Oto vulu okukala nonkalamwenyo tayi ti sha
IITOPOLWA yopetameko otayi ulike nkene iiningwanima yinyanyalitha yi ili noyi ili tayi vulu okuningitha onkalamwenyo yi kale ondhigu noonkondo. Sho to idhidhimikile omaupyakadhi goye, otashi vulika wu ipule ngele onkalamwenyo oyi na ngaa eityo nenge ngele opu na ngaa ngoka e na ko nasha nangoye. Kala wu na uushili kutya Kalunga oku na ko nasha nangoye, nonando owu li momaupyakadhi. Owu na ondilo momeho ge.
Omunyoli gwEpisalomi 86 okwa li u ulike kutya okwi inekela Kalunga, sho a ti: “Otandi ku ithana ethimbo kehe lyuudhigu, oshoka oho yamukula omaindilo gandje.” (Episalomi 86:7) Ihe otashi vulika to ipula to ti: “Kalunga ota ka yamukula ndje ngiini ‘pethimbo lyuudhigu’ wandje?”
Nonando Kalunga itaka kutha po omaupyakadhi gwoye nziya, Oohapu dhe Ombiimbeli otadhi ku shilipaleke kutya ota vulu oku ku pa ombili yi ku kwathele wu idhidhimike. Otadhi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni.” (Aafilippi 4:6, 7) Tala nkene oovelise dhOmbiimbeli tadhi ku shilipaleke kutya Kalunga oku na ko nasha nangoye.
Kalunga oku na ko nasha nangoye
“Kaku na nando olimwe [enza] lya dhimbiwa kuKalunga. . . . one mu vule omanza ogendji.” — Lukas 12:6, 7.
DHILADHILA KWAASHIKA: Uudhila uushona ngaashi omanza aantu oyendji otashi vulika ye wu tala ko inaawu simana, ihe Kalunga oku na ko nasha nawo. Nokuli nokanza okashona Kalunga oku ka wete, nakehe kamwe oke na ondilo momeho ge. Aantu oye na ongushu kuJehova ye vule omanza. Aantu oyo iishitwa ya dhenga mbanda mbyoka Kalunga a shitila kevi. Oya shitwa “oshifetha” she notaya vulu okukokeka nokuulika omaukwatya omawanawa ngoka e na.— Genesis 1:26, 27.
“Omuwa, ongoye to konakona ndje nowa tseya ndje. . . . Omadhiladhilo gandje agehe oto ga tseya. . . . Tala ndje, u dhimbulule omadhiladhilo gandje.”— Episalomi 139:1, 2, 23.
DHILADHILA KWAASHIKA: Kalunga oku ku shi nawanawa. Oku shi omaiyuvo goye gomuule naashoka ho kala to ipula nasho. Nonando yalwe otashi vulika kaayu uvite ko omaupyakadhi goye niimpwiyu yoye, Kalunga oku na ko nasha nangoye nokwa hala oku ku kwathela. Shika otashi ningitha onkalamwenyo yoye yi kale tayi ti sha.
Onkalamwenyo yoye otayi ti sha
“Omuwa, uva egalikano lyandje, pulakena, sho tandi ku lilile ekwatho! . . . Pulakena eindilo lyandje, yamukula ndje mbala, sho tandi ku ithana! . . . Ota ka uva omagalikano gomapongo.”— Episalomi 102:1, 2, 17.
DHILADHILA KWAASHIKA: Jehova okwa kala nokupungula omahodhi gaantu okuza ngaa petameko lyokumona iihuna kwawo. (Episalomi 56:8) Nomahodhi goye oga kwatelwa mo. Oha dhimbulukwa omashongo goye agehe nomahodhi goye, molwaashoka owu na ongushu momeho ge.
“Ongame Kalunga koye— ino limbililwa! Otandi ku kankameke e tandi ku kwatha. . . . ongame Omuwa Kalunga koye; otandi ku tsu omukumo te ti: ‘Ino tila; otandi ku kwatha.’”— Jesaja 41:10, 13.
DHILADHILA KWAASHIKA: Kalunga okwi ilongekidha oku ku kwathela. Uuna wu li muudhigu ote ku kwathele.
Otu na etegameno kutya otaku ka kala onakuyiwa ombwanawa
“Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”— Johannes 3:16.
DHILADHILA KWAASHIKA: Kalunga oku ku hole noonkondo, nomolwaashono e ku pe nehalo ewanawa Omwana, Jesus, e li eyambo, a se pehala lyoye. Eyambo ndika olye ku pa ompito wu kale wa nyanyukwa nowu kale nonkalamwenyo tayi ti sha sigo aluhe. *
Nonando otashi vulika wu li muudhigu nowu wete itoo vulu we okwiidhidhimikila onkalamwenyo, konakona nuukeka Oohapu dhaKalunga e to koleke eitaalo lyoye momauvaneko ge. Shika otashi ku kwathele wu kale wa nyanyukwa nowu na omukumo kutya oto vulu okukala wu na onkalamwenyo tayi ti sha.
^ Opo wu ilonge oshindji kombinga yankene to vulu okumona uuwanawa mekuliloyambo lyaJesus, tala okavidio Edhimbuluko lyeso lyaJesus kepandja lyetu lyokointaneta, www.pr418.com/ng. Thinda mpoka pwa nyolwa KOMBINGA YETU > EDHIMBULUKO.
Opu na ishewe uuyelele mbuka
KOMBINGA YETU
Omolwashike wa pumbwa okukonakona Ombiimbeli?
Ombiimbeli otayi kwathele aantu omamiliyona ya mone omayamukulo gomapulo ga simana monkalamwenyo. Mbela nangoye owa hala okumona omayamukulo gomapulo ngoka?
OSHUNGOLANGELO
Nkene esiloshimpwiyu lyaKalunga tali vulu oku ku etela uuwanawa
Omanyolo ohage tu kwathele tu kale tu na eitaalo momauvaneko gaJehova omawanawa kombinga yonakuyiwa.
OSHUNGOLANGELO
Omagano ngoka Kalunga e tu pa oge na ondilo
Oshike sha ningitha omagano gontumba ga kale ge na ondilo ge vule omakwawo? Okudhiladhila kombinga yaashoka otashi tu kwathele tu pandule noonkondo ekulilo.
