U Nga Kazrali Hi Ku Hanya—Ha Yini?
TINHLOKO-MHAKA leti khalutiki ti khanela hi mintxhumu ya ku siyana-siyana leyi nga yentxaka wutomi byi voneka ingi a bya ha sizi. Loko u li ni swikazratu, swi nga ha yentxeka u tivutisa leswaku mpela-mpela swa ha siza ku hanya ni leswaku kumbexana ku ni lweyi a zron’wekaka hi wene. Dumba leswaku Yehovha awa ku vona ku xaniseka kwaku. A ku zrandzra swinene.
Mutsrali wa Amapsalma 86 a kombise ku dumba kwakwe ka Xikwembu Nkulukumba hi ku hlaya leswi: ‘Hi siku dzra ku xaniseka ndzra ku vitana; hikusa wa ndzri yangula.’ (Amapsalma 86:7) U nga ha tivutisa: “Kasi Xikwembu Nkulukumba a ta ni hlamulisa kuyini ‘hi siku dzra ku xaniseka’ kwanga?”
Nambi leswi swi nga ha yentxekaka Xikwembu Nkulukumba a nga tekeli ku susa swikazratu swaku hi nkama wolowo, a Zritu dzrakwe, ku nga Bibele, dzri dumbisa leswaku a nga ku nyika ku zrula ka le moyeni, leswaku u ta kota ku langusana na swone. Dzrone dzri li: ‘N’wi nga hlatiyeleleni ntxhumu, kambe a timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota, ni ku kombela ni ku tlangela. Kutani a ku zrula ka Xikwembu Nkulukumba, loku tlulaka ku yanakanya hinkwaku, ku ta bekisa timbilu tenu ni miyanakanyo yenu.’ (Ba-le-Filipi 4:6, 7) Vona ndlela leyi tindzrimana leti landzrelaka ta Bibele ti hi nyikaka dumbo ha yone dzra leswaku Xikwembu Nkulukumba awa zron’weka ha hine.
Xikwembu Nkulukumba Awa Zron’weka Ha Wene
‘A ku na xin’we ku swone [swindjengeletana] lexa kuva xi dzrivaliwa mahlweni ka Xikwembu Nkulukumba. . . .N’wi tlula swindjengeletana leswa ku tala.’—Luka 12:6, 7.
YANAKANYA HI LESWI: Nambi swindjengeletana a swi dzrivaliwi mahlweni ka Xikwembu Nkulukumba. Xin’wana ni xin’wana xi ni lisima ka yene. Ka Xikwembu Nkulukumba, vhanu va ni lisima dzrikulu ku tlula swindjengeletana. Ka hinkwaswu leswi a swi tumbuluxiki a misaveni, a vhanu va hlawuleke swinene. Va hambiwe ‘xifanisweni’ xa Xikwembu Nkulukumba nakone va ni wuswikoti bya ku hlakulela ni ku kombisa wumhunu bya ku hlamalisa lebyi a nga na byone.—Genesis 1:26, 27.
‘Yehovha, wene u ndzri kambile, wa ndzri tiva. . .U tiva miyanakanyo yanga. . .Ndzri dzringe, u tiva miyanakanyo yanga.’—Amapsalma 139:1, 2, 23.
YANAKANYA HI LESWI: Xikwembu Nkulukumba awa ku tiva ha hombe. A tiva leswi u swi twaka ni leswi swi ku kazrataka. Nambi loko vambeni va nga swi twisisi ha hombe leswi u swi twaka, Xikwembu Nkulukumba awa zron’weka ha wene nakone a djula ku ku pfuna. Ku tiva leswo swi ku nyika ntamu leswaku u nga kazrali hi ku hanya.
Wutomi Byaku Byi Ni Nkongometo
‘Yehovha, yingela xikhongoto xanga; a ku te ku wene ni ku dzrila kwanga. . .Zreya ndleve yaku ku mine, u hungweyesa ku ndzri yingela. . .A yingeli xikhongoto xa xisiwana.’—Amapsalma 102:1, 2, 17.
YANAKANYA HI LESWI: Ku sukela loko ku xaniseka ka vhanu ku sungulile, Yehovha awa ku tiva ku vaviseka hinkwaku loku vhanu va tlhanganaka na kone. (Amapsalma 56:8) Leswo swi patsra ni minyembeti yaku. Xikwembu Nkulukumba awa swi dzrimuka swikazratu hinkwaswu leswi u kumanaka na swone hikusa a ku zrandzra swinene.
‘U nga zruzrumele, hikusa ndzri Xikwembu Nkulukumba waku. Ndzri ta ku tiyisa; ina, ndzri ta ku pfuna. . .Hikusa, mine Yehovha ndzri. . .lwa ku byelaka: U nga txhave, ndzri ta ku pfuna.’—Ezaya 41:10, 13.
YANAKANYA HI LESWI: Xikwembu Nkulukumba a tsrhama na a tibekiselile ku ku pfuna. Loko u wa, a ta ku pfuxa.
Ku Ta Va Ni Wumundzruku Lebyinene
‘Hikuva Xikwembu Nkulukumba a zrandzri misava swa ku nhati, a ko a nyika N’wanakwe, lwe wa ku va swakwe, akuva mani na mani lweyi a pfumelaka ku yene a nga lahleki, kambe a kuma vutomi lebyi nga gamikiki.’—Yohan 3:16.
YANAKANYA HI LESWI: Xikwembu Nkulukumba a ku zrandzra swinene lakakuva hi ku swi zrandzra a nyikele N’wanakwe, Yesu, leswaku a ta ku fela. Leswi a ku feliki, u ni dumbo dzra ku va ni wutomi lebyi nyonxisaka byi tlhela byi va ni nkongometo hi la ku nga gamikiki. *
Nambi loko u li ka swiyimu swa ku bindzra leswi yentxaka wutomi byi voneka byi nga ha sizi, dondzra Zritu dzra Xikwembu Nkulukumba u tlhela u tiyisa lipfumelo dzraku ka swidumbiso swakwe. Leswo swi ta ku yentxa u nyonxa u tlhela u kuma ntamu akuva u nga kazrali hi ku hanya.
^ par. 19 Akuva u dondzra swin’wana mayelanu ni leswi u nga pfunekisaka xiswone ka lifu dzra Yesu, hlalela vídeo ledzri liki Dzrimuka Lifu Dzra Yesu ka www.pr418.com/rng. Lavisa ka SWIPALUXIWA>MAVHIDIYU.
You May Also Like
MAYELANU NI TIMBONI TA YEHOVHA
Ha Yini U Fanele Ku Dondzra Bibele?
Bibele dzri pfuna madzana-dzana ya vhanu a misaveni hinkwayu ku kuma tinhlamulo ta swivutiso leswikulu a wuton’wini. Wa swi navela ku va mun’we wa vone?
