ÑAUPAQ articulokunapi yachasqanchis experienciakunaqa mana aguantay atinapaq jinapaschá. Qanpas yaqapaschá chhaynapi tarikushanki, chaypaschá piensawaq “wañukapullaymanña” nispa otaq “manan pimanpas importanichu” nispa. Diosninchismi ichaqa llakikun chhayna sufrisqaykita rikuspa. Diosmanqa anchatan importanki.

Salmos 86 librota qelqaqmi Diospi confiaspa niran: “Wajakamuqtiymi kutichimuwanki, chaymi llaki phutiyniy p’unchaypi wajakamuyki”, nispa (Salmos 86:7). Yaqapaschá qanpas tapukunki: “¿Imaynatataq Diosri kutichimun pipas sonqo nanaypi tarikushaqtin?”, nispa.

Manapaschá Diosqa kunan pachachu tukuy problemanchiskunata tukuchinqa, ichaqa yanapawasunmi aguantananchispaq. Bibliapin niwanchis: “Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis”, nispa (Filipenses 4:6, 7). Qatimuq textokunata qhaway. Chaypin yachanki Diosqa qanpi interesakusqanta.

Pichinkukunataqa “Diosqa manan mayqenninkutapas qonqanchu. [...] Qankunaqa askha pichinkukunamantapas astawanraqmi valenkichis” (Lucas 12:6, 7).

KAYPI PIENSAY: Juch’uy pichinkupas Diospaqqa importanten. Wañurunmanña chaypas Diosqa rikumushanmi; Diospaqqa ancha valorniyoqmi. Pichinkukunatapas valorniyoqpaqtaq qhawarin chayqa, noqanchistaqa ancha valorniyoqpaqraqmi qhawariwanchis. Runakunaqa llapan kamasqankunamantapas aswan importanten kay pachapiqa kanchis. Diospa rijch’ayninman jina kasqanchisrayku, chaymi pay jina sumaq cualidadkunata noqanchispi wiñachiyta atinchis (Génesis 1:26, 27).

“Señor Diosníy, qanmi t’aqwiwankipas reqsiwankipas. [...] Yuyaykusqaytapas karumantaraqmi sut’itapuni yachanki” (Salmos 139:1, 2, 23).

KAYPI PIENSAY: Diosqa allintan reqsisunki. Yachanmi piensasqaykita llakikuyniykikunatapas. Manapaschá jujkunaqa entiendesunkikuchu imaynapi  tarikusqaykita, Diosmi ichaqa qanpi interesakun, yanapaytapas munasunkin. Chayta yachayqa yanapasunkin kausashanallaykipaq.

“Señor Diosníy, mañakamusqayta uyariykuway, wajakamusqayta uyariykuway. [...] Maki uyariykamuway, wajakamuqtiyqa usqhaylla kutichimuway. Wijch’usqa runaq mañakusqanta uyarinqa, paykunaq mañakusqantaqa manan pisichanqachu” (Salmos 102:1, 2, 17).

KAYPI PIENSAY: Diosqa sufrimiento qallarisqanmanta pachapas waqaytaqa waqaychashanman jinan (Salmos 56:8). Waqayniykipas chaypin waqaychasqa kashan. Diosqa manan qonqanchu llakikuykunapi tarikusqaykitaqa, payqa ancha importantepaqmi qhawarisunki.

“Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasqaykipas yanapasqaykipas. [...] Noqaqa Diosniyki Señor Diosmi kani [...], noqan niyki: Ama manchakuychu, noqan yanapasqayki, nispa” (Isaías 41:10, 13).

KAYPI PIENSAY: Diosqa yanapaytan munasunki. Sichus urmanki chayqa yanapasunkin sayarinaykipaq.

“Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq” (Juan 3:16).

KAYPI PIENSAY: Diosqa anchata munakusqasuykiraykun churinta kachamuran wañunanpaq. Chay sacrificionta ruwasqanraykun kunanqa manaña yanqapaqchu kausanki, chaymantapas wiñaypaqmi kusisqa kausanki. *