Heeshshokki Waaga Afidhinota Huluullantooti!
SAˈU birxichuwara laˈnummonte gede, iillannonkehu buutote qarri, heeshsho waagu nookkita labbannonke gede assara dandaanno. Qarru batiˈrannohe woyite, heeshshokki waaga afidhinokkihanna ate daafira hedannohu nookkiha lawahera dandaanno. Ikkirono Maganoho qarrikki leellannosita huluullantooti. Korkaatuno isi ate lowo geeshsha baxannohe.
Faarso 86te borreessaanchi, “Huucciˈreemmore wonshattoe daafira, qarrameemmo barra ate woshshiˈreemmo” yee Magano addaxxannota coyiˈrino. (Faarso 86:7) Ikkollana, ‘Maganu “qarrameemmo barra” huuccattoˈyara dawaro qolannohu hiittoonniiti?’ yite hedattoha ikkara dandaanno.
Maganu qarrakki bayichonko hoolannoha ikka hoogirono, qarrakki dandaatto gede kaaˈlannoheha giddiidi keere aannohe; Qaalisi Qullaawu Maxaafi tenne kulanni togo yaanno: “Baalunku coyira galaxxitinanninna huuccidhinanni hasidhinoonni coye Maganoho kuˈle ikkinnina, mittu coyirano yaaddinoonte. Mannu hedora aleenni ikkinohu Maganu keeri, Kiristoosi Yesuusinni wodanaˈnenna hedoˈne agaranno.” (Filiphisiyusi Sokka 4:6, 7) Hanni aante nooti Qullaawu Maxaafi qummeeshshuwa Maganu ninke daafira hedannota leellishshanno gara hedi.
Maganu Ate Daafira Addinta Hedanno
“Maganu . . . mitticho [gurraicho] nafa dihawanno. . . . Kiˈne lowo gurraenni roortinanni.”—Luqaasi 12:6, 7.
HANNI HEDI: Maganu gurraenna wole shiimmaadda cea nafa dihawanno. Isi mitte gurraicho nafa ille wore laˈˈanno; korkaatuno mitte mittenti ceicho isi albaanni muxxe kalaqamaati. Mannu ooso Maganu albaanni gurraetenni lowo geeshsha roorino waaga afidhino. Uullate aana noohu Maganu kalaqami giddo mannu ooso baxxitinoreeti; korkaatuno mannu Maganu ‘daninni’ kalaqamino daafira, Maganunnita dhagge ikkitanno akatta lossiˈranna leellisha dandaanno.—Kalaqama 1:26, 27.
“Kaaliiqaˈya fonqolte laoottoe. Ati . . . hedoˈya baala xeertote heedhe afootto. . . . Jiffe laie; hedoˈyano afi.”—Faarso 139:1, 2, 23.
HANNI HEDI: Maganu ate bade egenninohe. Isi wodanikkira noota dahaabbino hedonna yaaddokki baala afino. Qarrikkinna yaaddokki wolootaho leella hoogguro nafa, Maganu ate daafira hedanno; qoleno kaaˈlahera hasiˈranno. Konni daafira heeshshokki waaga afidhinote yaate.
Maganu Irkisannohe Hattono Massagannohe
“Kaaliiqa ballo, huuccattoˈya macciishshie! . . . Maccakki ane widira qolte, woshshiˈreemmohe woyite rakke dawarie. . . . [Isi] hawaminohunnita mannisi kuˈlo macciishshanno.”—Faarso 102:1, 2, 17.
HANNI HEDI: Mannu ooso qarru heeshsho heeˈra hanaffu yannanni kayise, Yihowa mittu mittunku manchi hindiiddo laino. (Faarso 56:8) Isi ate hindiiddono laino. Maganu albaanni muxxe ikkootto daafira, isi iillannohe qarranna hindiiddokki baala qaaganno.
“Ani ledokki noommona waajjitooti; . . . ani jawaachisheemmohe, kaaˈleemmohe; . . . ‘Kaaˈleemmohena waajjitooti’ yeemmohehu, Maganikki ani Kaaliiqaati.”—Isayaasi 41:10, 13.
HANNI HEDI: Maganu ate kaaˈlate qixxaawinoho. Qoleno uwittoro kayisannohe.
Maganu Dancha Yanna Abbara Hexxo Uyino
“Maganu baattote aana noo manna baala baxino daafira, iso ammaˈninohu baalu hegere heeshsho afiˈranno gede ikkinnina baˈˈannokki gede, Maganu mitto Beettosi uyino.”—Yohaannisi 3:16.
HANNI HEDI: Maganu albaanni muxxe ikkootto daafira, isi Beettisi Yesuusi atera kakkalo ikke reyanno gede assino. Tini kakkalo hegerera hagiirru noo heeshsho heeˈratto faro fantinohe. *
Buutote qarri iilleennahe heeshshokki waagu nookkita labbuherono, ballo Maganu Qaale seekkite xiinxallatenna Maganu uyinohe hexxora noohe ammana kaajjishiˈrate sharrami. Hatto assittoro, hagiirraamo ikkatto, hattono heeshshokki waaga afidhinota huwatatto.
^ Yesuusiti wodote kakkalo kaaˈlitannohe gara ledde afate, www.pr418.com/sid aana noota Yesuusi Reyo Qaagi yitanno viidiyo lai. Tini viidiyo NINKE DAAFIRA > QAAGOOSHSHU AYYAANA yaannohu hunda no.
Kurino Lai
NINKE DAAFIRA
Qullaawa Maxaafa Xiinxalla Hasiissannohu Mayiraati?
Alamete aana lowo miliyoone ikkanno manni huluullitannonsa xaˈmora Qullaawu Maxaafinni dawaro afiˈranni no. Atino xaˈmokkira dawaro afiˈra hasiˈratto?
AGAROOSHSHU SHAE
Huuccatto Kaaˈlitannohe Gara
Ganyite huuccatto assiˈrattoha ikkiro, mayi atoote afiˈrattora dandaatto?
AGAROOSHSHU SHAE
Maganu Ninke Daafira Hedannota Afanke Kaaˈlitannonke Gara
Qullaawu Maxaafi Maganu eino qaale wonshannota addaxxineemmo gede kaaˈlannonke.
AGAROOSHSHU SHAE
Maganu Uyinonke Elto Muxxete Yineemmohu Mayiraati?
Mittore ellihero hakkoricho naadatto gede assannoheri maati? Tenne afanke Maganu uyinonketa muxxe elto yaano wodo albinni roore naandeemmo gede assitannonke.
