozi enu. (Visamo 56:8) Njambi ue ku vuluka visoti na masozi enu muomu mua kala na seho kuli ikeye.

“Kati u ivue vuoma, muomu ange nji li nove; Kati u [ume mutima], muomu yange Njambi yove; Nji ka ku kolesa; Cili, nji ka ku kuasa. . . . Muomu yange, Yehova Njambi yove, Nji ka kuata livoko liove lia cilio, na ku handeka nove nguange, Kati u ivue vuoma; Nji ka ku kuasa.”—Isaya 41:10, 13.

ACI HILULENUHO: Njambi na liviukisila ku mi kuasa. Nga mu ua, a ka mi zundula na vimo lieni.

“Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.”—Yoano 3:16.

ACI HILULENUHO: Seho i mua kala nayo kuli Njambi ya kama mu njila ya ku linga, ua hetele na ha ku hana Muaneni umo lika Yesu, ku pua cikombelo. Cikombelo caco ca mi hana lulavelelo lua ku kala na vutumbe mu muono na ku yoya mu ndzolela ku miaka yose. a