IPAN nopa tlamachtili tlen tikitstokej kiijtoua kema pano se keski tlamantli tlen amo kuali, timoiljuiaj ayokmo uelis tikijiyouisej tlen techpano. Uelis ta nojkia tikixnamiki se tlaouijkayotl uan timoiljuia san tlapik tiitstok uan amo aka kitekipachoua tlen mitspano. Maske timoiljuia nopa, toTeotsij kiyolkokoua tlen mitspano pampa ya tlauel mitspatiita.

Katli kiijkuilok Salmo 86 kinextik motemachiyaya ipan toTeotsij kema kiijtok: “Nimitstsajtsilis ipan nopa tonali kema nechasis tlaouijkayotl, pampa san ta tinechnankilia uan tinechpaleuia” (Salmo 86:7). Uelis timotlajtlania: “¿Kenijkatsa techpaleuia toTeotsij kema timotekipachouaj?”.

Maske toTeotsij amo techkixtilis tokuesoljuaj, kena techmakas tlaseuilistli uan kiampa uelis tikijiyouisej. Ya techiljuia ipan Biblia: “Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj [...]. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo uan inmotlalnamikilis” (Filipenses 4:6, 7). Xijpoua se keski textos uan xikita kenijkatsa toTeotsij kitekipachoua tlen mitspano.

“ToTeko axkiilkaua niyon se [piltototsi]. [...] Achi más inmopati iixtla toTeko que miak totomej” (Lucas 12:6, 7).

XIMOILJUI NI: ToTeotsij tlauel kipatiita nochi tlen kichijchijtok, kej piltototsitsij. Uan nojua tlauel kinpatiita maseualmej. ToTeotsij tlauel techpatiita pampa techchijchijki kej ya “itlachialis”, yeka uelis tijpiasej uan tijnextisej kuajkuali tlamantli kej ya kinextia (Génesis 1:26, 27).

“ToTeko, ta tinechyoltlachilijtok uan tijmati nochi tlen na. [...] Uan kema niitstok uejka, ta tijmati tlachke nijpixtok ipan notlalnamikilis. [...] Xijyejyeko notlalnamikilis para tikitas intla xitlauak tlen nimoiljuia” (Salmo 139:1, 2, 23).

 XIMOILJUI NI: ToTeotsij tlauel kuali mitsixmati. Kimati tlake mitstekipachoua uan tlake tijyolmati. Maske uelis sekij amo kikuamachiliaj kenijkatsa titlaijiyouia ika nopa kuesoli tlen tijpia, toTeotsij kitekipachoua tlen mitspano uan kineki mitspaleuis. Kema timoiljuiaj ipan ni tlamantli, techpaleuia tikitasej amo san tlapik tiitstokej.

“¡ToTeko, xinechtlakakili kema nimomaijtoua! Xijchiua cuenta notlajtol kema nimitstsajtsilia para xinechpaleui. [...] ¡Ximopacho para tinechtlakakilis uan nimantsi xinechnankili kema nimitsnotsa!”. Jehová “kintlakakilis nopa teikneltsitsij kema momaijtosej” (Salmo 102:1, 2, 17).

XIMOILJUI NI: Kema pejki tlaijiyouilistli, toTeotsij kejuak pejki kiijkuiloua keski imiaka mochokilijtokej nochi maseualmej (Salmo 56:8). Uan nojkia kiitstok keskipa timochokilijtok. Ya kiilnamiki nochi kuesoli tlen mitspanotok uan kiitstok kenijkatsa tlauel timochokilijtok pampa tlauel mitspatiita.

“Amo ximokuesokaj pampa na niinmoTeko. Niinmechfuerzajmakas [uan] niinmechpaleuis. [...] Na niDios uan niinmoTeko [Jehová], niinmechiljuia: ‘Amo ximajmauikaj. Nikaj niitstok para niinmechpaleuis’” (Isaías 41:10, 13).

XIMOILJUI NI: ToTeotsij kineki mitspaleuis. Tlaj mitspanos se tlenijki, ya mitspaleuis tikijiyouis.

“ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16).

XIMOILJUI NI: ToTeotsij tlauel mitsiknelia uan yeka temaktilik iKone, Jesús, pampa kinejki mitsmakixtis. Jesús imikilis techpaleuia ma tijmatikaj kenke tiitstokej uan teipa uelis nochipa tiitstosej ika pakilistli. *