DIHLOGO tše di fetilego di bontšhitše kamoo mathata a ka dirago gore re ikwe re se sa nyaka go phela. Le wena ge o dutše o kgotleletše mathata a gago, o ka bona eka go phela ga go sa le bohlokwa goba gore batho ga ba na taba le wena. Eupša kgodišega gore Modimo o bona mathata a gago e bile o na le taba le wena. Tseba gore o bohlokwa go yena.

Mongwadi wa Psalme 86 o be a tshepile Modimo. O itše: “Mohlang ke le tlalelong ke tla go bitša, gobane o tla nkaraba.” (Psalme 86:7) Eupša o ka ipotšiša gore: ‘Nna Modimo o tla nkaraba bjang “mohlang ke le tlalelong”?’

Le ge Modimo a ka se tloše mathata a gago di tloga fase, Lentšu la gagwe e lego Beibele, le re a ka go thuša gore o be le khutšo ya monagano le go kgotlelela mathata a gago. Le re: ‘O se ke wa belaela ka selo, eupša dilong tšohle tsebiša Modimo dikgopelo tša gago ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša pelo ya gago le matla a gago a monagano.’ (Bafilipi 4:6, 7) Hle ekwa kamoo ditemana tše di latelago tša Beibele di re kgodišago gore Modimo o tloga a na le taba le rena.

Ge Luka 12:6, 7 e bolela ka dinonyana tše di bitšwago dithaga e re: “Ga go le e tee ya tšona ye e lebalwago pele ga Modimo. . . . Le ba bohlokwa go feta dithaga tše dintši.”

NA O BE O TSEBA? Batho ba bantši ga ba na taba le dinonyana, eupša Modimo o na le taba le tšona. Beibele e re dinonyana ka moka, go akaretša le dithaga, di bohlokwa go Modimo. Ge e ba Modimo a bona dinonyana di le bohlokwa, gona go ra gore batho ba bohlokwa kudu le go feta go yena. Ka baka la’ng? Ka baka la gore batho ke dibopiwa tše di ikgethilego tša Modimo. O ba bopile ka seswantšho sa gagwe, e lego se se bolelago gore ba kgona go bontšha dika tša gagwe tše dibotse.—Genesi 1:26, 27.

Psalme 139:1, 2, 23 e re: “Wena Jehofa, o mphetlekile gomme o a ntseba. . . . O etše hloko dikgopolo tša ka. . . . Ntlhahlobe o tsebe dikgopolo tša ka tše di mpherekanyago.”

NA O BE O TSEBA? Modimo o go tseba gabotse. O tseba gore o ikwa bjang le dilo tšeo di go tshwenyago. Le ge batho ba bangwe ba ka no se kwešiše mathata a gago, Modimo yena o na le taba le wena e bile o nyaka go go thuša. Se ke bohlatse bja gore o nyaka gore o thabele bophelo.

Psalme 102:1, 2, 17 e re: “Ekwa thapelo ya ka hle Jehofa; anke sello sa ka sa go llela thušo se tle go wena. . . . Ntshekegele tsebe; mohlang ke go bitša o itlhaganele, o nkarabe. . . . [Jehofa] o tla araba dithapelo tša bao ba hutšwego dilo ka moka.”

NA O BE O TSEBA? Ga e sa le batho ba thoma go ba le mathata, Jehofa o be a dutše a ba kwela bohloko. (Psalme 56:8) Le wena o go kwela bohloko. Ka ge o le bohlokwa kudu go yena, o tla dula a go thekga ge o na le mathata le ge o lla.

Jesaya 41:10, 13 e re: “O se ke wa lealea gobane ke Modimo wa gago. Ke tla go matlafatša. Ruri ke tla go thuša . . . [Ke] nna Jehofa Modimo wa gago . . . , Yena yo a rego go wena: ‘O se ke wa boifa. Ke tla go thuša.’”

NA O BE O TSEBA?: Modimo o ikemišeditše go go thuša. Ge o welwa ke mathata, o tla go thuša go lebeletšana le ona.

Johane 3:16 e re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”

NA O BE O TSEBA? Go bontšha gore o bohlokwa kudu go Modimo, o rometše Morwa wa gagwe e lego Jesu gore a tle a go hwele. Ka baka la lehu la Jesu, le wena o ka ba le sebaka sa go tlo phela ka mo go sa felego mo lefaseng o thabile. *