PASAQ yachachikuykunapim yachamurqanchik llakikuna qatiwaptinchikqa hawka kawsakuyta mana atisqanchikmanta. Ichapas qamqa hatun llakipipas kunan tarikuchkanki, ichapas chayrayku munanki wañukuytaña utaq piensanki mana pipas kuyasusqaykita. Ichaqa, Diosninchikqa anchatam llakikusunki ñakariqta qawamususpaykiqa, payqa anchatam kuyasunki.

Salmo 86 capitulota qillqaqmi Diosta kaynata nirqa: “Uyariwasqaykiraykum sasachakuyniy punchawpi qayakamullayki”, nispa (Salmo 86:7). Tapukunkipaschá, “¿imaynatam musyakuyman sasachakuyniypi qayakuptiy Dios uyariwasqanta?”, nispa.

Wakinpiqa Diosqa manachá sasachakuyninchiktaqa chinkachinqachu, aswanmi hawkayayta quwasunchik sasachakuyninchikta aguantanapaq. Bibliam nin: “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik, hinaptinqa Diospa hawkayayninmi sunquykichiktawan yuyaynikichikta [...] waqaychanqa”, nispa (Filipenses 4:6, 7). Qatiqninpi bibliapa nisqankunam musyachiwanchik Jehova Diosqa anchata kuyawasqanchikta.

Lucas 12:6, 7 nin: Pichinkuchakunataqa “Diosqa manam hukllantapas qunqanchu. [...] Qamkunaqa achka pichinkuchakunamantapas aswan valorniyuqmi kankichik”, nispa.

KAYTA YUYARIY: Diospaqqa pichinkuchakunapas ancha chaninniyuqmi. Chaymi Diospaqqa pichinkuchakunamantapas ancha chaninniyuqraq runakunaqa kanchik. Runa hinaqariki manam imapas unanchasqaqa kanchu, ñuqallanchikmi Dios hina kuyakuq chaynataq llakipayakuq kayta atinchik (Genesis 1:26, 27).

Salmo 139:1, 2, 23 nin: ‘Dios taytalláy, sunqullayta qawaykuwaspaykim pim kallasqayta riqsiwanki. [...] Ima piensasqaypas qampaqqa yachasqallaykim [...]. Pruebaykuwaspa tukuy yuyaymanayniykunata riqsiykuy’, nispa.

KAYTA YUYARIY: Diosqa sapakamatam sumaqta riqsiwanchik. Yachanmi imapas llakinchikkunata. Runakunaña ima pasawasqanchikta mana sumaqta yachaptinkupas Diosqa yachanmi, chaymi payqa yanapaykuyta munawanchik. Chayta yachayqa hawka kawsakunapaqmi yanapawanchik.

Salmo 102:1, 2, 17 nin: ‘Dios taytalláy, mañakamullasqayta uyariykullaway, qayakamullasqayta chaskiykullaway. [...] Qayakamullasqay punchawpi chaylla uyariykamullaway’. Jehova Diosqa ‘mana piniyuqkunapa mañakuynintam uyarin’, nispa.

KAYTA YUYARIY: Diosqa runakuna rikurisqanmantapacham lliw runakunapa waqasqanchikta yuyan (Salmo 56:8). Arí, Diosqa yachanmi tukuy ima llaki pasawasqanchiktapas, chaytaqa yuyan anchata kuyawasqanchikraykum.

Isaias 41:10, 13 nin: ‘Amayá hukmanyaychikchu, ñuqam Diosnikichik kani, kallpanchaspaymi yanapasqaykichik. [...] Ñuqa tayta Diosmi nikichik: [...] “Ama manchakuychikchu, ñuqam yanapasqaykichik”’, nispa.

KAYTA YUYARIY: Diosqa yanapaytam munawanchik. Chaymi llakipi tarikuptinchikpas yanapawasun.

Juan 3:16 nin: ‘Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kananpaq, aswanqa wiñay kawsayniyuq kananpaq’, nispa.

KAYTA YUYARIY: Diosqa anchata kuyawasqanchikraykum churin Jesusta kachamurqa ñuqanchikrayku wañunanpaq. Chaymi Jesuspa wañukusqanwan wiñaypaq kusisqa kawsakuyta atisun. *