TLAMACHTILMEJ tlen intech yotimotlapouijkej kiteititiaj ualeua ijkuak tikixnamikij ouijkayotl sapanoa timoyolkokoaj. Xamo axkan itlaj mitspanoa uan timokuayejyekoa amitlaj ipati tiyoltos noso amikaj tiktekipachoa. Pero xikmato toTajtsin Dios moyolkokoa ijkuak titlajyouia. Ye sapanoa mitstlasojtla.

Akin okijkuilo Salmo 86 okiteititi okineltokaya tlen kijtoa toTajtsin Dios. Ik non, okijto: “Ijkuak nitlajyouis ne nimitsnotsas porque te technankilis” (Salmo 86:7). Pero xamo timotlajtlania: “¿Ken technankilia toTajtsin Dios ijkuak titlajyouiaj?”.

ToTajtsin Dios xamo amo san niman techkixtilis ouijkayotl. Pero ye kijtoa techmakas yolseuilistli uan non techpaleuis ma tikixnamikikan tlen techtlajyouiltia. Biblia kijtoa: “Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah. Iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis” (Filipenses 4:6, 7). Xikinmita ninmej textos uan tikitas toTajtsin Dios tiktekipachoa.

Totomej toTajtsin Dios “amo kinmilkawa nion seme de yejwah. [...] Porke nomejwah okachi miak nomopati ke n tototsitsinteh” (Lucas 12:6, 7).

XIMOKUAYEJYEKO: ToTajtsin Dios sapanoa kinpatioita gorriones maski tsikitsitsintin. Pero tejuan okachi techtlasojtla. Otechchijchi ken ye porque tejuan ueli tikteititiaj iyelis (Génesis 1:26, 27).

“Jehová te nochi yotechtlatemoli uan techixmati. [...] Tikmati tlen nimokuayejyekoa. [...] Xikixmati tlen nimokuayejyekoa uan tlen nechtekipachoa” (Salmo 139:1, 2, 23).

XIMOKUAYEJYEKO: ToTajtsin Dios mitsixmati. Kimati tlen tikmachilia uan tlen mitstekipachoa. Oksekimej amo kajsikamatij tlen mitstlajyouiltia. Pero ToTajtsin Dios mitsajsikamati uan kineki mitspaleuis. Non mitspaleuis tiknekis tiyoltos.

“Oh Jehová techkaki ijkuak nimotlatlaujtia uan moixpan ma ajsiti ijkuak nichoka. [...] Techkaki ijkuak nimitsnotsa, san niman technankili ijkuak nimitsnotsa”. Jehová “kinkakis ijkuak motlatlaujtiskej akinmej amitlaj kipiaj” (Salmo 102:1, 2, 17).

XIMOKUAYEJYEKO: Yetoskia ken toTajtsin Dios kinnechikolijti nochtin inmixayo (Salmo 56:8). Noijki yokinechiko moixayo. Kilnamiktok tlen ouijkayotl tikixnamiki uan nochi tlen yotichokak.

“Amo ximomojti, ne mouan nika. Amo ximotekipacho, ne nimoDios. Ne nimitsyolchikauas, kema, ne nimitspaleuis. [...] Jehová [...] mitsiluia: ‘Amo ximomojti. Ne nimitspaleuis’” (Isaías 41:10, 13).

XIMOKUAYEJYEKO: ToTajtsin Dios kineki mitspaleuis. Tla tiuetsis, ye mitspaleuis ximoketsa.

“Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16).

XIMOKUAYEJYEKO: ToTajtsin Dios sapanoa mitstlasojtla porque okitemakak iKone mopatka ma mikiki. Non mitspaleuis xiyolpaki ijkuak tikpias yolilistli tlen amo keman tlamis. a