AMBAGE so ahon afa tongana nyen la angangu kpale nde nde apeut ti sara si gigi anzere na zo ape. Na temps so mo yeke na yâ ti akpale, mo peut ti hunda terê ti mo mo tene eskê a yeke nzoni ti ngbâ na fini? wala mbeni zo ayeke pensé nga na mo la? Me zia mo hinga so Nzapa ayeke bâ vundu ti mo. Lo bâ mo na nene ni mingi.

Zo so asû Psaume 86 atene lani so lo yeke na confiance na Nzapa, lo tene: “Mbi yeke iri mo na ngoi ti vundu ti mbi, ndali ti so mo yeke kiri tënë na mbi.” (Psaume 86:7). Me mo peut ti hunda terê ti mo: ‘Nzapa ayeke kiri ande tënë na mbi tongana nyen “na ngoi ti vundu ti mbi”?’

Atâa so a peut ti si so Nzapa aleke akpale ti mo ni gï na lê ni lê ni ape, Bible atene so lo yeke mû na mo siriri ti bê so ayeke aidé mo ti gbu ngangu. A tene: “Ala gi bê ti ala na ndö ti mbeni ye pëpe, me na yâ ti aye kue, na lege ti sambela, na lege ti vorongo terê na Nzapa nga na sambela ti kiringo singila, ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na bibe ti ala.” (aPhilippien 4:6, 7, kete tënë na gbe ni). E hunda mo ti bâ tongana nyen la aversê ti Bible so e gue ti bâ afa so Nzapa ayeke pensé biani na e.

‘Lê ti Nzapa ahon na ndö ti mbeni [nzêrë] oko ape . . . Ngere ti ala ahon ngere ti gbâ ti anzêrë.’​—Luc 12:6, 7, kete tënë na gbe ni.

GBU LI NA NDÖ TI TËNË SO: Na lê ti gbâ ti azo, akete ndeke tongana anzêrë ayeke na valeur ape. Me Nzapa ayeke pensé même na ala oko oko kue; ala oko oko kue ayeke na kota ngere na lê ti lo. Me na lê ti lo, azo ayeke na kota ngere mingi ahon anzêrë. Na popo ti aye kue so Nzapa acréé na ndö ti sese, azo la ayeke na valeur mingi na lê ti Lo. Lo créé e na “image” ti lo na e peut ti duti na a-oko pendere sarango ye ti Lo.​—Genèse 1:26, 27.

“Jéhovah, mo gi yâ ti bê ti mbi awe, na mo hinga mbi. . . . Mo hinga apensé ti mbi . . . Bâ mbi nzoni, nga gi ti hinga agingo bê ti mbi.”​—Psaume 139:1, 2, 23.

GBU LI NA NDÖ TI TËNË SO: Nzapa ahinga mo nzoni mingi. Lo hinga atënë ti bê ti mo nga na akpale ti mo so gï mo oko la mo hinga ni. Même si azo acomprendre situation ti mo ape, Nzapa ayeke pensé na mo nga lo ye ti aidé mo. Ye so asara si a yeke bien ti tene mo ngbâ na fini.

“Jéhovah, mä sambela ti mbi; zia si mo mä toto so mbi yeke toto na mo ti mû maboko na mbi. . . . Dengi mê ti mo, mo mä mbi; na ngoi so mbi iri mo, kiri tënë na mbi hio. . . . Lo yeke dengi mê ti mä sambela ti azo so ayeke na ye oko pëpe.”​—Psaume 102:1, 2, 17.

GBU LI NA NDÖ TI TËNË SO: Jéhovah abâ angu ti lê ti azo kue so atoto, ngbene ye so azo akomanse ti bâ pasi na ndö ti sese (Psaume 56:8). Lo bâ nga ngu ti lê ti mo kue. Lo hinga atara kue so mo wara nga na ngu ti lê ti mo so ayuru, ndali ti so mo yeke na kota ngere na lê ti lo.

“Gi bê ti mo pëpe, ndali ti so mbi yeke Nzapa ti mo. Mbi yeke kpengba mo, ti tâ tënë ni, mbi yeke mû maboko na mo. . . . Mbi Jéhovah Nzapa ti mo, . . . mbi la mbi tene na mo tene, mbi tene: ‘Sara mbeto pëpe. Mbi yeke mû maboko na mo.’”​—Ésaïe 41:10, 13.

GBU LI NA NDÖ TI TËNË SO: Nzapa ayeke nduru ti aidé mo. Tongana mo tï, lo yeke yô mo na nduzu.

“Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.”​—Jean 3:16.

GBU LI NA NDÖ TI TËNË SO: Mo yeke tâ na valeur mingi na lê ti Nzapa ni la na bê ti lo wani lo mû Molenge ti lo, Jésus, ti kui ndali ti mo. Grâce na kuâ ti Jésus, mo peut ti duti na beku ti wara ande mbeni fini so mo yeke na ngia na yâ ni teti lakue lakue. *