Ae, E Puapinga RAI to te Oraanga
TE AU atikara i mua ake nei, te akakite maira te reira e ka ngata te oraanga me tupu tetai mea kino kia koe. Ia koe e akakoromaki ra i toou au manamanata, penei ka manako koe, me e puapinga rai to te oraanga, e me e tangata rai tetai e manako maira iaku. Kia irinaki koe e te manako maira te Atua ia koe. Te akaperepere ra aia ia koe.
Kua akaari te tangata i tata ia Salamo 86 i tona irinaki i te Atua: “I te rā e tumatetengaʼi au ra e kapiki rai au ia koe ra; ka akarongo mai oki koe iaku nei.” (Salamo 86:7) Penei ka manako koe, ‘Akapeea te Atua me tauturu mai iaku “i te rā e tumatetengaʼi au ra”?’
Noatu kare te Atua e akakore viviki i toou au manamanata, te akapapu maira tana Tuatua ko te Pipiria, e ka oronga mai aia i te au o te ngakau kia rauka ia koe te akakoromaki: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki; e na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.” (Philipi 4:6, 7) Me ka tika, e akamanako ana akapeea teia au Irava te akapapuanga mai e te manako maira te Atua ia koe.
Te Manako Maira te Atua ia Koe
“E kare rai tetai [manu rikiriki] i ngaro i te Atua. . . . E maata to kotou meitaki i to te au manu rikiriki e manganui.”—Luka 12:6, 7.
AKAMANAKO ANA: Penei ki te tangata kare te au manu rikiriki e puapinga ana inara te manako maira te Atua i te au manu rikiriki ravarai. Kare okotai e ngaro i tona mata; te akaperepere ra aia i te au mea ora pouroa. E puapinga atu ra te tangata i te au manu rikiriki. Ko te tangata te mea umere rava atu ta te Atua i anga i te enua nei, kua angaia ratou mei tona uaorai “tu” e ka rauka katoa ia ratou te akaari i te au tu meitaki o te Atua.—Genese 1:26, 27.
“E Iehova, kua unuunumouia au e koe, e kua kitea oki au. . . . Kua kite koe i toku nei manako . . . e timata mai iaku, e kia kite koe i toku manako.”—Salamo 139:1, 2, 23.
AKAMANAKO ANA: Kua kite meitaki tikai te Atua ia koe. Kua kite aia i toou au manako oonu e toou au manamanata. Penei kare tetai pae e mārama i toou au turanga taitaia, te manako maira ra te Atua ia koe e te inangaro ra i te tauturu ia koe. Ko teia te tumu i puapinga ai to tatou oraanga.
E Puapinga Toou Oraanga
“E Iehova e, e akarongo mai i taku pure, kia tae atu oki toku reo kia koe ra. . . . e ariu mai to taringa kiaku nei: i te rā e kapiki atu ei au ra, e akarongo vave mai koe iaku. . . . E akonoia e ia te pure a tei putaua.”—Salamo 102:1, 2, 17.
AKAMANAKO ANA: Mei te tuatau i akamata ai te tu taitaia o te tangata, kua kite a Iehova i te aronga pouroa tei aue no to ratou mamae. (Salamo 56:8) Tei roto katoa koe i teia. Ka maara i te Atua i toou manamanata e taau aue no te mea te akaperepere maira aia ia koe.
“Auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; . . . Ko au oki to Atua ra, ko Iehova . . . ko tei tuatua atua ia koe e, Auraka e mataku, naku koe e tauturu.”—Isaia 41:10, 13.
AKAMANAKO ANA: Ka tauturu te Atua ia koe. Me topa koe ki raro, ka akatu akaou mai aia ia koe ki runga.
Manakonakoanga no Tetai Oraanga Meitaki Atu
“I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16.
AKAMANAKO ANA: No to te Atua inangaro maata ia koe, kua akaatinga aia i tana Tamaiti ko Iesu kia ora koe. Na teia atinga oko i rauka ai ia koe te manakonakoanga no tetai oraanga mataora e te puapinga e tuatau ua atu. *
Noatu me ka tupu te taitaia kia koe e penei te akaraanga ka ngata te reira, e apii meitaki i te tuatua a te Atua e e akamou i toou akarongo ki runga i te au taputou a te Atua. Ka rauka ia koe te mataora e ka papu ia koe e puapinga rai to te oraanga.
^ Kia kite maata atu akapeea koe e puapingaia ai mei te atinga oko o Iesu, e akara i te vitio Akamaara i te mate o Iesu i runga i te www.pr418.com. Akara NO RUNGA IA MATOU > AKAMAARAANGA.