Omokonda Yatyi Okukala Nomuenyo Tyina Esilivilo
ONONTHELE mbokuatetekela, mbalekesa okuti tyina tuna ovitateka, tupondola okulitehelela okuti omuenyo utupu esilivilo. Upondola okukoleleya movitateka una, mahi kala nonthumbi yokuti omuenyo una esilivilo, iya pena umwe wii nawa oñgeni ulitehelela. Kala nonthumbi yokuti Huku wii ovitateka viove. Ove wakolela unene kwe.
Omuhoneki wo Salmo 86, wapopia onthumbi ankho ena mu Huku. Wati: “Ndyikuihana monthiki yonombumbi mbange, mokonda ove monkhumbulula.” (Salmo 86:7) Mahi upondola okulipula okuti: ‘Oñgeni Huku mankhumbulula “monthiki yononkhumbi mbange”?’
Namphila Huku kamekupolo ovitateka viove liwa-liwa, mahi Ondaka yae Ombimbiliya, ipopia okuti ove upondola okukala nombembwa maikukuatesako. Yati: “Muhakalei notyiho notyipuka natyike, mahi mu kese tyipuka likuambelei, amulivondela ku Huku kumwe nokupandula, amunoñgonokesa Huku etyi muiita, iya ombembwa ya Huku, ipona enoñgonoko aliho maiyungu omitima vienyi nomalusoke enyi.” (Filipu 4:6, 7) Tala oñgeni onoversikulu ombu mbulekesa okuti Huku wesuka nonthue.
Huku Wesuka Nove
“Natyike poviila ovio Huku alimbwa. . . . onwe muna vali esilivilo tyipona oviila ovinyingi.” — Luka 12:6, 7.
SOKA KUETYI: Okaila okatutu kovanthu kapondola okumoneka ngatyina kehena esilivilo, mahi ku Huku kakolela unene. Tyina okaila keke vala kamatoko, Huku utyimona, mokonda ovipuka aviho atunga vina esilivilo. Mahi ovanthu vena vali esilivilo koviila. Ovanthu vatungwa “otyifuika” tya Huku, tyilekesa okuti vapondola okukala novituwa viae. — Gênesis 1:26, 27.
“Ove Siovaa, wovola okunoñgonoka, iya undyi nawa . . . Omalusoke ange weete . . . Ovola okunoñgonoka omalusoke ange anthyukalalesa.” — Salmo 139:1, 2, 23.
SOKA KUETYI: Huku ukwii nawa. Wii omalusoke ove, novipuka vikusukalalesa. Tyipondola ovanthu ovakuavo kavanoñgonoka ovitateka viove, mahi Huku wesuka nove iya uhanda okukukuatesako. Otyo tyipondola okukukuatesako okunoñgonoka okuti omuenyo una esilivilo enene.
Omuenyo Wetu Una Esilivilo
“Siovaa, tehelela elikuambelo liange; kuove kuhike ondaka yange yokuita ekuateso . . . Nthehelele-vo, nkhumbulule liwa tyina ndyikuihana. . . . Matehelela elikuambelo liavana vesukisa ekuateso. — Salmo 102:1, 2, 17.
SOKA KUETYI: Ongatyina Siovaa apaka nawa ononkhuka mba kese munthu mokonda, yovitateka ekahi nokulambela. (Salmo 56:8) Notyitateka tyikuetela ononkhumbi utyii nawa. Huku uhinangela ovitateka nomasuka-suka ove, mokonda ove wakolela unene kwe.
“Uhakale notyiho, mokonda ame ndyi Huku yove. Mandyikupameka. Tyotyili mandyikuvatela . . . Ame, Siovaa Huku yove . . . Una okupopila okuti: ‘Uhakale nowoma. Ame mandyikukuatesako.’” — Isaías 41:10, 13.
SOKA KUETYI: Huku wafuapo opo ekukuateseko. Inkha utoka, mekupindula-po.
Opi Movasi Onkhalelo Yomuenyo Ikahi Nawa?
“Mokonda Huku una unene oluembia nouye, waava Omona wae wongunga, opo kese omunthu ukala nekolelo mwe ahakahanyue-ko, mahi akakale nomuenyo uhapu.” — Suau 3:16.
SOKA KUETYI: Huku ukuhole unene mokonda waava omona wae, Sesusi, ngotyilikutila pala ove. Otyilikutila otyo tyikuavela omphitilo yokukakalako apeho nehambu. a
Namphila ulambela movitateka, iya omuenyo wove ukahi ngatyina uhena esilivilo, lilongesa Ondaka ya Huku, iya opameka ekolelo liove momilao viae. Mokala nehambu iya okala nonthumbi yokuti omuenyo una esilivilo.
a Opo unoñgonoke vali oñgeni upondola okupola ouwa kotyilikutila tya Sesusi, tala ovidiu yati: Okuhinangela Ononkhia mba Sesusi ikahi mo internet mo www.pr418.com. Tala pana patyi ONTHUE VALIE > EHINANGELO LIONONKHIA MBA SESUSI KILISITU.
Hamwe Noove Uhanda
ONTHUE VALIE
Oityi Wesukisila Okulilongesa Ombimbiliya?
Ombimbiliya ina omakumbululo omapulo omanene ovanthu ovanyingi mouye vena. Okuti noove una limwe uhanda okunoñgonoka?
OMUTALA WOMULAVI
Okulikuambela—Tyipondola Okukuetela-Tyi
Inkha ulikuambela apeho, oityi upondola okukevelela?
OMUTALA WOMULAVI
Oñgeni Upondola Okupola owa Kokukuatesuako na Huku
Ombimbiliya ipondola okukuatesako okukala nekolelo nokuyumba onthumbi momulao wa Huku konthele yo komunthue wandyila.
OMUTALA WOMULAVI
Omokonda Yatyi Otyiawa tya Huku Tyakolela Unene
Oityi tyikalesa otyiawa nesilivilo enene kovikuavo? Okusoka kuotyo tyipondola okutukuatesako okukala nolupandu nofeto yeyovo.
