Ɛhɛe, ƆWƆ KƐ Ɛtɛnla Ngoane Nu
EDWƐKƐ NGAKYILE mɔɔ li ɛhye anyunlu la maa yɛnwu kɛzi ngyegyelɛ ngakyile kola maa asetɛnla yɛ se la. Saa ɛlɛnwu amaneɛ a wɔannea a ɛbaha kɛ nvasoɛ ɛnle zo kɛ ɛbadɛnla ngoane nu anzɛɛ awie bɔbɔ ɛndwenle ɛ nwo. Nwu ye kɛ Nyamenle dwenle wɔ ngyegyelɛ ne mɔ anwo kpalɛ. Ɛsonle bolɛ ɛmaa ye.
Edwɛndolɛ 86 kɛlɛvo ne lale anwodozo mɔɔ ɔlɛ ye wɔ Nyamenle anu la ali kɛ: “Kenle biala mekɔ ngyegyelɛ nu a mesu mefɛlɛ wɔ, ɔboalekɛ mefɛlɛ wɔ a ɛdie me zo.” (Edwɛndolɛ 86:7) Bie a ɛbabiza ɛ nwo kɛ, “Kɛzi Nyamenle die me zo wɔ ‘kenle biala mɔɔ mekɛhɔ ngyegyelɛ nu’ la ɛ?”
Ɔwɔ nu kɛ Nyamenle ɛnrɛye wɔ ngyegyelɛ ne ɛnrɛvi ɛkɛ ne kɛkala, noko ye Edwɛkɛ Baebolo ne bamaa wɔanwu kɛ ɔbahola yeamaa wɔanyia anzodwolɛ: ‘Bɛmmadwenle debie biala anwo, emomu wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne mɔɔ bo ndelebɛbo muala azo la babɔ bɛ ahonle nee bɛ adwenle nzuzulɛ nwo bane.’ (Felepaema 4:6, 7) Yɛsɛlɛ wɔ, suzu kɛzi Ngɛlɛlera ɛhye mɔ maa yɛnyia anwodozo kɛ Nyamenle dwenle yɛ nwo la anwo.
Nyamenle Dwenle Ɛ Nwo
‘Nyamenle ɛmbu ɔ nye ɛngua ngɛsanloma ɛhye mɔ anu ko bɔbɔ azo, ɛsonle bolɛ ɛtɛla ngɛsanloma dɔɔnwo.’—Luku 12:6, 7, ɔ bo ɛkɛ edwɛkɛ ne.
DWENLE NWO: Nyamenle dwenle nloma ngyikyi mɔɔ menli dɔɔnwo ɛmbu bɛ bie la anwo. Ɔ nye wɔ nloma ngyikyi ɛhye mɔ anwo; bɛ nuhua ko biala sonle bolɛ. Sonla anwo hyia Nyamenle kpalɛ tɛla ngɛsanloma. Sonla le Nyamenle abɔdeɛ mɔɔ wɔ azɛlɛ ye azo la anu titili, ɔbɔle sonla kɛ ye “ɛsaso,” na bɛkola bɛnyia ye subane ne mɔ mɔɔ yɛ nwanwane la bie na bɛda bɛ ali.—Mɔlebɛbo 1:26, 27.
‘O Gyihova, wɔnleɛnlea me nu wɔnwu me. Ɛze me adwenle. Sɔ me nea, na nwu me adwenle.’—Edwɛndolɛ 139:1, 2, 23.
DWENLE NWO: Nyamenle ze wɔ kpalɛ. Ɔze wɔ nganeɛdelɛ nee wɔ ngyegyelɛ muala. Bie a awie mɔ ɛnrɛde wɔ ngyegyelɛ ne abo, noko Nyamenle dwenle ɛ nwo na ɔkulo kɛ ɔboa wɔ. Ɔlua ɛhye ati nvasoɛ wɔ zo kɛ ɛbadɛnla ngoane nu.
Wɔ Ɛbɛlabɔlɛ Lɛ Bodane
‘O Gyihova, tie me nzɛlɛlɛ; maa me ɛzunlɛ ɛdwu ɛ nyunlu. Gyele ɛ nzo tie me; saa mefɛlɛ wɔ a die me zo ndɛndɛ. Ɔbadie bɛdabɛ mɔɔ bɛnlɛ awie la nzɛlɛlɛ.’—Edwɛndolɛ 102:1, 2, 17.
DWENLE NWO: Ɔle kɛ asɛɛ ɔvi alesama amaneɛnwunlɛ mɔlebɛbo ne ala yɛɛ Gyihova bɔle ɔ bo kɛ ɔbu monle biala mɔɔ alesama ɛhwi la anwo mgbonda a. (Edwɛndolɛ 56:8) Wɔ monle boka nwo. Ɔluakɛ ɛsonle bolɛ ɛmaa Nyamenle la ati, ɔkakye wɔ sɔnea biala nee wɔ monle.
“Bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ . . . Ɔluakɛ medame, [Gyihova] bɛ Nyamenle . . . melɛka meahile bɛ: ‘Bɛmmasulo na mebaboa bɛ.’”—Ayezaya 41:10, 13.
DWENLE NWO: Nyamenle ɛziezie ɔ nwo kɛ ɔboa wɔ. Ɛtɔ aze a, ɔbamaa wɔ zo.
Anyelazo Kpalɛ Bie Wɔ Ɛkɛ Ne Kenle Bie
“Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.”—Dwɔn 3:16.
DWENLE NWO: Ɛ nwo hyia Nyamenle kpalɛ yemɔti yevi ye ahonle nu yeva ɔ Ra, Gyisɛse yebɔ afɔle yemaa wɔ. Afɔlebɔlɛ ɛhye bamaa wɔanyia nwolɛ adenle wɔava anyelielɛ wɔadɛnla aze dahuu. *
Ɛbayia ngyegyelɛ yɛɛ ɛbɛlabɔlɛ ne bahola avonle wɔ ɛdeɛ noko sukoa Nyamenle Edwɛkɛ ne kpalɛ na maa diedi mɔɔ ɛlɛ ye wɔ ye ɛwɔkɛ ne mɔ anu la ɛyɛ kpole. Ɔbamaa ɛ nye alie na wɔanyia anwodozo kɛ nvasoɛ wɔ zo kɛ ɛbadɛnla ngoane nu.
^ Amaa wɔazukoa kɛzi Gyisɛse afɔlebɔlɛ ne bahola aboa wɔ la anwo edwɛkɛ dɔɔnwo la, nea Bɛhakye Gyisɛse Ewule Ne vidio ne mɔɔ wɔ www.pr418.com/nzi azo la. Nea YƐ NWO EDWƐKƐ > NGAKYELƐLILƐ abo.
Bie A Eza Ɛ Nye Balie
YƐ NWO EDWƐKƐ
Duzu Ati A Ɔwɔ Kɛ Ɛsukoa Baebolo Ne A?
Baebolo ne ɛlɛboa menli mɔɔ wɔ ewiade la anu mgbe dɔɔnwo yeamaa bɛanyia kpuya mɔɔ gyegye bɛ la anwo mualɛ. Ɛkpondɛ kɛ ɛdawɔ noko ɛnyia wɔ kpuya nwo mualɛ ɔ?
ƐZINZALƐ ARANE
Asɔneyɛlɛ
Saa yɛyɛ asɔne dahuu a, duzu a yɛ nye la kɛ yɛbanyia a?
ƐZINZALƐ ARANE
Ɛbahola Wɔanyia Kɛzi Nyamenle Dwenle Yɛ Nwo La Azo Nvasoɛ
Ngɛlɛlera ne boa yɛ maa yɛnyia diedi wɔ kenle bie ɛwɔkɛ mɔɔ Nyamenle ɛbɔ yɛ la anu.
ƐZINZALƐ ARANE
Kɛzi Nyamenle Ahyɛlɛdeɛ Mɔɔ Tɛla Biala La Sonle Bolɛ Ɛ?
Ninyɛne boni a maa ahyɛlɛdeɛ bie sonle bolɛ tɛla bie a? Saa yɛdwenledwenle ninyɛne ɛhye mɔ anwo a ɔbamaa anyezɔlɛ mɔɔ yɛlɛ yɛmaa ɛkpɔnedeɛ ne la ayɛ kpole.
