OLKETA article wea iumi storyim finis showimaot hao staka nogud samting savve happen wea savve mekem laef hard tumas. Iu maet garem olketa problem and tingse sapos hem important for stap laef, or sapos eniwan tingim iu. No forget, God tingim iu taem iu kasem hard taem. Iu barava important long hem.

Man wea raetem Psalm 86 hem trustim God and sei: “Mi kol kam long yu long olketa taem wea trabol hemi kasem mi, bikos mi save dat yu ansarem olketa prea blong mi.” (Sams 86:7) Maet iu ting olsem, ‘Hao nao God ansarem olketa prea bilong mi taem mi kasem trabol?’

Nomata God maet no stretawe finisim olketa problem, Bible promisim hao hem savve givim iu peace for deal witim datwan. Hem sei: “Iufala mas no wari abaotem eni samting bat long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu. Taem iufala duim olsem, peace bilong God wea winim nao wanem man savve minim bae gaedem heart and tingting bilong iufala.” (Philippi 4:6, 7) Plis lukim hao olketa scripture long Bible pruvim hao God barava tingim iumi.

“God hem no forgetim eniwan long olketa [smol bird] . . . Iufala barava important winim evri smol bird hia.”—Luke 12:6, 7.

TINGIM DISWAN: Staka pipol tingse olketa smol bird no important. Bat long tingting bilong God, each wan long olketa smol bird hia important. Iumi olketa man barava important long God winim olketa smol bird. Long evri samting wea God creatim long earth, iumi olketa man nao barava nambawan. Hem wakem iumi for “tekem wei blong hem,” wea datwan mekem iumi fit for showimaot olketa gudfala wei bilong hem.—Jenesis 1:26, 27.

“Lod [Jehovah], yu lukim finis insaet long laef blong mi, an yu barava savegud long mi nao.  . . Yu save nomoa long evri tingting blong mi . . . Yu luksave kam long maen blong mi.”—Sams 139:1, 2, 23.

TINGIM DISWAN: God savve gud long iu. Hem savve long evri feeling and wari bilong iu. Olketa narawan maet no minim olketa hard taem wea kasem iu, bat God tingim iu and laek for helpem iu. Datwan showimaot iu mas no givap long laef.

“Lod [Jehovah], plis yu lisin kam long prea blong mi an herem kam krae blong mi fo help. . . . Taem mi kol kam long yu, plis yu herem mi an kuiktaem fo ansarem mi. . . . Bae hemi herem prea blong yumi pipol blong hem wea yumi no garem eniples fo stap long hem.”—Sams 102:1, 2, 17.

TINGIM DISWAN: Jehovah lukim taem pipol long earth wea safa olketa krae and hem tingim olketa. (Sams 56:8) Hem savve tu taem iu krae. God tingim taem iu krae and evri hard taem wea iu kasem bikos iu important long hem.

“Yufala no fraet. . . . Mi nao God blong yufala, . . . Bae mi mekem yufala strong, an bae mi helpem yufala. . . . Mi nao [Jehovah], God blong yufala! Mi tok olsem long yufala, ‘Yufala no fraet, bae mi helpem yufala.’” —Aesaea 41:10, 13.

TINGIM DISWAN: God hem redi for helpem iu. Sapos iu foldaon, hem bae helpem iu standap.

“God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” —John 3:16.

TINGIM DISWAN: God lovem iu tumas dastawe hem willing for givim Son bilong hem, Jesus for dae for iu. Datwan givim iu chance for iu savve hapi and garem gudfala laef for olowe. *