अघिल्लो लेखहरूमा बताइएजस्तै हामीले जीवनमा सहनै नसक्ने परिस्थितिहरूको सामना गर्नुपर्ने हुन सक्छ। समस्याहरूको सामना गर्नुपर्दा ‘जीवनको कुनै अर्थ छैन वा कसैले पनि मेरो ख्याल राख्दैन’ जस्तो लाग्न सक्छ। तर परमेश्‍वरले तपाईँको ख्याल राख्नुहुन्छ भन्‍ने कुरामा ढुक्क हुनुहोस्‌। उहाँको लागि तपाईँ अनमोल हुनुहुन्छ।

भजन ८६ का लेखकले परमेश्‍वरप्रतिको आफ्नो भरोसा यसरी व्यक्‍त गरे: “मेरो सङ्‌कटको दिनमा म तपाईँलाई पुकार्छु किनकि तपाईँ मलाई जवाफ दिनुहुन्छ।” (भजन ८६:७) तर तपाईँलाई लाग्ला, ‘“सङ्‌कटको दिनमा” परमेश्‍वरले मलाई कसरी जवाफ दिनुहुन्छ?’

परमेश्‍वरले तपाईँको सबै समस्याहरू अहिले नै हटाउनुहुन्‍न होला। तर उहाँ तपाईँलाई सहने बल दिन सक्नुहुन्छ भनेर परमेश्‍वरको वचन बाइबलमा बताइएको छ। बाइबल यसो भन्छ: “कुनै कुराको विषयमा चिन्तित नहोओ तर हरेक कुरामा प्रार्थना, उत्कट बिन्ती र धन्यवादका साथ आफ्नो निवेदन परमेश्‍वरसमक्ष जाहेर गर। तब परमेश्‍वरको शान्ति, जुन मानिसको समझभन्दा बाहिरको छ, त्यसले ख्रिष्ट येसुद्वारा तिमीहरूको हृदय र तिमीहरूको विचारको रक्षा गर्नेछ।” (फिलिप्पी ४:६, ७, फुटनोट) तल दिइएका पदहरूले परमेश्‍वर साँच्चै हाम्रो ख्याल राख्नुहुन्छ भनेर कसरी विश्‍वस्त बनाउँछ, विचार गर्नुहोस्‌।

“एउटा [भँगेरा] पनि परमेश्‍वरले बिर्सनुहुन्‍न। . . . तिमीहरू थुप्रै भँगेराभन्दा बहुमूल्य छौ।”—लुका १२:६, ७.

विचार गर्नुहोस्‌: कुनै मोल नभएको जस्तो देखिने स-साना चराहरूको पनि परमेश्‍वर ख्याल राख्नुहुन्छ। एउटा सानो भँगेरालाई पनि परमेश्‍वर बिर्सनुहुन्‍न। उहाँको नजरमा सबैको जीवन बहुमूल्य छ। परमेश्‍वरको नजरमा मानिसहरू भँगेराभन्दा कैयौँ गुणा बहुमूल्य छन्‌। परमेश्‍वरकै “स्वरूपमा” सृष्टि गरिएकोले मानिसहरू उहाँको उत्कृष्ट गुणहरू देखाउन सक्छन्‌।—उत्पत्ति १:२६, २७.

“हे यहोवा, तपाईँले मलाई राम्ररी जाँच्नुभएको छ र मलाई चिन्‍नुभएको छ। . . . मेरा विचारहरू तपाईँ . . . थाह पाउनुहुन्छ। . . . मलाई पारख गरेर हेर्नुहोस्‌ र मेरो मनको चिन्ता थाह पाउनुहोस्‌।”—भजन १३९:१, २, २३.

विचार गर्नुहोस्‌: परमेश्‍वर तपाईँलाई राम्रोसँग चिन्‍नुहुन्छ। तपाईँको भित्री भावना र विचारहरू उहाँलाई राम्रोसँग थाह छ। तपाईँमाथि आइपरेका समस्याहरूबारे अरूलाई थाह नहोला तर परमेश्‍वरलाई थाह छ। अनि उहाँ तपाईँको ख्याल राख्नुहुन्छ। उहाँ तपाईँलाई मदत गर्न चाहनुहुन्छ। यो कुराले साँच्चै हाम्रो जीवनलाई अर्थपूर्ण बनाउँछ।

“हे यहोवा, मेरो प्रार्थना सुन्‍नुहोस्‌; मेरो गुहार तपाईँसम्म पुगोस्‌। . . . मतिर आफ्नो कान फर्काउनुहोस्‌, मैले पुकार्दा मलाई झट्टै जवाफ दिनुहोस्‌। . . . उहाँले बेसहाराहरूको प्रार्थनामा ध्यान दिनुहुनेछ।”—भजन १०२:१, २, १७.

विचार गर्नुहोस्‌: दुःखकष्टको कारण मानिसजातिले बगाएको प्रत्येक आँसु यहोवाले जम्मा गर्नुभएको छ अर्थात्‌ याद गर्नुभएको छ भनी बाइबल बताउँछ। (भजन ५६:८) यहोवाले तपाईँले बगाउनुभएको आँसु पनि बिर्सनुभएको छैन। यहोवा तपाईँले भोग्नुभएको प्रत्येक समस्या र तपाईँले बगाउनुभएको प्रत्येक आँसु सम्झनुहुन्छ किनभने उहाँको नजरमा तपाईँ अनमोल हुनुहुन्छ।

“फिक्री नगर किनकि म तिम्रा परमेश्‍वर हुँ। म तिमीलाई बलियो पार्नेछु र तिमीलाई मदत गर्नेछु। . . . म यहोवा तिम्रा परमेश्‍वर . . . तिमीलाई भन्छु, ‘नडराऊ, म तिमीलाई मदत गर्नेछु।’”—यसैया ४१:१०, १३.

विचार गर्नुहोस्‌: परमेश्‍वर तपाईँलाई मदत गर्न इच्छुक हुनुहुन्छ। उहाँले तपाईँलाई सम्हाल्नुहुनेछ।

“किनकि परमेश्‍वरले संसारलाई यत्ति धेरै प्रेम गर्नुभयो कि उहाँले आफ्नो एक मात्र छोरा दिनुभयो ताकि ऊमाथि विश्‍वास गर्ने कोही पनि नाश नहोस्‌ तर उसले अनन्त जीवन पाओस्‌।”—युहन्‍ना ३:१६.

विचार गर्नुहोस्‌: परमेश्‍वरले तपाईँलाई यत्ति धेरै प्रेम गर्नुभयो कि उहाँले तपाईँको लागि आफ्नो एक मात्र प्रिय छोरा येसु बलिदानको रूपमा दिनुभयो। यसले गर्दा तपाईँले भविष्यमा सुखी र उद्देश्‍यपूर्ण जीवन बिताउने आशा पाउनुभयो। *