CAI TEMACUNAPICA huaquin llaquicunata charinaca yapata llaquichijta, causashpa catinaca na minishtirinllu yashpa pensachijtami ricupashcanchi. Tal vez quiquinbashmi huaquin llaquicunata chimbapurajupangui, shina pasajuimandami causashpa catingapapash ñana munapangui. Yapata solollapashmi sintiripangui. Shinapash quiquin sufrijujtaca Taita Diosca ricujunmi, quiquindaca ninandami juyan.

Taita Diospi confiashcamandami, Salmo 86​ta escribijca nin: “Ñuca mañashcata tigrachij cajpimi, ninan llaqui punllapica, canda cayapasha” nishpa (Salmo 86:7). Tapuripanguipashchari: “¿Llaquilla cajpica Taita Diosca imashinata uyahuan?” nishpa.

Llaquicunata na chai rato tucuchishpapash, Taita Diosca llaquicunata chimbapurai ushachunmi alillata sintirichun ayudan. Bibliapica ninmi: ‘Ima illajpipash, na chaitalla yariashpa llaquilla causanachu canguichi. Ashtahuangarin Taita Diostami mañariana canguichi. Tucuimandapash pagui nishpa mañaichilla. Casilla ali causaitaca, [Taita Dios caramushca pipash na yachai ushanalla,] casilla ali causaimi cangunapaj shungutapash, yuyaicunatapash huacaichijunga’ nishpa. (Filipenses 4:6, 7). Cai cati textocunapimi Taita Dios quiquinda ninanda juyashcata rucui ushapangui.

Alasyu animalcunataca ‘shujllatapash Taita Diosca na cunganllu. Cangunacarin, chai animalcunatapash yali valishcami canguichi’ (Lucas 12:6, 7).

CAIPI YUYAPAI: Taita Diospaca alasyu animalcunaca valishcami can. Gentecunacarin valishcapachami can. Paiman rijchajta rurashcacunami capanchi. Chaimi juyaj Taita Dios, imashina cashcataca ñucanchicunapash ricuchi ushapanchi (Génesis 1:26, 27).

‘Mandaj Dioslla, ñuca imashna cajta ricushpami, tucuita rijsihuashcangui. Ñuca imatalla yarijujtacarin, carumandallatami yachapangui. Ñuca yuyaicunatapash, imashna cajta ricushpa rijsihuayari’ (Salmo 139:1, 2, 23).

 CAIPI YUYAPAI: Taita Diosca quiquinda alipachami rijsin. Quiquinba llaquicunata, imashina sintirijujtaca ali alimi yachan. Shujcuna quiquinda na intindijpipash, Taita Diosca ali intindin. Ayudangapami munan. Chaimandami causashpa catinaca ali can.

‘Mandaj Dioslla, ñuca mañajujtaca uyahuayari. Ñuca caparishpa mañashcapash, cambajman chayapachun. Ñucataca aliguta uyahuayari. Ñuca mañajui punllapica, ucha tigrachihuayari’. Jehová Diosca “imatapash na rurai ushajcuna mañanajujtaca uyangami” (Salmo 102:1, 2, 17).

CAIPI YUYAPAI: Taita Diosca callarimandapachami gentecuna llaquilla cajta ricushpaca, paipash llaquilla sintirishca (Salmo 56:8). Quiquin huacashpa, llaquilla cashcataca Taita Diosca alimi yarin, quiquinga Taita Diospa ñaupajpica valishcapachami capangui.

‘Na shaijunachu canguichi, ñucami cangunaman ushaita cuj Taita Dios cani. Cangunapaj tucui causaipimi ayudajushalla, imatapash carajushalla. Mandaj Taita Dios ñucami: “Na manllanachu canguichi, ñucami ayudasha” nini’ (Isaías 41:10, 13).

CAIPI YUYAPAI: Taita Diosca quiquinda ayudangami. Llaquilla sintirijujpica cushichingami.

“Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” (Juan 3:16).

CAIPI YUYAPAI: Taita Diosca quiquinda ninanda juyaimandami paipa shujlla churiguta quiquinmanda huañuchun cachamurca. Jesús huañushcamandami shamuj punllacunapica cushilla, para siempre causaita ushapashun. *